Dili-Ministériu Agrikultura Pekuária, Peskas no Floresta liu husi Diresaun nasionál veterinária hala’o seminariu Nasional ho “tema papél husi abordagen moras animal iha transfronteira, aprosimasaun ba moras exotica iha karau, no poténsial moras zonotica husi karau”, objetivu prinsipál husi seminariu ne’e maka atu fahe informasaun kona-bá rezultadu survey moras brucellosis ne’ebé halo tiha ona iha munisipiu tolu hanesan; Bobonaro, Covalima no RAEOA.
Seminariu nasional ne’e ofisialmente loke husi Sekretariu estadu Pekuária, José Vieira de Araujo iha Salaun IOB, Loron Kinta, 21 Dezembru 2023.
Iha Entrevista, Sekretariu estadu Pekuária, José Vieira de Araujo hateten, virus brucellosis mosu husi karau ne’ebé barak ona, Tanbá ne’e liu husi seminariu ida ne’e mak ita bele sosializa informasaun ba autoridade lokál sira no adminitrador sira no mós entidade hotu tantu nasional no internasional sira bele servisu hamutuk hodi atinzi rezultadu servisu liu husi planu integradu nian iha implementasaun maka desentralizadu.
Durante ne’e tekniku diresaun nasional veterinária halo ona prosesu vasinasaun ba komunidade nia animal sira iha munisipiu hotu. Iha kada munisipiu iha hotu sentru saúde animal nian komunidade sira bele kontatu ba bainhira presija halo prevensaun ba moras animal nian.
Ne’eduni ministeriu mós hetan apoiu husi parseiru Austrália liu husi programa MDF no ministeriu saúde hodi halo vasinasaun ba animal hirak ne’ebé hetan virus.
Iha Fatin hanesan, Diretora nasional Veterinaria, Joanita Bendita da Costa Jong esplika, Peskiza ne’ebé maka hala’o foka ba munisipiu tolu hanesan, Covalima, Bobonaro no RAEOA husi Suku 98 foti amostra karau, bainhira halo identifikasaun iha laboratoriu veterinariu hetan katak moras brucellosis ne’e nia prebalénsia aas tebes.
Tanbá ne’e maka moras ne’e, moras zonotico ne’ebé maka bele hada’et mós ba ema ida, ne’e mak diresaun nasional veterinaria halo kooperasaun ho parseiru sira para oinsá ita nia asaun ne’e iha plataforma saúde ida para wainhira saude animal haree ba moras animal nian ne’e hodi halo prevensaun no saúde ema nian haree ba oinsa karik ema ne’e hetan moras hada’et husi animal bele halo tratamentu.
Rezultadu peskiza ne’e iha aprezentasaun ita halo ona tanbá iha evidénsia balun hatudu katak moras animal ne’e afeita duni ba ema nia saúde ne’ebé mak kontaktu direita ho animal, tanbá ne’e kontinua halo sosializasaun atu oinsá ema ne’ebé mak hetan animal moras hanesan karau abortu atu labele kaer direita tanba ne’e afeita ba saúde.
Kona-ba moras brucellosis diresaun veterinária foin hahú halo peskiza no ba oin sei kontinua halo peskiza ba munisipiu seluk no halo solizasaun hodi hatene impaktu husi moras brucellosis ne’e rasik.
