Ainaro - Prezidente Autoridade Munisipal Ainaro liu husi Agrikultura Munisipio Ainaro servisu hamutuk ho Ministério Agrikultura Pecuária Pesca e Floresta (MAPPF) liu husi Dirasaun Nasionál Agrikultura Hortikultura e Protesaun Plantas kolleta hare 12 ektare ho variedade Nakroma ne’ebé utiliza adubus organiku Pop Nassa Super Nassa no harmonik ba primeiru epoka no kontinua halo kolleta iha Bonuk nomós Loegolo kuaze iha 500 ektare. seremónia kolleta hare ne’e ofisialmente kolleta husi Ministru MAPPF Marcos “Mameta” da Cruz iha loron Sabadu (08/06/24) iha Suku Raimea Postu Administrativu Zumalai.
Iha entrevista Ministru MAPPF Marcos hateten, objetivu oinsa atu hasa’e produsaun hare iha rai laran, atu bele diminui importasaun husi rai liur nune’e orsamentu ne’ebé mak Estadu hasai hodi sosa fos husi rai liur, bele sosa fila fali hare ne’ebé mak populasaun sira produz ne’e duni ita -nia prezensa iha ne’e atu fo motivasaun ba Agrikultór sira atu bele halo natar, tanba wainhira sira produz governu sosa depoiz bele fornese ba merkadu sira iha rai laran. Nia hatutan, kolleta hare hamutuk 12 ektare iha Raimea no kontinua ba Munisípio Ainaro iha Bonuk nomós Loegolo kuaze iha 500 ektare, iha fatin barak mós sira seidauk halo, tanba presiza halo kanalizasaun irigasaun no presiza tutan ba iha rai ne’ebé mak presiza tanba iha fatin balun kanu hetan estragus ona, no agora dadaun mós mota sei bo’ot, tanba ne’e ita seidauk bele halo intervensaun maibé wainhira halo hotu ona intervensaun, sei aumenta tan área kultivasaun ba iha Munisipio Ainaro. “Ohin loron (rad) sabadu ita-mai kolleta iha fatin ne’e, no ita haree katak ninia rezultadu ne’e hatudu diak tebes, tanba ne’e mak ha’u hakarak husu ba Agrikultór sira atu nafatin servisu maka’as nune’e ba oin loke tan iha área kultivu nian neduni husu ba agrikulór sira iha Munisipio Ainaro atu kontinua halo natar nune’e tinan ida bele halo natar dala rua.” Ita mai iha ne’e atu dehan mós ba komunidade sira, liu-liu iha Munisipio Ainaro atu bele halo sira nia natar, maske udan bo’ot estraga buat seluk, maibé ida ne’e fo mós oportunidade ba Agrikultór sira ne’ebe iha natar, sira kontinua halo sira nia natar, iha área sira ne’e ita hare katak, populasaun balun agora hahu prepara sira nia rai no halo viveirus, ba sira ne’ebé mak agora ita kolleta, governu husu atu sira kontinua nafatin halo ba segundu epoka nian. Tenik Ministru MAPPF
Iha fatin hanesan, Prezidente Autoridade Munisipio (PAM) Ainaro Manuela Georgina Carmo Bucar Corte Real, agradese tebes ba Ministru MAPPF ne’ebé mak hit-an mai iha fatin refere hodi halo kolleta hare ho variedade Nakroma ba iha produsaun husi agrikultór sira, iha ne’e produsaun mós kapas tebes, ita husu nafatinagrikultór sira kontinua halo natar, tanba be’e mos kapas tebes, maske iha fatin balun mak kanál la dun diak, maibé agora dadaun MAPPF mos halo dadaun ona manutensaun no rehabilitasaun ba fatin sira ne’e, hanesan liman aoingovernu nian sujere ba agrikultór sira labele baruk atu kuda hare tanba hetan apoiu ho atensaun husi MAPPF fo ne’e benefisiu di’ak ida ba ita. Nia hatutan, atividade sira ne’e hotu fo benefisiu di’ak tebes ba agrikultór sira tanba sira bele hadia sira nia ekonomia uma laran, neduni fasilidade husi MAPPF oferese hotu entaun ida ne’e rekere de’it ona agrikultór sira nia badinas, nune’e ita-nia produsaun bele sa’e, kuandu produsaun sa’e ona automatikamente hadia ona ita-nia ekonomia familia no reduz mos importasaun husi rai liur. Signifika katak osan ne’ebé tuir lolos atu sosa produsaun husi rai liur maibé bele sirkula ona iha ita rai rasik.
Nune’e mos Agrikultór Francisco Bianco esplika, hamutuk ema-na’in 80 mak halo natar husi 12 ektares ne’e, husi natar ne’ebé mak sira halo benefisiu liu ba estudante sira, tanba ne’e sira mós husu ba governu atu sosa netik hare ne’ebé mak sira produz atu bele sustenta fali sira nia uma laran. Hanesan agrikultór sira mós prontu halo natar tinan epoka rua depende mós ba be’e. Ekipa Media-DMEA
