Bobonaro, 25 Outubru 2024- Ministériu Agrikultura, Pekuária, Peska no Floresta (MAPPF) liu husi Programa SAPIP kontinua distribui mákina agrikultura ho totál Unidade 114 ba grupu benifisiáriu 23 ho objetivu atu moderniza servisu agrikutura hodi reduz kustu servisu nune’e hodi hasa’e produsaun iha rai-laran nune’e labele dependente de’it ba fos inportasaun husi rai liu.
Ministru MAPPF, Eng. Marcos"MAMETA" da Cruz ba jornalista sira katak,objetivu husi distribuisaun ekipamentu agrikola ho unidade boot ne'e atu hakbi'it agrikultór sira iha Munisípiu Bobonaru ne'e bele hala'o sira nia servisu iha natar ho to'os ho tempu ne'ebé kma’an no la gasta kustu servisu iha kampu tanba mákina ne'ebé ohin MAPPF distribuí ba grupu agrikultór sira ne'e iha unidades hamutuk 114 ne'ebé fahe ba kategoria rua mak hanesan mákina unidade 80 sosa Ho osan mai husi Banku Mundiál no mákina seluk ho unidade 34.
Ministru hatutan, mákina ne'ebé sosa ho osan Banku Mundiál liu husi projetu SAPIP ne'e mak hanesan hand tractor unidade 23, mákina kuda hare unidade 46 no mákina koa hare unidade 11, no ekipamentu ne'ebé Ministériu Agrikultura , Pekuária, Peska no Floresta (MAPPF) sosa ho orsamentu estadu hamutuk unidade 34 kompostu husi tratór boot unidade 4 no hand tractor unidade 30. "Mákina sira ne'e entrega hotu mai iha governu liu husi Ministériu Agrikultura mak halo distribuisaun. No husi projetu SAPIP nian iha ona grupu hamtuk 23 maka simu direita makina sira, no mákina ne'ebé sosa ho osan estadu nian sei intrega direta ba Prezidente Autoridade Bobonaru mak sei halo jestaun hodi identifika grupu ne'ebé iha to'os ho natar mak intrega ba atu sira bele halo servisu,"
Iha fatin hanesan,Prezidente Autoridade Munisípiu Bobonaro, Alexandre Pires relata katak ekipamentu ne'ebé distribuí ona BA ahrikultór sira iba Munisípiu Bobonaro ne'e, kontinua hetan kontrolu husi PAM. Mezmu mákina ne'ebé sosa Ho osan husi Baku Mundiál hodi oferese ba grupu sira, maibé PAM nafatin iha responsabilidade atu halo kontrolu hodi haree grupu sira ninia utilizasaun ba mákina sira hirak ne’e.
PAM Hatutan, grupu 23 ne'e Mak balun la utiliza ekipamentu sira ne'e ho responsabilidades katak simu tiha mákina sira ne'e maibé la halai natar PAM iha kompetensia tomak sei foti fila-fali fasilidade sira ne'e husi grupu refere hodi entrega fali ba grupu seluk ne'ebé presija Atu nune'e bele uza ho didi'ak hodi hasa'e produsaun iha rai laran atu iha nafatin sustentablidade bele responde nesesidade iha merkadu.
Nune'e representante Banku Mundiál, Atelvina Araujo de Jesus konsidera katak Banku Mundiál kontente tebes bele servisu hamutuk ho governu liu husu Ministériu Agrikultura, Pekuária, Peska no Floresta hodi apoiu agrikultór sira iha Timor-Leste. Agrikultór sira iha Timor-Leste iha vontade boot no sira mesak ema badinas de'it maibé difikuldade boot ida ba sira mak durante ne'e, sira uza de'it meius tradisionál hodi halo servisu iha to'os ho natar, Tanba ne'e liu husi ekipamentu modernu ne'ebé Banku Mundiál ho Ministériu oferese ne'e sei hakbi'it no hakma'an liu tan agrikultór sira nia servisu atu sira bele hasa'e produsaun iha rai laran.
