Ministériu Agríkultura no Pescas, (MAP) liu hosi Diresaun Nasionál Seguransa Ai-han (DNSA) Atravez (KONSSANTIL) hala’o enkontru ho Diretór Géral hosi Liñas Ministeriais no Parseiru Dezenvolvimentu sira hodi diskute kona-ba Tema no Preparasaun ba Loron Ai-han Mundial nian ne’ebé sei realiza iha loron 16 fulan Outubru Tinan ne’e.

Iha oportunidade ne’e Diretór Jéral-CDI, César José da Cruz hateten Loron ai-han Mundial  ita haree kona-ba oinsa maka komemorasaun loron ai-han mundial ne’e  atu hala’o iha nasionál nune’e mós iha Munisípiu.

César Esplika, espera katak komemorasaun ne’ebé atu mai ne’e sei di’ak liu tan tinan-tinan sira kotuk no iha mós espozisaun no feira balu kona-ba ai-han lokál no buat barak mak ita sei hala’o.

Tanba ne’e Tema kona-ba selebrasaun Loron Ai-han Munidial nian “Leave no one behind, better production, better nutrition, a better environment and a better life for all” (La husik Ema ida iha kotuk, Haforsa sistema ai-han ne’ebé Rezilente no nutritivu ba povu Timor-Leste) liu-liu ita haree ba iha produsaun haree mós ba iha ambiente saúde nutrisaun.

“Iha loron ai-han mundial ne’e ita sei loke sertame liu-liu ba iha produtu lokál. Tanba ita nia labarik sira ikus ne’e ladun koñese ai-han lokál,tanba ne’e mak ita bele promove maibé presiza mós haree atu produtu lokál ne’e ho produtu sira ne’ebé mak la lakon iha ita nia rain, ezemplu koto moruk, Uhi, Kumbili no ai-han seluk tan”, Dehan Cesár iha loron Kuarta (28/09/2022) iha Salaun MAP-Comoro.

Iha fatin hanesan Asesór Gabinete Primeiru Ministru Filipe da Costa, hatete iha ita nia rai tuir dadus ne’ebé fó sai iha tinan kotuk hatete katak kuaze pursentu 50 sei hetan inseguransa ai-han pursentu 47 labarik sira sei mal nutrisaun ne’e hatudu katak problema sei boot entaun ita espera katak ho selebrasaun loron ai-han mundial ne’ebé sei mai sei di’ak liutan no programa intervensoes sira atu nune’e ita bele resolve problema iha Timor-Leste.

Nia dehan, enkontru ida ne’e ita aprova agenda no Tema loron ai-han mundial ba Nasionál no Internasional ho atividade sira ne’ebé sei hala’o iha loron ai-han mundial nune’e mós orsamentu sira ne’ebé sei uza hodi apoiu implementasaun ba loron ai-han mundial ne’ebé sei realiza iha fulan oin.

Iha Diskusaun ne’e hola parte hosi Diretór Geral sira hosi liñas Ministériu ne’ebé mak hamahan an iha KONSSANTIL nian. Rozer Lopes