Oeccuse, 13 Janeiru 2025 - Ministériu Agrikultura, Pekuária, Peska no Floresta (MAPPF),liu husi Sekrétario Estadu Floresta (SEF) komemora loron Nasionál Ai-Kameli ba dala Ualu ho tema “ Ho Espiritu Komemorasaun Kuda Ai-Kameli no Floresta Nasionál Ita Habelar no Hatamak Timor-Leste” ai -kameli hun rihun rua ne’ebé mak kuda iha Bairo Panamtasa, suku Sunu-ufe, postu administrativu Nitibe RAEOA.
Ministru Agrikultura, Pekuária, Peska no Floresta (MAPPF), Marcos"MAMETA" da Cruz MAgSt konsidera katak, ai-Kameli ne'e importante ba nasaun no importante mós iha aspetu oi-oin hanesan kultura sosiál, turizmu no ekonomia. Timor-Leste bele kontinua dezenvolve ho di'ak liu-tan atu ai-kameli sira ne'e bele sai nu'udar identidade Timor nian no riku soin povu no nasaun inklui Estadu nian. "Ita presiza dezenvolve di'ak liu-tan riku soin nasaun, estadu no povu nian ne'e atu iha futuru bele fó mós reseita ne'ebé di'ak ba ita- nia rain Timor-Leste nune'e bele hasa'e mós rendimentu hodi hadi'a povu nia moris, ne’eduni Ministru Husu ba povu iha Oecuse atu kontinua proteze no dezenvolve barak liu-tan ai-Kameli ne'e hodi kontinua kuda iha foho lolon sira ne'ebé sai poténsia atu nune'e bele hasa'e rendimentu ba nasaun no proteze mós degradasaun rai ne'ebé halai".dehan Ministru depois remata serimonia kuda ai-Kameli iha postu administrativu Nitibe Oecuse foin lalais ne'e
Tuir Ministru katak, ai-Kameli ne'e parte ida husi dezenvolviementu turizmu. Tanbá husi ai-Cameli nia morin sei bele atrai mós ema barak atu Mai vizita Timor ho nune'e maka sei hatama reseita ba estadu. Ne'e duni ai-Kameli rikeza Floresta sei fó benefisiu boot ba nasaun no povu TL bainhira dezenvolve ho di'ak. Espera katak ho komemorasaun loron nasionál ai-Kameli iha Oecuse ne'e sei fó biban ba komunidade no populasaun sira atu badinas kuda ai-Kameli.
Iha fatin hanesan Prezidente Autoridade RAEOA, Rogério Tiago Fatima Lobato hatete, Governu Rejionál odamatan nakloke atu halo kooperasaun ho Governu sentrál di'ak, husi RAEOA hodi aprende esperiensia esforsu servisu sira ne'e. Iha RAEOA fó rai no naturalmente apoiu finanseiru tanbá ai-kameli sai hanesan indetidade Timor-Leste, Portuges sira tama iha Lifau tanba ida ne'e eziste rai Timor Leste independente.
Portuges tama hahú husi Oe-kussi sai hanesan inter postu ida komersilizasaun ai -sandalo hanesan tempu portuges mai sosa iha ne'e hodi lori ba rai liur. esforsu ne'ebé husi MAPPF liu husi Sekretariu Estadu Floresta halo ne'e, RAEOA sei fó apoiu ho buat ne'ebé konkretu iha tinan 2025. RAEOA sei aloka orsamentu hodi apoiu Sekretáriu Estadu Floresta nia programa. Nune'e hodi halo sentru viveirus ba ai -kameli nia musan hodi kuda fali iha rai ne'ebé iha ona. "Ha'u nia ideia mak atu la'o dalan naruk komesa ho espasu ki’ik oan. Maibé sente katak iha tempu sei sai bo'ot lori benefisiu ba RAEOA rasik, ha'u husu ba Ministeriu Agrikultura, Pekuaria, Peska no Floresta (MAPPF) atu bele hare'e to'ok lei ne'e oinsá ema ida kuda ai-kameli ida iha Oe-kussi hodi sai na'in ba ai kameli ne'e". Ho area ida ne'e nia luan ektare 5 no ita prepara ai kameli oan hamutuk 5.550 hodi kuda ba área 5 ektare refere iha tinan 2025.
Serimónia kuda ai-Kameli ne'e hetan partisipasaun husi Ministru Defeza, Vice Ministru Obras Publiku, Sekretáriu Estadu Pekuária, ajénsia dezenvolvimentu AFoCO no parseiru dezenvolvimentu sira seluk, Diretór Jerál Floresta, Diretór Jerál Peskas, Diretór jerál Agrikultura Café e Plantas Indústria, Diretór Nasional Rekursu Umanu, Diretór Nasionál Estensaun, Diretór Nasionál Peskiza e Estatiska no Lider komunitária sira, parte uma kreda, lian nain, funsionáriu no komunidade sira.
