Dili-11/02/25 Ajensia Internasionál Food and Agriculture Organization (FAO) apoiu tablet ho unidade 450 ba Ministério Agrikultura Pecuaria Pesca no Floresta (MAPPF) atu bele fasilita tékniku sira hanesan; Estensionista, Peskizadór, ALGIS no pesoál Planeamentu nune’e bele halo servisu iha baze. Serimónia ne’e realiza iha Salaun MAPPF Comoro.
Secretario Estadu Pescas (SEP) hanesan reprezenta Ministro ba iha Serimonia ne’e Domingos da Conceiçao dos Santos ‘Mau-caro’ esplika, Ohin (rad) Tersa, Ministério simu tablet unidade 450 husi FAO ne’ebé mak atu distribui ba estensionista iha Munisípiu sira depoiz distribui ba estensionista sira, Diresaun Nasionál Estensaun Formasaun Agrikola (DNEFA) sei fo mós formasaun ba Estensionista sira oinsa mak atu utiliza iha tempu tuir mai. “Ohin ha’u hanesan reprezenta Ministru hodi simu tablet ne’e, sente kontente no orgullu tanba ne’e hanesan pasu pozitivu ida husi Ajensia Internasionál FAO bele kontribui hodi mellora prosesu atualizasaun baze dedadus iha terenu. Hanesan reprezenta Ministru hakarak hato’o agradese ba Parseria FAO tanba sira bele kontribui buat balu ona atu mellora diak liu tan mekanizmu aktualizasaun baze dedadus hahú husi nivel Nasionál ba iha baze atu bele fasilita diak liu tan iha Sistema foun ida ne’e”. katak SEP
Nia realsa, dadaun ne’e mundu tama ona era dijitalizasaun maibé dalaruma levantamentu dedadus tékniku sira lakon tempu barak liu iha kampu, ho tablet ne’ebé mak hetan bele fasilita ona Ministério iha informasaun sira iha baze dedadus nian, atu bele define lolos potensia sira iha Suku nian no parte estensionista sira iha ba, atu nune’e bele fo informasaun ida ne’ebe mak akuradu no diak nune’e politiku sira bele foti desizaun ne’ebe mak los bazeia ba dadus ne’ebé iha.
Nia mós fo korajen no motiva estensionista sira maske hasoru problema oioin hanesan menus ekipamentu ba levantamentu dadus nian, ekipamentu ba transporte, maibe nafatin sai hanesan ema ne’ebé formadu iha área propriu tenki fo nafatin asistensia tékniku ba to’os na’in sira.
Iha fatin hanesan Reprezentante FAO ba Nasaun Indonesia no Timor Leste Rajendra Aryal hatutan, Seguransa ai-han ne’e importante tebes ba nasaun ida ne’e, entaun FAO iha ne’e tanba hakarak apoiu governu ne’e hodi tau matan no buka solusaun hamutuk hodi mellora situasaun seguransa Ai-han iha rai laran. “Informasaun sai fatór importante iha prosesu servisu nomós atu haree konaba seguransa Alimentar liga ho informasaun iha era ida ikus ne’e, dala barak ita rona dijitalizasaun ba Sistema Agrikultura, tanba ne’e dijitalizasaun iha área agrikultura ne’e importante atu bele fasilita no rekolla hodi fahe informasaun sira. Seremonia ida ohin ne’e ita fahe tablet hanesan parte ida ida hodi apoiu Ministeriu ne’e hodi digitaliza ita nia servisu Agrikola, tablet sira ne’e sei tulun Estensionista sira bele rekolla informasaun lalais liu no haruka mai iha Governu Sentral bele uza iha desizaun sira.’’ Katak Rajendra
Nia informa, ho situasaun mudansa klimatíka ne’ebé barak liu fo impaktu negativu tebtebes ba ita hotu nia servisu, ho tablet sira ne’e ita espera estensionista sira bele fo informasaun fatual no atuál ne’ebé bele suporta governu Central atu bele atualiza situasaun lorloron nian, atu ita-nia desizaun no servisu sira bazeia ba informasaun ne’ebé kredivel no refleta duni situasaun faktu ne’ebé mak komunidade sira hasoru.
Totál tablet 450 ne’ebe sei fahe ba estensionista hotu-hotu nomós diresaun sira ne’ebé mak sei fo apoiu ba servisu estensaun nian, totál orsamentu ba sosa tablet ne’e dollar Amerikanu 110 mill, orsamentu ne’e doasaun husi Green Climate Fund ne’ebé mak FAO hetan atraves husi Nasoens Unidas.
Entretantu seremónia ne’e partisipa husi SEP, Reprezentante FAO Indonesia no Timor-Leste, Diretór Geral, Diretór Nasionál nomós Diretór Servisu Agrikultura Municipal sira. Ekipa DMEA
