Dili-Ministériu Agríkultura no Pescas (MAP) liu husi Diresaun Jeral Pecuaria e Veterinaria hamutuk ho Estudante Universidade Nasionál Timor Lorosa’e (UNTL), Universidade Oriental (UNITAL) hala’o Introdusaun kona-ba moras ibun no ain kukun ba animal ou Foot Mouth Disease, (FMD) no oinsa Politika Governu nian bele halo Prevensaun hasoru moras refere Iha Timor- Leste.ed
Iha entrevista DJ DNPV Domingos Gusmão esplika katak, seminariu ida ne’e MAP ho parte akademia sira sientifiku atu ajusta hanoin hamutuk oinsa maka bele halo prevensaun ba moras ne’ebe aka agora dadauk espalla iha Indonésia. Liu husi seminariu ida ne’e Parte Governu no Parte academia halo planu ida ne’ebe maka efeitu hodi bele halo prevensaun ba moras ne’e.
“Agora dadauk ita nia rai sei livre hela seidauk afeta, tanba ne’e maka liu husi seminariu sira hanesan ne’e atu bele halo antisipasaun ba moras refere, maibe iha asaun ne’ebe maka MAP halo maka survey, politika Governu nian mos sei prepara hela orsamentu, tekniku sira no mos Laboratoriu atu nune’e karik moras ida ne’e mosu ita bele halo detekta. Moras ne’e rasik ita seidauk iha vasinasaun. Seminariu ida ne’e hanesan sientifiku de’it, atu hatudu ba ita nia tekniku sira moras ne’e hanesan ne’e, nia sintomas ne’e hanesan ne’e planu Ministério nian nian ne’e feitu ona atu halo prevensaun.” Katak DJ Domingos iha salaun MAP Comoro, iha loron Quinta (06/10/22).
Iha fatin hanesan Vice Decano UNTL Rui Daniel de Carvalho sublinha, seminariu ida ne’e atu oinsa buka solusaun ou buka dalan liu husi Governu atu halo politika diak ida oinsa maka bele kontrola moras ne’e atu labele tama ita nia rai liu liu oinsa Governu kria politika ida hodi reforsa servisu Quarentena iha fronteira atu nune’e produtu sira ne’be mai husi Indonezia hanesan animal ka animal sira nia produtu sira ne’ebe mai husi Indonezia ita labele authoriza hatama ona tanba produtu sira ne’ebe mai husi na’an fahi, na’an karau no na’an bibi iha risku boot atu lori moras ne’e tama mai Timor inklui mos produtu sira liu husi kontentor.
Nia informa, Liu husi na’an sira ne’ebe maka tama mai, bele liu mos ema ne’ebe mai husi aviaun bele lori husi sira nia vagasi no produtu animal ninia bele lori produtu na’an ninia ida ne’e bele iha risku ona no hatama ona virus ne’e tama ita nia rai, tanba ne’e maka halo seminariu ohin ne’e atu oinsa Governu buka dalan para reforsa servisu ne’ebe maka iha ona por ezemplu servisu Quarentena, servisu veterinaria iha kampu bele servisu hamutuk oinsa bele kontrola moras ne’e. liu-liu ita atu fo avizu ida importante ba komunidade sira katak moras ne’e besik dadaun ona ita lakoi atu akontese hanesan tinan kotuk iha 2019 moras Afrikan Swine Fever kona fahi halo fahi mate barak.
Nune’e mos Dosente UNTL Alipio de Almeida hatutan katak, Timor to’o ohin moras ibun no ain kukun ba animal ne’e seidauk tama, maibe moras ne’e tuir Istoria katak daet ona iha Indonezia iha fulan kotuk no to’o ona mai NTB no Bali, ne’e duni kuaze besik los ona mai Timor. Moras ne’ebe kauza husi virus ida, da’et fasil tebes no bele liu mos husi anin, tanba ne’e maka husi Saúde animal tauk, keta halo ita seidauk prontu moras ne’e tama mai ita nia rai halo animal sira bele mate hotu. Tanba ne’e maka koko koordena ho MAP atu bele halo seminariu ida ne’e, hodi fahe informasaun ba ema hotu atu bele prepara a’an antes moras ne’e tama.
“Moras ida ne’e kauza husi virus klaru katak nia aimoruk lolos seidauk iha maibe tratamentu sintomatika ba moras ne’e ita bele halo nafatin atu bele prevene infeksaun sekundariu husi moras ne’e ba ita nia animal. Maibe dala ida tan iha Timor aimoruk ita seidauk bele halo, ita dependente ba rai liur nune’e ita presiza osan hodi sosa, Tanba ne’e maka ami koko fanun ita nia Ministériu atu bele prepara a’an kuandu moras ne’e to’o mai karik Aimoruk iha uluk ona.” Tenik Alipio
Nia akresenta, moras ida ne’e ita so bele prevene liu husi seguransa, karik seguransa diak moras ne’e sei labele tama, karik tama mos ita kuandu koñese ona oinsa asaun seguransa ba ita nia animal ita sei bele salva no ita mos bele halo prevensaun liu husi Vasinasaun. Seminariu ohin ne’e ita halo koperasaun entre UNTL, Departamentu Saude Animal ho Ministeriu Agrikultura e Pescas atu hare kona ba moras FMD (Foot and Mouth Disease) ka penyakit mulut dan kuku ne’ebe oras ne’e dadaun iha Indonezia afetadu ona, ne’ebe ita mos tau atensaun tanba moras ne’e bele tama Timor. (Tyfa)
