Dili, 09 Janeiru 2024- Ministru Agrikultura, Pekuaria, Peska no Floresta (MAPPF), Eng. Marcos" MAMETA" da Cruz MAgSt hamutuk ho Prezidente Komisaun Funsaun Publiku (KFP), Agostinho Letencio de Deus, fó posse ba kargu Xefia foun hamutuk na'in 47 iha Ministériu Agrikultural, Pekuária, Peska no Floresta (MAPPF) atu kontinua servisu hodi hasa'e produsaun iha rai laran.
Ministru Agrikultura, Pekuaria, Peska no Floresta (MAPPF), Marcos da Cruz hateten, Komisaun Funsaun Publiku (KFP) servisu hamutuk ho MAPPF durante tinan ida resin iha mandatu IX Governu konstitusionál, ne'ebé konsege realiza atividade tomada de posse ne'e, Tamba iha koordenasaun ne'ebé di'ak. No pose ida ne'e konsidera akontese dala tolu ona. " Hanesan Ita hotu hatene katak kargu xefia iha Ministériu Agrikultura, Pekuária, Peska no Floresta ne'e hamutuk 181. iha balun ita muda husi diretór ida ba fali Diretór seluk, iha mós balun antes ne'e la asume kargu maibé agora ita fó fiar no balun mantein nafatin sira nia kargu". Dehan Ministru Marcos liu husi serimónia tomada de pose ba kargu xefia ne'ebé realiza iha salaun uma adat MAPPF Comoro.
Nia dehan husi totál kargu xefia hamutuk 181 ne'ebé eziste iha Ministériu Agrikultura nia laran ne'e, iha kargu ne'ebé mantein hamutuk 134 no kargu foun ne'ebé hetan pose hamutuk 47. Husi 181 kargu xefia ne'e kompostu feto iha na'in 37 pesoa ekivalente 20.4% no mane na'in 104 pesoa ekivalente 79.5%. Tuir Ministru Marcos katak nomeasaun ne'e konsidera nakloke. Signifika haree husi parte rekursu umanu iha MAPPF rasik kontinua respeita nafatin igualidade jéneru.
Ministru Marcos husu ba kargu xefia sira hamutuk na'in 47 ne'ebe simu ona pose atu iha komitmentu hodi hatudu vontade atu servisu. Tanba kargu ne'ebé governu liu husu Ministériu atribui ne'e, la loos oportunidade maibé tenke konsidera nu'udar responsabilidade atu nune'e bele lori susesu ida di'ak liu-tan ba iha Ministériu Ida ne'e "Ha'u hakarak dehan bainhira ita boot sira prontu ona asume kargu ida, tenke iha komitmentu katak, ami mak ne'e, prontu atu servisu iha loron manas la'os servisu iha kantór laran de'it". Tenika Ministru
Nune'e iha fatin hanesan, Prezidente (KFP) Agostinho Leotencio de Deus hateten, iha tinan ida ne'e husi inisia hetan tomada de posse ba Diretóres no Xefia iha MAPPF katak hahú prontu atu bele servisu hodi hasa'e produsaun iha rai laran. "Ita hare'e iventu importante tebes dahuluk sesaun ne'e no ita bo'ot sira hatudu ba publiku katak ami mak ne'e, iha kompromete ohin ita boot termu tomada de posse atu bele leal ba konstituisaun". Nia dehan
Tomada de posse ba Diretóres no Xefia sira ne'e hahú kanta ho hinu nasionál patria-patria atu hatudu katak eventu ida ne'e ho selebrasaun ho altu no formal. Tanbá aktus sira ne'ebé halo ne'e tenke konstituisional, entaun tenke leal ba governu ida ne'e, liu-liu ba Ministériu Agrikultura , Pekuaria, Peska no Floresta (MAPPF) no kumpre Saida maka superiór sira orienta. Nu'udar prezidente KFP kontinua tau nafatin korazen ba ita boot Sira duarnte atu servisu hamutuk ho Ministru inklui Sekretáriu Estadu na'in tolu hodi nune'e bele responde no rezolve dezafiu no difikuldade ne'ebé Ministériu ne'e iha, relasiona ho oinsá mak bele hasa'e produsaun di'ak no barak liu-tan tan iha setór importante haat ne'e.
Serimónia tomada de pose ba kargu xefia foun na'an 47 ne'e heran akompañamentu husi Sekretáriu Estadu Peska, Sekretáriu Estadu Pekuária, Sekretáriu Estadu Floresta, Komisariu Komisaun Funsaun Públiku, Diretór Jerál Agrikulultura Kafe Plantas no Indústria, Inspetór Jerál inklui Funisonáriu sira.
