Dili,23/12/2024, Governu Timor-leste liu Ministério Agricultura Pecuária Pesca e Floresta asina akordu ho Governu Japaun liu husi JICA iha Timor -Leste iha área peskas nian mak iha pontu inportante tolu hanesan, Kapasitasaun Rekursu Umanu, Promosaun merkadu (produsaun Peskas)no Teknolijía Peskas(kaer ikan ho Sistema modernu). Atividade asina akordu ne’e realiza iha Gabinete Ministru MAPPF Comoro.
Diretór gerál Peska e Aquikultura Gestaun Aquatiku Mariñu, Celestino da Cunha Barreto depoizde asina akordu esplika akordu ne’ebé mak Ministru Agrikultura asina ho Governu Japaun liu husi JICA ne’e inportante tebes tanba durante ne’e mós JICA apoiu hela atividade lubun ida iha Ministério Agrikultura nia iha área oin-oin inklui área peskas nian tanba durante ne’e JICA mós kapasita funsionario peskas sira porvolta ema na’in-5 kada tinan ne’eduni ohin mós Ministério Asina akordu tan ho JICA ne’e atividade sei implementa durante tinan tolu hahu tinan 2025 ate 2028.
Diretór jerál mós hatutan, asina akordu ne’e sei foka liu ba area tolu mak Kapasitasaun ba funsionário inklui peskadór sira no halo lavatamentu dadus nian hanesan estudu ida, Teknolojía peskas oinsá mak atu bele kaer ikan ho Sistema modernu nomós halo promosaun ba merkadu katak ikan sira ne’ebé mak kaer ne’e bele halo promosaun to’o iha konsumedór sira nia liman. Atividade hirak ne’e sei involve peskadór sira iha parte norte husi Munisípiu Bobonaro,Likisa, Dili, Atauro , Manatuto, Baucau nomós Lautem, nune’e espera katak liu husi atividade hirak ne’e sei fo benifisiu boot ba peskadór sira iha Timor.
Orsamentu husi JICA atu apoiu atividade ne’e kuaze Dollara Amerikanu 2 millaun durante tinan 3 nia laran, Ministerio prepara de’it fatin servisu no transporte ba sira banhira hala’o programa refere.ekipa DMEA
