Baucau-Vemase, 14 Maiu 2024. Prezidente RDTL, Jose Ramos Horta ho Ministru MAPPF, Marcos “MAMETA” da Cruz, hetan konvite husi CCI – TL ho Povu Agrikultura Vemase, bá partisipa serimonia koileta hare iha Suco Vemase Tasi, Postu Administrativo Vemase, Munisipiu Baucau.

Hare neb’e koleta husi hektares 3 ne’e hanesan programa Demploto husi CCI-TL hamutuk ho agrikultures Vemase nebe uza teknolójia agrikultura foun ho Sistema/naran K1K2 nebe introduz husi autoridade Indonésia, no resultado husi sistema ne’e sei kontinua hodi implemeta iha fase tuir mai.

“Ohin hau simu konvite mai husi CCI-TL no Autoridade Munisipiu mai partisipa koileta hare iha vemase, hau hare ho laran haksolok, tamba ho teknolozia foun no metodu foun no hetan apoiu husi atoridade sira, CCI-TL laos halo deit iha ne’e maibe hau rona halo ona iha fatin barak hanesan Maliana no fatin seluktan, pruduktividade por hektare sae makas “. Lia hirak ne’e hato husi Prezidente RDTL bá jornalista sira hafoin halo koleita hare.

Prezidente RDTL hatutantan katak “Husi informasaun sira ne’ebe maka ohin hato husi Autoridade sira iha sira nia diskursu hanesan prespetiva ida kompletu katak, agrikultura iha Timor bele duni lao ba oin ho produtividade bele sae to’o tonelada 7 ka 8 pur hectare. Ida ne’e maka hau hanoin, Hau sempre suporta programa Governu nia iha area agrikultura, hau fulan Junho atu halo vizita estadu ba nasaun Xina atu husu Xina bele ajuda ita iha setor agrikultura.” Dehan Prezidente RDTL.

Iha fatin seluk Ministru MAPPF Marcos “MAMETA” da Cruz, iha nia diskursu hateten katak “Ita fó parabens ba agrikultor sira iha Vemase ho setor pribadu, Emprezariu sira ne’ebé servisu hamutuk hodi produs hare iha fatin ida ne’e ho kada hektare hetan tonelada 5.

Politikamente governu hakarak providensia ai-han ou produtu agrikola ne’ebé barak, nutritivu ho sustentavel ne’ebé orienta ba merkadu ho organik, tamba ita nasaun kik ho produsaun labele kompete ho nasaun seluk, ho ida ne’e ita orienta ita nia agrikultura ba organik

Baucau iha rai 14.000 hektares ne’ebé ita seidauk kulitiva hotu, iha rai barak maka sei abandona, tamba ne’e governu iha nia stratezia oinsa atu fasilita komunidade agrikultura sira liu husi dezenvolvementu insfraktutura baziku, providensia ekipamentus nebe modernu no mos apoiu tekniku bá agrikultur sira, atu programa ne’e lao ita tenki servisu hamutuk “. Dehan Ministru

Ministru MAPPF mos hatutan katak “ bá oin ita tenki servisu hamutuk entre Governu, emprezariu no povu Agrikultura, tamba iha setor ida ne’e governu ho agrikultor deit sei la lao diak, tamba ne’e ita persija setor privadu atu servisu hamutuk oinsa ita bele insentiva, hodi inkoraza ita nia agrikultor  atu halo servisu iha sira nia rai rasik no sira nia tos ho natar rasik. Ita sei halo buat barak, ita sei fasilita hodi fo apoiu ba ita nia agrikultor, servisu hamutuk ho CCI-TL atu bele dudu hodi aumenta produsaun iha setor ida ne’e. “Dehan Ministru.

Ministru MAPPF hakarak husu ba setor privadu atu involve iha setor hotu – hotu, balun iha agrikultura ona balun ba fali area seluk, Ministru husu nafatin Prezidente RDTL nia apoiu ba setor agrikultura no Ministeriu agradese ba Prezidente RDTL ho laran luak mai hodi haree servisu agrikultura iha fatin ida ne’e.

Entertantu Prezidente CCI-TL, Jorge Serano iha nia lia menon hateten katak fo nafatin korazen ba agrikultor sira atu bele hasae produsaun no hatun numeru importasaun fos mai Timor – Leste

“CCI-TL iha hanoin oisa bele halo no servisu hamutuk. CCI Mesak sei labele, ne’e duni hau ba hasoru Ministru Agrikultura hau koalia ba ministru katak iha Ministru nia mandatu CCI hakarak apoiu iha area Agrikultura.

Husi hanoin sira ne’e Ami komesa halo Demoploto, iha hanoin balun dehan Demoploto ne’e halo la to hektares ida, maibé ida ami halo ne’e Demoploto hektares ba hektares, Ami hahu husi maliana, ba Suai mai Vemase no ita sei halo iha Timor laran tomak, Tamba sa mak Ami hakarak halo iha Timor laran Tomak, tamba Ami lakohi povu agrikultura atu dehan Demoploto ne’e so halo iha Maliana maka bele maibé iha Vemase labele, entau ami koko Timor laran tomak, no resultadu diak.”

Prezidente CCI – TL fo korajen nafatin ba agrikultur sira katak “Hau hakarak inkoraja Agrikultor sira katak ita bot sira la lao mesak, Camara Comersiu ida ne’e hamutuk ho ita bot sira no apoiu husi Ministru Agrikultura ba atividade sira ne’ebé maka CCI halo, mai ita fo liman ba malu hamutuk servisu hodi hamenus tiha importasaun fos mai ita nia rai Timor.

Agrikultor sira maka tenki sai produtor iha merkadu, ita servisu hamutuk hodi hasae produsaun , no osan iha ita bot sira nia liman maka sei determina presu merkadu iha baze”.

Programa ida ne’e realija hamutuk entre CCI-TL ho MAPPF no hetan suporta husi, KADIN Mangarai Barat, Petrosida Gresik, Petro Kimia Gresik, Pupuk Indonezia, BNCTL no HEINEKEN.

Partisipa mos iha seromonia ne’e PAM Baucau, Diretores Geral, Diretures Nasional MAPPF, Diretur Serbisu Agrikultura Munisipiu, Komandante Polisia Eskuadra Vemase, F-FDTL, Chefe suku iha Munisipiu Baucau, Reperjentante BNCTL, Emprejariu Nasional no Internasional. Ekipa Media Gabinete-DMEA