Ainaro, 23 Outubru 2024- Ministru Agrikultura Pekuária Peska no Floresta (MAPPF), Marcos"MAMETA"da Cruz, akompaña husi Sekretáriu Estadu Peska entrega mákina agrikultura unidade 41 ba ba Prezidente Autoridade Municipal Ainaro hodi entrega ba grupu benifisiariu liu husi programa SAPIP atu hasa'e produsaun iha rai laran espesiál iha Munisipiu Ainaro.
Depoizde entrega mákina sira ne'e, Ministru MAPPF, Eng.Marcos"MAMETA" da Cruz hatete ba jornalista sira katak, Ministériu iha komitmentu boot hakarak implementa programa agrikultura iha Baze liu husi fornesimentu mákina sira ne'e hodi hakbi'it Agrikultór sira atu hala'o sira nia servisu iha to'os no natar. " Ita mai entrega mákina hanesan tratór liman, makina kuda no koa hare hamutuk unidades 41 kompostu husi mákina 20 ne'ebé ministériu sosa ho osan estadu no mákina 21 ne'ebé sosa ho husi Banku Mundiál atu hakbi'it agrikultór sira iha Munisípiu Ainaro hodi hasa'e produsaun iha rai laran". dehan Ministru Marcos iha edifísiu Diresaun Servisu Agricultura Ainaro Suku Maulore, Postu Administrativu Ainaru Vila”.
Ministru Marcos hatutan, makina unidade 21 ne'ebé Banku Mundial sosa ho osan hamutuk rihun $.174 hodi oferese mai MAPPF liu husi projetu SAPIP ne'e, entrega ona ba grupu benifisiariu 15 maibé kontinua hetan kontrola husi Presidente Autoridade Munisípiu Ainaro. Nune'e husi mákina unidade 20 ne'ebé sosa ho orsamentu jerál estadu nian entrega ona ba Prezidente Autoridade maibé seidauk iha benfisiáriu, makiná unidade 20 ne’ebé mak sosa ho orsamentu estadu ne’e grupu seidauk iha tanba ne’e entrega dereta ba Prezidenti Autoridade niune’e bele halo jestaun ba ekipamentu hirak refere.
Ministru mós husu ba grupu agrikultór 15 ne'ebé hetan ona ekipamentu mákina husi projetu SAPIP no ba grupu sira ne'ebé mak preparadu atu sai benefisiáriu liu husi jestaun PAM Ainaruo nian, bainhira hetan ona fasilidade tenke uza ho didi'ak no responsabilidade atu kondisaun mákina sira ne'e bele iha nia sustentabilidade no ba grupu sira ne'ebé mak la iha responsabilidade ba ekipamentu sira ne'e, governu sei foti hikas fali hodi entrega fali ba grupu seluk.
Iha fatin hanesan Prezidente Autoridade Munisípiu Ainaro, Manuela Georgina Carmo Bucar Corte Real hato'o agradesementu boot Ministério tanba bele hetan ona apoiu ekipamentu materiál sira atu bele ajuda agrikultór sira hodi hala'o servisu iha to'os ho natar. Maibé ba grupu sira ne'ebé mak simu tiha ekipamentu maibé la uza hodi halo to'os ho natar nia sei foti hikas. " Ha'u sei halo akordu ida ho ita boot sira, banhira akrodu ne'e mak ita boot sira la kumpri ha'u sei foti hikas ekipamentu sira ne'e hodi fó fali ba grupu seluk".
PAM salienta, mezmu nia la'os agrikultór, maibé sei akompaña Agrikultór sira iha baze nune'e bele ajuda no motiva grupu sira hodi ezekuta servisu sira ne’e responsabilidade.
Nune'e xefe grupo ILLU Marcelino Magno relata katak ninia grupu hetan ona apoiu ekipamentu agikultura hanesan tratór liman ka Hand tratór, mákina kuda Ida no makina koa hare Ida. Ekipamentu hirak ne’e hetan husi projetu SAPIP, ho apoiu ne'ebé sira hetan ona ne'e, nia promete sei halo esforsu maka’as atu uza mákina sira ne'e ho responsabilidade hodi fó rezultadu di'ak liu husi hasa'e produsaun iha rai laran.
