Oecusse-Ministério Agríkultura e Peskas liu Hosi Diresaun Nasional Extensaun (DNEA) Agrícola asina akordu ho radio komunidade iha munisipiu sanulu resin ida (11) inklui Radio Komunidade Atoni Lifau Oecusse, liu hosi akordu ne’e atu bele servisu hamutuk ho radio komunidade sira atu bele dessimina informasaun tékniku Ministériu Agríkultura  liu-liu   Pratika Agrikultura Diak (PAD), oinsa atu bele hasa’e produsaun agrikola liu hosi tekniku refere.

Ministério Agríkultura e Peskas  hamutuk  ho Servisu Agrikultura rejiaun espesial Oecusse asina akordu ho radio komunidade Atoni lifau  atu bele  fó sai informasaun jerál no tékniku hosi MAP   liu hosi kanál radio komunidade  ba agrikultor sira nomos komunidade sira ne’ebé mak iha interese ba agrikultura, Ministériu iha extensionista ne’ebé mak iha baze hodi servisu hamutuk ho agrikultór sira maibe ita presija atu bele fó sai informasaun  tekniku ne’ebé update direta  no lais  ba ita-nia agrikultór sira liu-liu Pratika Agrikultura Di’ak tanba hakarak ka lakoi Timor-Leste presija hasa’e produsun ai-han tenki iha kualidade,  lia hirak ne’e hato’o hosi Diretór Jerál Coopersaun no Dezenvolvimentu Institusional , César José da Cruz,  iha kuarta feira  (29/3) ne’e iha rejiaun espesial Oecusse.

Diretór Jeral ne’e esplika, agradese ba Radio komunidade sira tanba bele fó sai informasaun  kona-ba agrikultura nia iha rejiaun espesial Oecusse nomos  Munisipiu sira seluk tanba  ko’alia kona-ba kualidade ai-han presija uja tekniku Pratika Agríkultura Di’ak ne’ebé mak Ministério Trasa tiha ona neduni ita hein katak tulun hosi staf tekniku no extensionista sira iha suku no aldeia  bele apoiu atividade ba radio komunidade.

n

Neduni administrativamente  bazea ba lei Oecusse ita labele interven  buat ne’ebe maka tuir lei labele maibe  hakarak ka lakoi  Agrikultura, Saúde  laiha fronteira  tanba parte tekniku agrikultura ne’e esensial tebes tanba prinsipiu ida maka lori informasaun ba agrikultura sira ne’e uza meus barak hanesan liu hosi extensionista sira no media sosial sira seluk maibé seidauk to’o neduni  nune’e  Asina  akordu ho radio komunidade atu bele hato’o informasaun liu hosi radio komunidade ba ita nia komunidade no agrikultír sira.

Timor-Leste sei adere ba ASEAN neduni Ita presija prepara ekonomikamente liu-liu ai-han ne’ebé maka iha kualidade diak nune’e ai-han ne’ebé  maka ita  konsumu  labele hetan moras neduni husu mós ba servisu Quarentena iha rejiaun Oecusse atu bele haree didiak transmisaun moras iha liña fronteira  tanba Oecusse besik liu  nasaun viziñu Indonezia  ba inporta no eskporta  produtu agrikola entre nasaun rua ne’e.

Iha fatin hanesan, Sekretariu Rejiaun Agrikultura (RAEOA) José Eta iha nia intrevista depoiz de asina akordu entre radio komunidade Atoni lifau hateten katak, Asina akordu entre MAP ho radio komunidade ne’e parte inportante ida tanba bele lori ema hotu bele hatene saida maka Ministériu halo nomos servisu rejional agrikultura halo tanba ida ne’e hanesan pasu positivu tebes ba dezenvolvimentu agrikultura iha Timor-Leste liu-liu iha rejiaun Oecusse.

“ha’u Hanoin ohin ita formaliza ona servisu hamutuk guvernu ho radio komunidade maibe iha tinan hirak ba kotuk Servisu agrikultura rejiaun oecusse hahu ona halo dessiminasaun informasaun iha radio komunidade periodikamente, kada trimestral xefia sira ne’ebé maka tutela iha  Sekretariu Rejiaun agrikultura idak-idak sei ba direita ba radio komunidade hodi bele hato’o  saida mak sira halo ka implementa tiha ona. Liu hosi planu ne’ebé mak ita planea ona kada tinan signifika katak ita idenfitfika problema ne’ebé mak agrikultór sira hasoru ita bele rezolve iha tinan oin “.teknik sekretariu Rejiaun Agrikultura

Nune’e mós Jestór Radio Komunidade Atoni Lifau, José Fransisco Efi iha serimonia asina akordu hateten, Radio komunidade orgullo tebes servisu hamutuk entre MAP ho Radio komunidade hodi fó fiar ba radio komunidade atu bele dessimina informasaun ba komunidade no agrikultór sira iha rejiuan Oecusse tanba papel importante ida hosi radio komunidade maka distirbui informasaun ba komunidade sira.

Asina akordu ho radio komunidade ne’e hahu iha tinan 2022  no kontinua asina iha tinan ida ne’e ho durasaun tinan ida  ba  radio komunidade haat hanesan, Radio Komunidade Maliana, Radio Komunidade Covalima, Radio Komunidade  Tatamailau Ainaro no Radio Komunidade Lospalos no ba radio komunidade Walu ne’ebé mak foin hahu asina akordu iha tinan ida ne’e  ho durasaun fulan sanulu mak hanesan, Radio Komunidade Rejiaun Espesial Oecusse, Radio komunidade Aileu, Radio komunidade Dom Boaventura 1912-Manufahi, radio Komunidade kafé Ermera, radio Komunidade Tokodede Liquiça, radiu komunidade Ili-wai Manatuto, radio komunidade Lian Matebian Baucau, no  radio komunidade Povo Viqueque. Tanba liu hosi  Radio komunidade sira agrikultór sira bele asesu informasaun pratika agrikultura di’ak no politika MAP nian oinsa atu bele hasa’e produsaun agrikola ho kualidade no hetan rendimentu ba merkadu. E’S