Liquica- Ministério Agricultura Pecuaria Pesca e Floresta (MAPPF) liu husi Diresaun Servisu Agrikultura Municipal Liquiça hamutuk ho Agrikultór sira kolleta hare ektare 130 ne’ebé utiliza adubus organiku poc nasa, Super Nassa no Harmonik ba epoka dahuluk nian hodi hasa’e produsaun hare, fini ne’ebé agrikultór sira kuda ne’e fini komersial. Atividade kolleta hare ne’e hala’o iha loron Quinta (04/07) iha Suku Lisadila Posto Administrativo Maubara.
Ministru MAPPF Marcos “Mameta” da Cruz esplika, Iha suku lisadila tempu uluk povu ladun kuda hare, maíbé tinan ida ne’e sira komesa halo natar hodi produz hare. Ministério mai kolleta hare no agikultór sira mós hato’o sira-nia problema barak, tanba ne’e Ministério sei haree oinsa atu fasilita agrikutór sira.
Ministru informa, Totál área natar iha lisadila 1800 ektares, maíbé agrikultór sira foin kuda 400 etares, tanba ne’e ita mai kolleta hare iha fatin ida ne’e atu bele haree diretamente situasaun, karik saída mak povu sira presiza atu kontribui hodi bele hasa’e produsaun hare iha rai laran.Tanba Polítika Ministério nian mak atu aumenta produsaun hare, tanba Ministério buka atu fasilita agrikultór sira ho infraestrutura bázika mak irrigasaun. “Tékniku MAPPF mak tenki kuda hare tuir liña, ida-idak tenki halo viveirus nomos tenki hamo’os du’ut, tau uza adubu ne’ebé Ministério promove, hanesan Poc Nassa no Super Nassa, ita hakarak ba oin ita bele utiliza nafatin, ita mos presiza fo formasaun ka treinamentu ba agrikultór sira kona-ba oinsá produz pestisida orgániku husi ai tahan sira atu bele hamate peste sira,no polítikamente ita sei fasilita agrikultór atu bele produz hare barak inklui mós fo fasilidade hanesan tratór ba agrikultór sira.” Realsa Ministru MAPPF
Iha fatin hanesan Diretór Servisu Agrikultura Municipal Liquiça, José Pereira de Jesus informa, Inísiu dadus ba area natar total 1866 etares, maibé tanba hetan estragus husi mota 160 ektares, entaun agora dadauk hela de’it 1.703 etares, no agora daudaun área kultiva 400. Rai mamuk barak mos sei abandona hela tanba dezafiu barak mak agrikultór sira enfrenta, liu-liu tratór sira avaria hotu, sira hetan apoiu ba tratór ne’e iha tinan 2008 to’o 2009, maibé at hotu ona seidauk iha manutensaun. Agora daudaun iha tratór ho unidade hitu mak halo ona manutensaun, at Ualu Servisu tau ona planu 2025 nian. “Ita destaka ona extensionista tékniku iha Suku sira, uluk extensionista sira konsentra de’it iha munisípiu, ne’e mak la efetivu kontrola no apoiu agrikultór sira, maibe iha fulan Marsu nia laran ita desloka ona estensionista sira ba suku ida-idak atu bele fo apoiu ba agrikultór sira.” Katak José
Nune’e mos Xefe Asosiaun Produsaun Fini Commercial iha Munisípiu Liquiça, Artur de Fátima hatete, durante ne’e Asosiasaun produz fini mak aloka ba iha MAPPF, kada tinan sira produz porvolta tonelada hitu to’o Ualu tanba iha Timor laran tomak existe assosiaun kuaze hitu nulu resin. Maibé problema ne’ebé asosiasaun sira hasoru mak irrigasaun, neduni MAPPF tenki tau importánsia ba irrigasaun tuir fali tenki tau tratór ne’ebé sufisiente, tanba trator avaria hotu presiza halo manutensaun, atu produs fini presiza tebes tratór no be’e ne’ebe mak sufisiente. Nia mos husu ba Governu liu husi MAPPF atu bele apoiu orsamentu ruma hodi bele hadia mos uma rai fini. Ekipa DMEA
