Dili- Ministério Agríkultura e Peskas (MAP) Asina MoU ho parseiru Dezenvolvimentu World Vision hodi hare konaba ai-han diak no saude, programa ne’e sei implementa iha munisipio ha’at hanesan; Aileu, Baucau, Bobonaro no mos Cavalima programa ne’e hetan fundus husi Governo Australia. Seremonia Asina MoU ne’e hala’o iha Loron Tersa (07/03/23) iha Salaun MAP Comoro.
Iha diskurso Ministro MAP Pedro Dos Reis hateten katak, seremonia Asina Nota de Intendimentu ne’e diak tebes, tanba bele apoiu ona ita konaba Ai-han diak no Saude diak, fiar katak liu husi asina MoU ida ne’e bele servisu no kolabora diak liu liu tan, tanba ita hatene katak Timor Leste Nasaun ki’ik Nasaun foun problema barak ne’ebe maka ita hasoru liu-liu preokupasaun sira ne’ebe maka agora dadauk Estadu Timor Leste Enfrenta hanesan mal nutrisaun no seluk tan.
“Lori Governo no Estadu Timor leste nia naran hakarak hato’o agradesementu ba Governo Austrália liu husi Embaxada Austrália nia esforsu tomak hodi apoiu ona ita, Word Vision nia ezistensia iha Timor laos iha tempu ukun a’an maka eziste maibe hahu kedas iha tinan 1995, depois de Timor Leste hetan Independensia kontinua nafatin to’o ohin loron, ho Nota de Intendimentu ida ne’e fiar katak sei bele hetan rezultadu ne’ebe maka.” Katak Ministro MAP
Nia akresenta, ho presenza Parseiro Desenvolvimento sira nian ne’ebe maka servisu hamutuk ho MAP hanesan pasu ida ne’ebe maka diak, hodi tulun estadu atu bele hasae produsaun no bele hadia nutrisaun iha rai laran, espera katak ho asina Nota de Intendimentu ida ne’e bele haforsa liu tan ita nia servisu ba iha futuru atu nune’e MAP ho nia ekipa no Diresaun sira ne’ebe maka servisu hamutuk ho ita nia parseiro desenvolvimentu sira bele iha orientasaun ne’ebe maka klaru, hahu husi nivel Nasionál to’o ba iha ita nia Estensionista sira iha terenu, ninia albu ida deit oinsa ita hamutuk hodi bele hasae produsaun iha ita nia rai laran hodi rezolve mal nutrisaun no mos problema sira seluk ne’ebe maka ita nia nasaun Timor-Leste enfrenta.
Iha fatin hanesan Diretór Nasionál World Vision Timor Leste Jared Berends esplika katak sira nia projetu ne’e hare liu konaba Ai-han diak Saude Diak no sira sei implementa iha Munisipio ha’at maka hanesan Aileu, Baucau, Bobonaro no mos Covalima. Iha projeitu ne’e sei promove aihan sira hanesan iha tipu ne’en maka hanesan marungi, Manu-tolun, koto, forekeli no mos foremungo, atu hato’o katak Aihan sira ne’e importante tebes bai nan isin rua no mos labarik kik sira.
Seremonia Asina MoU ne’e Asina Diretamente husi Ministro MAP Pedro dos Reis akompanha mos ho Vice Ministro MAP Abilio Xavier de Araújo, Secretario Estadu Pescas Elidio de Araújo no mos Diretór Jeral Diretór Nasional no mos Chefe Departamentu sira. (Tyfa)
