Dili- 08 de Novembro 2023; Ministériu Agríkultura Pekuária, Peskas no Floresta (MAPPF), liu husi Diresaun Nasional Formasaun Tekniku Agrikola (DNFTA) organiza enkontru ho Alumni Arava International Center For Agriculture Training (AICAT) durante Loron rua ho Objetivu prinsipál atu identifika alumni AICAT hahú husi periodu 2015 to’o 2022, ne’ebé barak sei dezempregu no oinsa sira nia kontribuisaun ba dezenvolvimentu seitór agrikultura iha Timor-Leste, Enkontru ne’e hala’o Iha salaun uma adat Comoro.
Sekretáriu Estadu Pekuária, José Vieira de Araujo, esplika, atividade ne’e ita ko’alia kona-ba joven sira ne’ebé mak durante ne’e ba tuir ona formasaun iha Israel.
“Ita nia rai Timor mós poténsia ne’ebé boot tebes hanesan bee no rikusoin sira ne’e barak. Finanseiramente ita kiak, mas ekonomikamente ita riku tanba, rai barak mak ita la utiliza. Entaun ho matenek ne’ebé sira hetan iha Israel sira bele lori fali mai iha ne’e para oinsa bele investe iha area agrikultura”. Tenik nia
Nune’e hatutan tan katak durante ne’e Timor-Leste depende de’it ba fundu mina rai, ne’eduni buka medidas oinsa atu foti osan iha fundu mina rai ita bele kuda fali ba area produtivu liuliu iha area agrikultura, pekuária, peskas no Floresta. Tanba ne’e mak ita halibur sira mai iha ne’e atu fahe matenek ne’ebé mak sira iha atu nune’e alarga tan ba joven seluk iha rai doben Timor-Leste.
Iha parte seluk Diretór Nasional Formasaun Tékniku Agrikola Ipolito da Costa hateten, Alumni AICAT hahú husi primeiru grupu to’o sextu grupu hamutuk ema atus tolu liu kandidatus ne’ebé kompostu husi feto no mane lubuk ida.
Nia hatutan tan katak, Alumni sira ne’e mai husi munisipiu hotu-hotu, sira halo atividade lubuk ida, atividade ne’ebé sei aprezenta rezultadu atividades ne’ebé sira hala’o durante ne’e iha area agrikultura, pekuária no peskas ne’ebé sira halo iha terrenu.
Iha fatin hanesan Alumni AICAT Aleixo dos Santos hateten, ami lubuk ida mak involve iha asosiasaun alumni AICAT Timor-Leste ne’ebé hetan apoiu orsamentu husi ministériu agríkultura ho montante dolar amerikanu rihun atus neen hitu nulu resin lima ($675) ne’ebé mak investe ona ba atividade agrikultura iha Ratahu-Viqueque. Atividade agora la’o hela no ami kolabora nafatin ho ministeriu agrikultura para bele kontinua atividade ne’e, tanba atividade ne’e boot desde primeiru governu ate agora foin primeira ves mak implementa.
Atividade agrikultura integradu ne’ebe implementa maka atividade Hortikultura, Peskas (hakiak ikan), Pekuaria (hakiak karau, fahi no hakiak manu) no Plantas Industriais (kultivu nuu no buah naga) no Frutas (pateka no melon). Ida ne’e mak atividade integradu ne’ebé halo iha Ratahu Viqueque iha asosiasaun alumni AICAT no kolega sira halo iha fatin seluk hanesan Seloi kraik no Ermera tanba ne’e ami rekomenda ba governu para tau prioridade nafatin hodi apoiu kontinuasaun atividade sira ne’e atu eleva setór agrikultura iha Timor-Leste.
Nia hatutan, “Ami alumni AICAT hanesan tekniku no involve mos komunidade, kada semana ema husi komunidade nain 20 ba halo servisu kazual iha ne’ebá loron ida hetan dolar lima, No fasilita mos komunidade hodi aprende siensia no teknolojia inovativu ne’e hodi sira mos implementa fali iha sira nia toos no sira nia grupu ne’ebé sira kria rasik.
