Dili- Ministério Agrikultura Pecuaria Pescas e Floresta (MAPPF) liu husi membro Konsellu Seguransa Soberania Ai-han no Nutrisaun Timor-Leste (KONSANTIL) hala’o enkontru dahuluk ho membro Governo dasia ho objetivu revitalizasaun validasaun no vizaun komunitariu planu asaun Suku Pilotu konaba seguransa aihan no nutrisaun. Atividade ne’e hala’o iha loron Kinta (09/11/23) iha City 8 Manleuana.
Iha entrevista Ministro MAPPF Eng.Marcos da Cruz esplika, KONSANTIL hanesan kordenasaun Interministerial ida ne’ebe maka hari iha tinan 2010 no lao to’o mai agora, ida ne’e hanesan primeiro enkontru ho Governo dasia hodi revitaliza fali servisu. Ekipa KONSANTIL iha nivel rua ida ba Governo envolve membru Governu sira ida ba ekipa tekniku envolve Diretór jeral no Diretór Nasional sira.
“Objetivu maka revitaliza ekipa KONSANTIL atu nune’e ba oin bele hadia diak liu tan kordenasaun atu servisu hamutuk interministerial, atu valida ou aprova Suku 3 ne’ebe maka sei sai hanesan fatin atu implementa atividade KONSANTIL nian, Suku 3 ne’e maka hanesan Munisipio Baucau maka Suku Afasá, Bobonaro maka Daudu no Manufahi maka Suco Fahi Nehan. Ezemplu Suku tolu ne’e labele asesu ba Be’e mos no Estrada la iha produsaun ne’ebe maka diak hirak ne’e hotu maka ita tau iha kriteriu tekniku sira maka avalia katak fatin ne’e merese duni hodi hala’o atividade KONSANTIL nian.” Heteten Ministro Marcos
Nia informa, depois Ita implementa iha Suku tolu ne’e maka ita sei avalia tan iha Suku seluk ne’ebe maka iha Timor laran, halo atividade interministerial nian iha Suku Seluk tan. Suku tolu ne’e bele sai hanesan fatin atu Suku seluk bele ba aprende fali iha ne’eba.
Iha fatin hanesan Chefe Suku Afasá Joaquin Fernandes Ximenes Sente kontente tebes wainhira Governo deside Suku Afasá sai hanesan prioridade ba iha Programa ne’e, tanba iha buat balun ne’ebe maka Suku ne’e difikulta tebes, maibe ho KONSANTIL nia programa ne’e bele hadia ona komunidade sira nia moris.
Nia akresenta, Total komunidade iha Suku Afasá 2140 habitantes no chefe familia hamutuk 509, programa ne’e komunidade Suku Afasá tomak maka sei sai duni benefisiariu tanba sei dada be’e mos no mos Estrada.
Entretantu enkontru ne’e partisipa mos husi Vice Primeiro Ministro Eng.Mariano Assanami Sabino, Ministro MAPPF Eng. Marcos da Cruz Secretario Estadu Dezenvolvimentu Lokal Mateus Wilfredos dos Santos Tallo, Secretariu Estadu Floresta Fernandinho Vieira, Ajensia Internasional no Nasionál no mos Nivel Cargo Chefia sira. (Tyfa)
