Emera- 08/06/2023 Ministério Agríkultura e Peskas liu husi projetu Coffe and Agrofloresty Livelihood Improvement Projects (CALIP) halo sensibiliza informasaun ba komunidade munisipiu Ermera atu halo sentru peskiza no mos lutu ba area kafé nian iha aldeia apido suku mertutu.
Iha entrevista project maneger calip, Lourenço Borges Fontes esplika katak, objetivu ba sorumutu neé atu hamutuk tau hanoin oinsa kuidadu sentru nasionál peskiza kafé iha suku apido ida neé, tanba iha neé atividade barak mak estabelese ona iha neé atu sai imagen boot ida ba iha munisipiu Ermera katak iha Timor laran neé uniku Ermera mak iha fatin peskiza ba kafé, neduni ema barak maka sei mai halo peskiza iha neé no iha futuru.
“Halo Koordenasaun ho komunidade sira diak tebes atu tau matan nafatin ba sentru peskiza neé ho didiak, ba munisipiu sira seluk programa neé ita estabelese hanesan maibe iha munisipiu Ermera maka iha grupu tolu nulu resin rua, Liquiça grupu sanulu resin neén, Bobonaro grupu ualu, Ainaro grupu ualu, Manufahi grupu ualu, Aileu grupu ualu, total hamutuk grupu ualu nulu neébe iha kafé iha Timor-Leste”.
Iha fatin hanesan Diretór Nasional kafé e plantas industriais, Donato Salsinha hateten, ohin ita mai hamutuk iha neé husi Diresaun Nasional kafé hamutuk ho CALIP atu hare fatin ba inplementasaun no halo peskiza kona-ba kafé iha apido neébe ita tau planu halo lutu haleu sentru peskiza no toós kafé nian neébe iha 5 ektares.
Diretór neé salienta, iha neé konvida parte hot-hotu mai atu konsensializa ita- nia agrikultór sira nuneé sir a bele komprende katak, peskiza neé ninia objetivu ba futuru diak tebes ba produsaun kafé, tanba ita hatene katak ohin loron ita -nia produsaun kafé tun ba bebeik, maibe ita mos iha kafe neébe kualidade diak.
“Ita servisu hamutuk ho projetu calip atu desenvolve ita nia peskiza konaba kafé, maibe ita husu komunidade sira nia komprensaun atu bele tau matan proteze karaik iha difikuldade ruma tenki halo kordenasaun hamutuk ho Diresaun Nasional Kafé e Plantas Industriais oinsa atu buka solusaun hamutuk”.
Nuneé mos administradór postu administrativo Ermera, Alexsandre dos Santos Salsinha hateten katak, atu sensibiliza informasaun neé atu fo hatene ba komunidade katak fatin neébe maka determina ona neé sai hanesan fatin peskiza ba kafé Timor, neé importatante tebes atu bele fo espasu ba peskizador sira neébe maka mai husi rai seluk atu halo peskiza konaba kafé hibrida de Timor no kualidade kafé nian neébe diferente ho nasaun sira seluk.
Nia akrenseta, liu hosi enkontru ohin husu ba komunidade sira atu bele proteze, kuida no kontribui ita- nia hanoin no servisu sira atu bele lori resultadu neébe maka diak ba ita -nia komunidade aldeia apido suku mertutu.
Dadaun neé sei iha faze preparasaun para atu kria kondisaun atu ita- nia peskizadór sira mai iha fatin ida neé no mos halo moru haleu hodi proteze kintal tanba ida nee sai hanesan patrimonio estadu nian. (Eby)
