Viqueque 19/09/2024, Ministério Agricultura Pecuária Pesca no Floresta (MAPPF) liu husi Servisu Municipal Agrikultura (SMA)Viqueque kolleta hare hamutuk ektare 72 ne'ebé implementa Pratíka Agrikultura Diak( PAD) iha área natar wedare suku Luca postu administrativu Viqueque Vila ba tinan 2024.
Iha entrevista Ministru Agrikultura Pekuária Peska e Floresta, Marcos ''MAMETA'' da Cruz katak,kontenti tanba kolleta hare ne’e ita haree rasik fini hare di'ak ne'ebé mak dezenvolve iha rai laran, fini hare nakroman ne'ebé povu konsege kuda hatudu rezulta ne'ebé diak, ohin Ekipa Ministério bele mai hodi kolleta, fini hare nakroman ne'ebé agrikultór sira kuda iha natar Wedare naruk ne'e liu ektare 300, maibé iha natar ektare 72 mak hatudu ona rezultadu. Natar ne'e sira husik tiha kuaze tinan 8 (Ualu) resin, tanba kanál irrigasaun ida atu fornese be'e ba natar ne'e kotu halo agrikultór sira durante tinan naruk la bele halo natar, bainhira Programa Nasionál Dezenvolvimentu Suku (PNDS) no apoiu PAM inklui UNDP konsege normaliza fila-fali kanál irrigasaun ne’e lao diak ne’eduni natar na’in sira hahu halo natar no hatudu ona rezultadu.
Ministru hatutan, Ministério sei fasilita no apoiu infraestrutura báziku hodi reforsa liu-tan esforsu ne'ebé sira hatudu ona. Iniasiativa ne'ebé agrikultór Wedare naruk, suku Luka hatudu ne'e sei fó konfiansa boot ba governu sentral atu servisu hamutuk ho munisípiu hodi bele fasilita tan tratór médiu no tratór boot hodi reforsa liu tan servisu natar na’in sira hodi hasa'e produsaun rai laran. ho governu ninia prezensa liu husi Ministru Agrikultura pekuária Peska no Floresta nian, atu fó apresiasaun ba agrikultór sira ne’ebé halo ona buat di'ak tanba ne'e presiza fó parabens ba agrikultor sira.
Iha fatin hanesan Prezidente Autoridade Munisípiu Viqueque, Francisco Soares Gonzaga hatete, agradese ba governu liu husi Ministru Agrikultura tanba bele apoiu no fasilita ona natar na’in sira liu husi nia tékniku sira e dadaun ne’e it abele halo kolleta hare iha komunidade nia le’et. Ne'e nu'udar motivasaun ba agrikultór Munisípiu Viqueque liu-liu iha Wedare Naruk nomós iha fatin sira seluk ne'ebé iha rai poténsia ba natar bele hasa'e tan produsaun iha rai laran tanba área potensial ho ne’ebé konsidera boot mak iha Munisípiu tolu hanesan, Viqueque Baucau no RAEOA.
Nune’e mós Xefe grupu Natar Wedare naruk, João Carlos Amaral realsa, tinan ualu sira la halo Natar tanba irrigasaun ne'ebé atu fornese bee ba natar sira monu (at) iha area We Todo. Maibé tinan ida ne'e sira halo fali natar tanba fornesimentu bee lao di'ak fila-fali, bainhira sira atu re-ativa fali natar iha suku Luka, nia halibur xefe grupu hamutuk 11 ho membru 186 hodi fó korazen atu hahú fila fali natar. Husi totál membru 186 ne'e konsege prodúz ona hare nakroma iha natar ektare 72 ne'e tenke implementa Prátika Agrikultura Diak (PAD) bazeia ba orientasaun tékniku ne'ebé iha ona.
Iha serimónia kolleta hare ne'e partisipasaun maximu husi PAM Viqueque, Diretór Nasionál, Diretór Munisípiu, Komandante Polisia Munisípiu Viqueque, Administradór Postu Viqueque Vila, reperzentante sekretariu Estadu kooperativa (SEkoop) reperzentante MOKATIL, reperzentante CCITL, Xefe Suku Luka, Estensionista, Veteranu no agrikultór sira.Ekipa DMEA
