Oecusse, 13 Janeiru 2025 - Ministru Agrikultura, Pekuária, Peska no Floresta (MAPPF), Eng. Marcos"MAMETA" da Cruz MAgSt entrega ekipa agrikola modernu hamutuk unidade 131 ba grupu agrikultór husi programa SAPIP hamutuk 110 iha Rejiaun Administativu Espesiál Oecusse Ambenu (RAEOA) hodi apoiu atividade agrikultura atu bele hasa'e produsaun iha rai laran.
Ekipamentu agrikola modernu ho unidade 131 ne'ebé entrega ba Prezidenti Autoridadade Rejiaun Oecusse ne'e kompostu husu tractor liman unidade 27, Inkubatór unidade 24, Pelet 21 no Kompost unidade 69.
Ministru Agrikultura, Pekuária, Peska no Floresta (MAPPF), Eng. Marcos"MAMETA" hatete, governu Liu husi Ministériu Agrikultura kontinua apoiu nafatin ekipamentu ba grupu agrikultór sira iha Oecusse bele hetan hotu oportunidade hodi hasa'e produsaun iha to'os ho natar. "Ha'u hakarak hatete ekipamentu modernu ne'ebé Ita apoiu ne'e mai husi programa SAPIP ne'ebé ho ninia osan mai husi banku mundiál. Ekipamentu sira ne'e Ita distribuí ba Munisípiu sira ne'ebé iha potensia boot ba natar atu agrikultór sira bele hasa'e produsaun di'ak liu-tan". Dehan Ministru Marcos iha edifísiu Ministériu Agrikultura RAEOA, Segunda feira ne´e.
Ministru hatutan, ekipamentu modernu ne'ebé Ministériu apoiu ne'e nu'udar meius Ida hodi ajuda fasilita servisu agrikultór sira nian iha to'os ho natar laran. Tanba durante ne'e agrikultór uza de'it Mak aliñamentu tradisionál hanesan katana, ai-suak, ensada no karau hodi servisu iha natar, maibé ho apoiu ekipamentu sira ne'e sei redúz oras servisu ba agrikultór sira. Tanba ne'e Ministru husu ba agrikultór sira ne'ebé hetan apoiu ekipamentu sira ne'e atu utiliza ekipamentu sira ne'e ho responsabilidade nune'e ekipamentu sira ne'e bele iha nafatin kondisaun di'ak atu bele prodúz ai-han barak liu-tan.
Joana Bobotanu hanesan membru grupu Usibeneno husi rejiaun Oesilo, senti kontenti no agradese tanba bele hetan apoiu ekipamentu modernu husi programa SAPIP liu-husi Ministério ne’e apoiu no fasilita tebes grupu sira-nia atividade no reduz oras servisu iha kampu.
Partisipa iha serimónia entrega ekipamentu ne'e hetan partisipasun husi Sekretáriu Estadu Floresta, Diretór Jerál Agrikultura, Diretór Jerál Peskas, Diretór Nasionál extensaun, Diretór Nasionál Rekursu Umanu, Diretór Nasionál Peskiza e Estatistika, xefe SAPIP, Funsionáriu MAPPF, nomós grupu agrikultór sira.
