Lautem, 20/12/2024, Ministério Agrikultura Pecuária Pesca e Floresta liu husi Secretário Estadu Floresta inagura edifisiu  ne’ebé mak sei sai mós sentru formasaun ba guarda Floresta atu bele fasilita guarda sira banhira halo formasaun inklui bele mós sai fatin servisu ba sira nune’e guarda Floresta  halo vijilansia no  atu  bele tau matan ba ai no animal fuik sira  iha ai laran, aumezmu tempu lansa mós atividade kuda ai -oan  iha Jardim Arboretum  Parke Nasiona Nino Konis Santana totál 29 aktare iha área Irakusalu suku Mehara Postu Administartivu Tutuala.

Vice Primeiru Ministru Assuntu Dezenvolvimentu Rurál, Mariano Assanami Sabino iha nia diskursu apresia ba servisu guarda Floresta sira tanba ho orsamentu ne’ebé mak ki’ik no ho fasilidade ne’ebé limitadu maibé ho funsaun ida ne’ebé mak inportante hodi kontinua konstrusaun estadu tanba iha kontrusaun estadu ba nasaun nian parte Floresta ne’e fatin subar no kuidadu gerileiru sira iha tempu funu nian ne’eduni iha parte konservasaun ne’e  hanesan luta ida hodi rekontrusaun fali nasaun.

Vice PM ne’e mós relasa, Ba oin tenke esforsu ba dezenvolvimentu setór agrikultura, pekuária no Floresta tanba funsionariu tékniku sira tenki hala’o servisu barak  ho estensionista  atu kontrola servisu iha kampu la’os  servisu barak liu fali iha kantor, tanba ne’e ohin loron inagura sentru Floresta ne’e atu bele fasilita guarda sira bele hafasil sira nune’e bele tau matan no kuida ai-laran tuan no animal fuik sira ne’e. “banhira ita respeita ia-laran no balada sira mak sei fo forsa ba ita ema tanba ne’e mak servisu guarda Floresta ne’e inportante tebes. Guarda Floresta la’os atu hatauk komunidade maibé guarda Floresta sira atu kuida no konserva fatin parke ida ne’e nune’e ba o in komunidade sira labele ta no estraga ai boot sira  ne’e maibé sira bele kuda ai oan sira seluk ne’ebé mak bele faan hodi hetan osan hanesan aifuan ka malus sira iha ai okos nune’e ba oin bele faan atu bele sustenta ekonomia familia nian”.

Iha fatin hanesan, Secretário Estadu  Floresta, Fernandino Viera da Costa iha nia entrevista katak, atividade inagura edifisiu ka sentru ba guarda floresta nian iha fatin Irakusalu  nune’e guarda sira nafatin atu funsionamentu servisu no halo jestaun ba Parke Nasionál Nino Konis Santana  aumezmu tempu mós kuda ai-aon  espesie ai native ka lokál  nune’e bao in bele konserva nian tanba ai balun mós kategoria ba medicina (aimoruk)  tanba fatin ne’e iha futuru sei sai fatin peskiza ba estudante sira  ne’ebé mak hakarak atu halo peskiza nomós sai fatin turizmu ba ema hotu.

SEP mós husu ba komunidade sira ne’ebé  mak iha Suku  to’o Munisípiu atu bele foti ai-oan sira iha sentru viveirus floresta nian atu bele kuda iha kintál no rai ne’e mak prepara tiha ona, ai hirak ne’e mk kuda iha jardim arboretum ne’e hamutuk espesies 12 , ai hirak ne’ebé mak kuda iha jardim ne’e sei halo lutu hodi halae’u nune’e ema labele estraga  iha futuru.

Entretantu Prezidenti Autoridade Lautem, Melio  De Jesus esplika, inagura sentru ba guarda floresta iha Parke nasionál nino Konis Santana ne’e inportante tanba bele fasilita guarda sira atu servisu diak liu tan iha área  Parke Nasionál  nian tanba Parke ne’e  iha ona prosesu atu tama ba iha parte Unesco nian atu sai patrimonio  mundial nian  no agradese tanba parke nasionál pertense ba Munisípiu Lautem  ne’e hanesan riku soin boot ida ba Munisípiu refere ne’eduni Nu’udar prezidenti Autoridade apela ba lider komúnitaria, konsellu suku sira no komunidade atu bele prezerva, konserva  no kuidadu Parke Nasionál ida ne’e  nomós tenki kontrola komunidade sira ne’ebé mak hakarak estraga ai-laran tuan sira ne’e  hanesan kasa ka estarga ai-laran  tuan ne’e.

PAM husu ba komunidade sira hotu katak lebele estraga ai-laran no animal fuik iha área  Parke Nasionál nian tanba iha planu governu  tinan oin sei konstrui fatin turizmu ba fatin sagradu sira ne’ebé mak partense iha parke ida ne’e.

Partisipa iha serimonia inagurasaun sentru Floresta  no kuda ai-oan ne’e husi  vice PM II, Komandante F-FDTL Maunana, membru parlamentu husi Komisaun A, Diretór Gerál no nasionál no xefe departamentu  iha MAPPF nian inklui veteranus sira, autoridade lokál  no komunidade iha fatin refere. Ekipa DMEA