Covalima- Prezidente Autoridade Munisipal Covalima liu husi Agrikultura Munisípiu Covalima servisu hamutuk ho Ministério Agrikultura Pecuária Pesca no Floresta (MAPPF) liu husi Diresaun Nasionál Agrikultura Hortikultura e Protesaun Plantas kolleta hare 200 Hektares ho variedade Nakroma ne’ebé utiliza adubus orgániku Pop Nassa Super Nassa no harmonik ba primeiru époka. serimónia kolleta hare ne’e ofisialmente kolleta husi Secretário Estado Desenvolvimento Local, Mateus Wilfrides dos Santos Tallo nomós Ministru MAPPF Marcos “Mameta” da Cruz iha loron Sesta (07/06/24) iha Suku Raimea Postu Administrativu Zumalai.
Iha entrevista, Ministru MAPPF Marcos “Mameta” da Cruz hatete, objetivu husi atividade ne’e, mak atu kolleta hare iha rai Oebaba ne’ebé iha tinan 2016 MAPPF halo ona irrigasaun bo’ot, ne’ebé tau naran Kay Rala Xanana Gusmão, irrigasaun ne’e kobre área 2261 hektares, maibé to’o agora ita seidauk funsiona hotu irrigasaun ne’e, tanba natar na’in sira seidauk halo natar, no kanál mós seidauk halo to’o rohan, maibé to’o ona 600 ektare mak oras ne’e dadauk natar na’in sira halo.
Nia informa, iha fatin ida ne’e ita hare katak iha Produsaun hare ne’e di’ak, tanba ne’e ita sei buka atu hadia di’ak liu tán irrigasaun ne’e atu bele funsiona di’ak liu tan hodi bele ajuda ita-nia povu iha ne’e atu bele aumenta produsaun ba hare iha rai laran. MAPPF mós laos hare de’it ba natar, maibé hare mós ba animal no ikan, maibé ita hare iha área ne’e mós ema barak la halo natar, tanba sira tauk ba animal hodi tama fali ba sira nia natar, entaun sira tenki halo lutu, tanba ne’e mak sira sente todan oituan ba sira, maibé ba oin ita sei servisu hamutuk ho MAE ho ninian estrutura husi Aldeia Suku Postu hodi ita bele hare oinsá mak sosializa regulamentu ida kona-ba movimentasaun animal ne’e, atu nune’e karau na’in sira bele kuidadu sira nia animal, nune’e labele estraga fali natar sira ne’e.
Iha fatin hanesan, SEDL Mateus Wilfrides dos Santos Tallo hatete, parte Ministériu Administrasaun Estatal (MAE) liu husi SEDL servisu hamutuk ho MAPPF oinsá atu identifika komunidade ou natar na’in sira ne’ebé mak liga ho sira-nia preokupasaun sira kona-ba Kanál irrigasaun, iha ne’e mós poténsia bo’ot ba komunidade sira tanba rai ne’e poténsia bo’ot tebes, oinsá mak komunidade sira bele hasa’e produsaun iha rai laran.
Nia hatete, SEDL mós liu husi PNDS orienta ona tékniku, tuir komunidade sira nia ejizénsia atu halo intervensaun ba irrigasaun kanál tersier, ekipa husi Nasionál mós mai halo ona levantamentu, espera katak iha tinan ida ne’e orsamentu adisionál ba PNDS bele implementa ona iha kanál Irrigasaun tersier, Nia hatutan ba oin MAE iha ona faze deskonsentralizasaun territoriál, delegasaun servisu lubuk ida mak haruka ona mai Munisípiu ligadu ho servisu sira ne’e, akordu interministeriál mós iha atu nune’e depois ita koopera hodi servisu hamutuk iha Ministério ne’ebé mak relevante, liu-liu liga ba iha ita-nia polítika ou setór ekonomia, agrikultura importante tebes hodi nune’e bele kompleta malu tuir programa nonu Governu nian.
Nune’e mós xefe Suku Mape, Francisco Pereira, hakarak lori povu Oebaba laran tomak orgullu boot ba Ministru MAPPF no SEDL ne’ebé mak mai hamutuk hodi halo kolleta hare iha fatin ida ne’e tanba ne’e husu atu atividade sira hanesan ne’e tenki halo bebeik nune’e bele motiva joven no komunidade sira bele halo natar karik halo ho diak, atu nune’e ita labele simu hela de’it hahan husi rai liur. Nia mós informa ba MAPPF katak, dalaruma tékniku mak la dun diak ba sira, Governu bele fasilita solar ba sira hodi fila rai maibe mai tarde entaun komunidade balun ne’ebé osan la iha atu sosa mina entaun sira la halo natar refere, aimoruk kona-ba hare buras komunidade sira asesu ona maibe pestesida atu hamate peste mak komunidade sira seidauk hetan, dalaruma peste ne’e halo to’o komunidade balu la konsege kolleta hare tanba hetan estragus hotu husi peste, tanba ne’e ba oin sira husu atu MAPPF fo mós apoiu aimoruk ba sira atu oho peste ne’ebé mak iha. DMEA
