Dili- Secretaria estadu Igualidade (SEI), Elvina Sousa Carvalho hasoru malu ho Ministru Agrikultura Pekuária Peska no Floresta (MAPPF) Marcos “Mameta” da Cruz hodi koalia konaba envolvimentu jéneru feto no mane iha área Agrikultura. Atividade ne’e realiza iha loron Tersa (28/01) iha Salaun Uma Adat Comoro.
Ministru MAPPF esplika, SEI mai iha Ministério ne’e atu koalia konaba oinsa mak haree ba envolvimentu feto no mane iha servisu sira ne’ebé relasiona ho Agrikultura, Pekuaria, Peska no Floresta. Agrikultura iha Timor 70% kategoria ba iha Agrikultór, servisu iha área agrikultura ne’e iha servisu balu ne’ebé mak todan mane mak halo maibé iha servisu balu mós feto mak halo. ezemplu kuandu halo servisu iha natar iha preparasaun rai halai natar no halo kabubu ke’e rai sira ne’e mane mak halo, maibe depois de kuda hare iha tempu hamos du’ut no koa hare ne’e, barak liu mak feto, hakiak ikan nune’e mós hakiak animál. “Ami mós koalia konaba hetan benefisiu husi servisu hanesan kapasitasaun, iha feto barak mak hetan kapasitasaun iha área akikultura hanesan kuda budu tasi iha Ataúro feto barak mak envolve, formasaun ba joven sira iha Israel mós envolve feto barak, agrikultór sira ne’ebé kuda modo barak mak feto, ne’e duni ita la’os koalia dehan feto de’it, maibé buat ne’e igulidade jéneru hakarak atu promove oinsá mak bele kapasita, enkoraja no enpodera feto atu bele iha kbi’it hodi bele envolve diak liu iha dezenvolvimentu Nasaun nian.” Tenik Ministru MAPPF
Nia akresenta, iha MAPPF kargu Xefia totál 181 iha mós feto 27 mak tur iha pozisaun sira, balu hanesan Diretora Jerál, balu hanesan Diretora Nasionál no barak mak Xefe Departamentu, ita mós buka oinsa atu fo oportunidade ba feto hodi ezerse sira-nia matenek, tanba feto barak mak matenek no iha konñesementu, balu iha área Finansas, Veterinaria iha área Pekuaria, ne’eduni iha ne’e iha feto tékniku katak sira hatene saída mak sira atu halo iha setór ida-idak.
Iha fatin hanesan SEI Elvina Sousa Carvalho informa, nia prezensa iha MinistériuAgrikultura ne’e mak atu koalia konaba orsamentu sensivel ba Jéneru no komprimisíu Jéneru sira ne’ebé mak MAPPF adopta. Ezemplu MAPPF rasik nu’udar implementadór ba deklarasaun Maubisse no mós rekomendasaun husi konvensaun konaba Eleminasaun husi Forma hotu deskriminasaun kontra feto konkluidu. “Husi ami-nia observasaun hatudu katak MAPPF iha sensivel duni ba iha komprimisiu jéneru sira liu-liu ba iha deklrasaun Maubisse tanba ne’e mak iha orsamentu Jerál do Estadu Ministériu nian tau mós balun ba iha implementasaun deklarasaun Maubisse. Kuandu ida ne’e ita 1.7% ida ne’e atu hatete katak pasu ida ne’ebe mak diak tebes. SEI mai mós atu bele sensibiliza konaba ajenda seluk mak “dehan lae ba Asediu sexual” iha servisu fatin nomós ba promosaun Igualidade Jéneru iha Ministériu .” Katak Elvina
Nia hateten, MAPPF hanesan Ministériu tékniku ne’e importante tebes tanba hanesan savi ba komprimisíu Jéneru sira. SEI fiar katak ho prezensa iha ne’e atu bele mós hametin liu tan servisu hamutuk entre MAPPF ho SEI nomós atu insentifika investimentu ba iha komprimisíu jéneru hodi bele kontribui ba iha reduz desigualidade.
Entretantu enkontru ne’e ofisialmente loke husi Ministru MAPPF, akompaña mós husi Sekretariu Estadu Pekuaria ,Sekretariu Estadu Peska no Dirijente nomós staf sira husi MAPPF.Ekipa DMEA
