Dili, 26 Outobru 2023, Ministério Agríkultura Pekuaria Peskas no Floresta hosi Diresaun Jerál Peskas liu hosi Diresaun Nasionál Inspesaun Peskas Rekursus Aguatiku sai uma nain ba enkontru “ The 16 th RPOA-IUU, Regional plan of Action Illegal, Unreported and Unregulated fishing Coordination Committee Meeting” (Sigla Inglés) ne’ebe mak involve nasaun sanolu resin ida hanesan, Indonezia, Australia, Brunei Darussalam, Cambodia, Malaysia, Filipina, Papua Nova Guine, Singapore, Thailand, Vietnam nomos Timor-leste objetivu oinsa atu kombate peska ilegal iha rejiaun.
Enkontru virtual ne’e ofisialmente loke hosi Sekretario Estadu Peskas, Domingos da Conceção dos Santos iha kinta-feira 26 /10/2023 iha Suai Room Timor Plaza.
Iha entrevista Sekretario Estadu Peskas, Domingos da Conceção dos Santos esplika, Komite rejionál hala’o sorumutuk ba dala sanolu resin neen hodi ko’alia kona-ba oinsa atu bele halo jestaun integradu hodi kombate peska illegal iha nasaun viziñu sira hanesan Indonesia, Austrália, Papua Nova Guine no Filipina.
“ Timor-Leste iha mehi oinsa bele reforsa kontrola sira ne’e, maibé ita iha limitasaun rekursu mas ita esforsu para atu bele aranka fazeadamente neneik maibe tenke lao bebeik, tanbá kada tinan mós ita lakon ita- nia rekursu ikan barak kada tinan, mas agora iha tinan 2023 ne’e komesa menus ona husi ita- nia lakon sira ne’e tanbá kontribui husi peska illegal no buat sira seluk ne’e prezudika rekursu no ekonomia nasaun nian”. Tenik Nia
Nia reforsa, iha duni problema balun tanba menus rekursu no material maibe iha tinan ida ne’e orsamentu jerál estadu 2024 prevee ona atu bele sosa ró atu bele trata asuntu hirak ne’e . hanesan nasaun foun hasoru problema ita hein katak ho ema hotu-hotu no instituisaun sira ne’ebé kompotente ko’alia kopersaun ita alarga ka estende tan koperasaun ho nasaun viziñu sira hanesan Indonesia, Austrália, Papua Nova Guine, filipina bele junta ita- nia forsa atraves rekursu ne’ebé menuz ne’e bele halo konesaun di’ak nune’e hodi kombate asuntu peska illegal.
Iha fatin hanesan, Sekretariat RPOA-IUU Indonezia, Eko Rudianto, hatete katak, iha organisaun Regional Plan of Action atu kombate peska illegal ne’ebe mak involve nasaun sanolu resin ida hamutuk atu bele kontrola area peskas no sorumutu ne’e hanesan tinan-tinan hodi aprezenta rezultadu servisu nomos halo planu asaun ba tinan oin nian. (Elis&Eby)
