Oecusse-Ministério Agrikultura Pecuária Pesca e Floresta (MAPPF) liu husi Secretario Estado Pescas (SEP) entrega Ró Fibre de Vidro ho-nia Assesoris kompletu totál unidade 5 ho Makina tasi marka Parsun 15 HP ho unidade 5, life Jacket ho unidade 15, tali ho marka PE 6mm tali bo’ot ho Unidade 5, ba Prezidente Autoridade RAEOA atu bele entrega ba Peskadór sira.
Seremónia entrega sasan refere ofisialmente marka prezensa husi Ministro MAPPF Marcos “Mameta da Cruz”, SEP Domingos dos Santos Macaro, Prezidente Autoridade RAEOA Rogério Tiago de Fátima Lobato, hetan apoiu seguransa maximu husi F-FDTL no mos PNTL RAEOA ninia, atividade ne’e hala’o iha loron (28/06/24) iha fatin Lotas de Pescas Suku Oesono Posto Administrativu Pante Makasar.
Iha diskursu Prezidente Autoridade RAEOA Rogério Tiago de Fátima Lobato katak, MAPPF entrega ró iha RAEOA ne’e hanesan instrumentu do trabalhu ba Oecusse oan sira hodi fila liman atu bele hadia sira-nia moris liu husi atividade kaer ikan, ikan ne’e lori proteina ba ita-nia populasaun iha Oecusse hodi bele mellora alimentasaun liu husi hahan ikan, ne’e hanesan oportunidade bo’ot tebes.
Nia esplika Oecusse ho nia tasi Costa naruk 47 KM iha ikan Barak maíbé durante tinan Barak ema han ikan menus hela, tanba felizmente setór Pescas iha RAEOA la dun orgranizadu, ho Ministro MAPPF, ninia inisiativa fo apoiu ró mai iha RAEOA ne’e fo instrumentu ba peskadór sira. “ Sasan hirak ne’e Primeiru mak atu lori hadia sira-nia moris, wainhira sira kaer ikan, parte Lotas nian sira sei lori mai iha ne’e, atu ema sira iha Oecusse laran tomak bele mai sosa ikan iha ne’e, atu bele ba fa’an tutan fali ba populasaun, ita komesa uluk husi ikan matak wainhira ikan matak Barak ona oinsa ita haree fali ba iha ikan maran, atu ema hotu bele asesu ba ikan maran la’os de’it ba ikan matak”.Tenik Nia
Iha fatin hanesan Ministru MAPPF Marcos “Mameta” da Cruz , hato’o agradese ba Prezidente Autoridade RAEOA bele fo oportunidade atu bele haree oinsa ita bele dezenvolve Oecusse iha futuru neduni Ministério oferese Ró fibra unidade lima 5 maibe ita mós sei la taka dalan atu aumenta tanba iha tinan ne’e MAPPF sosa tan Ró unidade haat nulu (40) ne’eduni Ministériu sei lori tan unidade lima entrega ba peskadór sira iha RAEOA halo peska tanba Peskadór nia-atividade mak atu kaer ikan, Ministério mós halo programa akikultura hakiak ikan bee midar, antes ne’e ita estabelese ona Kolan ikan iha fatin balun maibé fallansu oituan neduni ba oin ita sei haree oinsá mak hadia fali.
Serimónia ne’e partisipa husi diretór rejiaun Agrikultura RAEOA ho nia staf, diretór jerál Peskas, Pekuaria, Diretór nasionál Peskas ho nia xefia sira husi MAPPF, autoridade lokál suku Oesono iha RAEOA, nomos peskadór sira RAEOA.(Ekipa DMEA)
