Dili-20/02/25 Ministério Agrikultura Pecuária Peska no Floresta liu husi programa Sustainble Agrikulture Pruductivity Improvement Project (SAPIP) distribui motorizada unidade 30 no Radio Telekomunikasaun unidade 30 ba Guarda Floresta nomos xefe delegasaun territorial sira atu bele hala’o servisu iha baze. Atividade ne’e realiza iha Resintu MAPPF Comoro.
Iha entrevista Ministro MAPPF Marcos “Mameta” da Cruz esplika, ohin (rad) Quarta entrega motorizada 30 no Radio Telekomunikasaun 30 ba guarda Floresta nomós xefe delegasaun territorial Floresta. iha Munisípiu hotu-hotu tanba Ministériu iha delegasaun territorial Floresta nomós guarda Floresta, Ministériu liu husi SAPIP implementa atividade ne’e iha Basias Hidrografika iha fatin ha’at. Iha Oecusse mak mota Tono, Iha Lautem mak Mota Raumoco iha Covalima naran Be lulik nomós Ainaro.
Nia hatutan, motorizada hirak ne’e ita destribui ba fatin ha’at ne’e no mos ba delegasaun territorial sira ho nia objetivu atu fasilita servisu, nune’e ba guarda Floresta sira bele lao sai tama ai-laran hodi kontrola atu ema labele tesi ai arbiru, ba xefe delegasaun territorial atu sira bele ba esplika no halo programa estensaun hodi esplika ba povu konaba impórtansia ai-laran ba povu hodi husu mós povu nia responsabilidade atu hamutuk ho Governu, katak ita hotu hamutuk atu kuidadu aihoris ka ai-laran sira hodi kontribui no kuda fila fali ba iha fatin sira ne’ebé la iha ka la moris.
Nia akresenta, Ministériu iha rai ne’ebé ita klasifika ona ba iha área protejida sira tanba área protejida balu iha ai-laran iha Lospalos hanesa Parke Nasionál Nino koni Santana, iha kablake ne’e define ona katak sei sai Parke Nasionál, tanba ne’e fatin sira ne’e presiza atu proteje nune’e ema labele estraga. Orsamentu ne’ebé sosa Motorizada no Radio Telekomunikasaun hamutuk $. 82 mill husi Banku Mundial liu husi Programa SAPIP.
Iha fatin hanesan Sekretário Estadu Floresta, Fernandino Vieira da Costa hatete, espera liu husi programa SAPIP ajuda tebes parte Governu nian liu-liu iha Dirasaun Geral Floresta hodi nune’e bele fasilita korpu guarda Floresta ninia servisu iha terenu. Durante ne’e MAPPF liu-liu iha Sekretario Estadu Floresta sei falta ekipamentu ba guarda Floresta, tanba ne’e ho apoiu ne’ebé hetan husi programa SAPIP ne’e hanesan grasa ida no ita agradese tebes. “ Ohin ita halo lansamentu hodi entrega ekipamentus sira ne’ebe mak durante ne’e sai hanesan preokupasaun bo’ot ba iha MAPPF liu-liu iha Dirasaun Geral Floresta ita iha korpu guarda Floresta, ita falta tebes fasilidade ho ekipamentu hodi apoiu korpu Guarda Floresta sira iha terenu. Ho ekipamentus sira ne’ebé iha bele asegura Rekursu Naturais ne’ebé mak konsagra ona iha Konstituisaun RDTL mak alinea ho Governu ne’ebé mak iha. ha’u husu atu Fasilidade ne’ebé mak iha uza ho didiak uza ho efetivu uza ho konsiensia atu bele fasilita servisu ba iha tempu naruk”. Tenik SEF
Nune’e mós Guarda Floresta Munisípiu Ermera, Carlos Martins Soares senti nia kontente ba apoiu hirak ne’ebé mak sira hetan, bele ajuda ona sira nia servisu iha terenu.
Entretantu ekipamentu hirak ne’e ofisialmente entrega husi Ministro MAPPF akompaña husi SEF, Diretór Geral Diretór Nasionál, Programa Manajer SAPIP no Guarda Floresta sira.
