Liquiça-Ministériu Agríkultura e Pescas (MAP) liu husi Diresaun Nasionál Peskiza Estatistika (DNPE) estabelese ona sentru Peskiza iha Loes hodi Peskizador sira halo Peskiza ba Ai-Han sira iha area Agríkultura no Hortikultura, maibe oras ne’e dadaun sentru ne’e rasik hetan ameasa bo’ot tebes husi mota Biabulu no Koroati husi Gugleur-Maubara.
Ohin ita mai iha Sentru Peskiza Loes, hanesan fatin peskiza ba ita nia aihan sira, ne’ebe agora sai ameasa bo’ot husi mota refere, Objetivu mai hare ida ne’e atu bele fo sai ba Públiku hodi nune’e Ministériu bele hare no bele hadia iha future, Katak Diretór DNPE Deolindo de Oliveira hafoin halo vizita ba iha sentru Peskiza Loes iha loron Tersa (28/02/23).
Nia hatutan, Kondisaun ne’e a’at tebes presiza hadia, se la hadia maka sei sai problema bo’ot. Sentru Peskiza ne’e importante tebes tanba nia reprezenta ba Zona Oeste, ho situasaun ida ne’e ita presiza hare atu bele hadia halo didiak lutu ne’e atu bele proteze be’e ne’ebe maka agora dadauk sai ona ameasa bo’ot ba Sentru ida ne’e. Lutu hirak ne’e hahu halo iha tinan 2008 iha tempu ajensia Seeds Off Life (SOL) ninian, tanba kleur presiza tebes atu hadia.
“Hau mos koordena ona ho tekniku sira hodi mai foti ona dadus oinsa maka bele pinta ninia modelu lutu ne’e ho nia dezenñu ida ne’ebe maka diak hodi bele prepara hela kuandu iha Prorama Governu nian ruma ami bele impõem atu bele tau konsiderasaun ba iha ita nia Sentru ne’e. Se ita la hanoin hanesan ne’e futuru bele sai ameasa bo’ot, tanba ne’e sai ona mota, tinan rua no ida liu ba ladun estraga hanesan ne’e, ida ne’e kuaze atu sai ona mota ne’e duni presiza tebes atu hadia.” Tenik Diretór Deolindo
Iha fatin hanesan Xefé Seksaun Sentru Peskiza Loes António dos Santos haktuir katak, mota ne’e ameasa tebes ba sentru ida ne’e, Lutu ne’ebe maka a’at ameasa tebes ba iha Sentru ida ne’e tanba peskizador barak maka halo Peskiza iha fatin ida ne’e no animal sira mos bele tama mai estraga aihoris sira ne’ebe maka peskizador sira halo peskiza ba, tanba ne’e nia ba iha Ministeriu atu tau matan lalais mai iha Sentru ida ne’e. (Tyfa)
