Dili, 05 Novembru 2024 - Ministru Agrikultura, Pekuária, Peska no Florestas (MAPPF), Eng. Marcos” MAMETA” da Cruz partisipa iha workshop diálogu polítika modelu agroflorestál ho baze restorasaun rai iha Timor-Leste hodi nune’e bele prodús dokumentu ida atu ema hotu bele kuidadu natureza iha Timor-Leste, Workshop ne’e realiza iha salaun JL. Vila Aimutin.
Ministru dehan Timor-Leste iha area hamutuk rihun 14 metru kuadradu de’ít tasi mak luan liu depois ba futuru populasaun Timor sei aumenta ba beibeik, entaun presiza iha polítika ida di’ak atu bele orienta populasun tomak hodi servisu hamutuk atu kuiada rai timor ne’e,hodi bele fó benefisiu ba tempu agora no ba tempu naruk. Ne’e duni presiza atu formaliza dokumentu ida bazeia ba modelu agroflorestal iha Timor-Lese. “Ohin ita halo diskusaun ne’e atu ita bele iha dokumentu ida hodi sai baze ba Ministériu Agrikultura nomós sosiedade sivíl sira ne’ebé involve an iha agroflorestál, atu ita hamutuk bele kuidadu diák liu tan natureza,” dehan Ministru Marcos”MAMETA”
Ministru realsa, Importánsia husi workshop ida ne’e oinsá atu diskute polítika dezenvolvimentu ba agrofloretál. Ita hakarak iha dokumentu ida ne’ebé ita bolu dehan polítika dezenvolvimentu agroflorestál. nune’e ita bele halo modelu polítika dezenvolvimentu agroflorestál ne’ebé diak liu. Polítika dezenvolvimentu modelu agrofloretál ne’ebé Ministériu Agrikultura, Pekuária, Peska no Florestál aselera iha Timor-Leste ne’e hanaran kuda kahur. Katak bele kuda ai sira ne’ebé sei prodús iha tinan barak mak foin bele kolleta ka tesi, hanesan Ai Teka, Ai Mahoni, Ai Kameli, Ai Ná no Ai Saria, maibé iha ai sira ne’e nia okos bele kuda mós ai sira ne’ebé ninia produsaun menus husi tinan ida maka hanesan batar, Fore Rai, Fore Keli, Talas, Ai-Farina, inklui Kafé
Ministru MAPPF dehan programa ne’e bainhira realiza hetan apoiu husi Asian Forest Coorporation Organization (AFoCO) nia baze iha Korea ne’ebé akumula nasaun hamutuk 14 mak sai membru inklui Timor-Leste rasik. Programa ne’e realiza ho nia orsamentu mai husi Korea maibé téknikamente programa ne’e realiza husi diresaun jerál Florestál servisu hamutuk ho CIFOR nu’udar tékniku atu haree hamutuk ninia implemntasaun sira. Daudaun ne’e iha ona fatin Zona Klimatika neen, maka konsege implementa ona programa agroflorestál. Tolu iha parte Norte no tolu iha parte Súl. Tanba ne’e liu workshop diálogu polítika modelu agroflorestál ho baze restorasaun rai iha Timor-Leste, atu iha diskusaun klean hodi nune’e bele sai baze ida atu bele deside ho lolos tuir zona klimátika ne’ebé iha.
Iha fatin hanesan, Señior Scientist CIFOR, Himlal Baral konsidera katak objetivu husi kooperasaun ne’ebé CIFOR halo ho governu Timor-Leste iha area agrofloresta liu husi Ministériu Agrikultura ne’e atu atinje mehi hodi dezenvolve setór agrikultura. CIFOR hakarak oferese metodu ida ne’ebé atu promove Ai ida ne’ebe bele fó benefisiu ida apropriadu tuir Ministériu Agrikultura nia hakarak. Tanba ne’e liu husi esperiénsia ne’ebé CIFOR hetan ona iha fatin barak iha mundu hakarak atu aplika mós iha illa Timor ho zona klimátika neen ne’ebé iha, atu nune’e kada zona bele hetan aplikasaun ba programa modelu agrofloresta modernu.
Ne’e duni sira sei utiliza zona neen ne’ebé iha hodi implementa polítika dezenvolvimentu agrofloresta ne’e rasik atu haree ninia rezultadu bainhira iha ona sira sei halo rekomendasaun atu bele uza iha espasu sira ne’ebé klot atu hetan produsaun ne’ebé boot liu.
