Dili, 27/1/2025. Ministério Agrikultura Pekuaria Peska no Floresta liu husi Diresaun Nasionál Extensaun ne’ebé mak durante ne’e hetan apoiu maximu hosi ajensia TOMAK hahú halo validasaun ba Manúal Extensaun Agríkola Timor-Leste nomós distribuisaun uniforme Extensionista sira nian ba Diretór Servisu Agrikultura Municipal 12 inklui RAEOA.
Ministru Agrikultura Pecuária Peska no floresta, Marcos “MAMETA” Da Cruz hatete, validasaun manual no simbolikamente entrega ba diretór Servisu Agrikultura Municipal sira inklui REAOA tanba manual ne’e inportante tebes ba dezenvolvimentu setór agríkultura ,pekuária, peskas no floresta, iha manual ne’e hakerek oinsa mak bele aplika Sistema Pratíka Agrikultura Diak (PAD) nune’e ba oin bele hasa’e produsaun, maibé iha serímonia ne’e mós distribui uniforme extensionista sira tanba sira hanesan tékniku ne’ebé mak treinadu iha kampu hodi implementa no trasnforma Sistema Pratíka Agrikultura Diak ba agrikultór sira atu bele produs barak liu tan.
Uniforme ne’ebé entrega ba extensionista sira ne’e atu bele uja ka hatais iha kampu nune’e ema hotu bele kuiñese no hatene atu nune’e ba oin agrikultór sira presiza tékniku bele konfirma ho extensionista sira kona-ba oinsa kua hare, kuda modo no protesaun ba plantas sira . Ba oin diretór servisu Agrikultura Municipal sira sei halo sosializasaun manual ne’e to’o iha baze nune’e agrikultór sira bele komprende tanba ba oin oinsa mak bele iha eforsu no kolaborasaun institusional entre MAPPF no MAE nune’e servisu iha baze bele lao efetivu no efikas hosi aumenta produsaun. Tenik Ministru
Ministru hatutan, Manual ne’e seidauk diak maibé inportante tenki lao no komesa depois mak hadia maibé ba oin tenki iha manual ne’ebé mak espesifíku ba iha produtu idak-idak hanesan, kuda hare, batar, hakiak fahi no manu inklui manual kuda modo nian nune’e Ministériu bele distirbui ba agrikultór sira atu bele halo tuir.
Iha fatin hanesan, Diretór Gerál Agrikultura café e Plantas Industria Martino Laurentinho Soares esplika, validasaun Manual Extensaun Agrikola no distribuisaun uniforme extensionista sira ba diretór servisu agrikultura municipal sira hanesan mós reativa kooperasaun servisu liu-liu servisu extensaun munisípiu sira presiza hadia atu nune’e ba oin servisu Ministério ho servisu agrikultura municipal lao diak liu tan.
Nia hatutan, koalia kona-ba ai-han hanesan kestaun boot relasiona ho inportasaun ne’ebé boot tebes tanba ne’e duni Ministério Agrikultura halo validasaun ba manual ne’e atu nune’e ba oin bele hasa’e produsaun tuir manual ne’ebé mak iha tanba tékniku agrikultura hanesan Sistema Pratíka Agrikultura Diak (PAD) hakerek ona iha manual nia laran ne’eduni atu gia extensionista no parseiru sira ne’ebé mak implementa atividade agrikultura, pekuára peskas no floresta labele ses liu husi manual refere.
Orsamentu ne’ebé mak sosa uniforme Extensionista ne’e OGE MAPPF 2024 nian. Alende Iha serimónia validasaun no distribuisaun ne’e, DNEAF realiza mós ekontru Forum anuál SEA ba Progresu no Dezafiu 2024 no planu ezekusaun 2025 hamutuk ho diretór Servisu Agrikultura Municipal 12 inklui RAEOA. Ekipa DMEA
