Manatuto-Ministério Agríkultura e Peskas (MAP) liu hosi Diresaun Nasionál Agríkultura e Hortikultura (DNAH) koilleta haré rai maran jeral 5 ektares ba segundu epoka ne’ebe uza lehe ou Conservasaun Agríkultura (CA) iha suku Uma Boco. Atividade ne’e hala’o iha loron Sexta (02/09/22) iha Postu Administrativo Barique Natarbora.
Iha Entrevista Diretór Nasionál DNAH Lucio Romeo Ribeiro esplika katak, programa ida ne’e importante tebes iha segundo epoka ba koilleta hare rai maran iha Munispiu ida ne'e liu-liu iha Postu Barique tanba inisia hosi Postu ida ne'e rasik.
“Iha tempo hirak liu ba kotuk Ministru MAP mai halo kultivasaun, ohin ami ho ekipa tekniku sira mai hamutuk ho autoridade Munisipal sira mai koilleta hare rai maran iha fatin ida ne'e. Ita hare tinan hirak liu ba kotuk hare rai maran ne'e hahu kedas hosi ita nia avo beiala sira ne'e kontinua tiha ona, maibe tinan hirak nia laran ne'e ita tenki kontinua fali iha tinan ida ne'e, ita hakarak hato'o ba publiku katak, agora ba oin ita sei melhora diak liu tan hare rai maran ida ne'e, tanba ita hare ba mudansa klimatika no mos dezastre naturais ne'ebe maka estraga irrigasaun sira.” Esplika Lucio
Nia hatutan, dezenvolve haré rai maran ne'e importante tebes, atu bele fo benefisiu ba ita nia to'os nain sira no sira ne'ebe maka moris iha natar, la asesu ba bee ona entaun ita bele muda fali sira nia hanoin atu bele envolve iha haré rai maran, alende iha rai maran maka hanesan Batar, no mos ai-han sira seluk.
Direóor ne'e mos hato'o agradece ba parseiro dezenvolvimentu hanesan FAO ne'ebe maka inisia tiha ona programa Conservaaaun Agrikultura (CA) hodi utuliza Lehe, lolos ne'e tinan hirak liu ba uza ba iha batar deit maibe foin primeira vez programa CA ne'e dezenvolve ba haré rai maran ida ne'e. Nia mos husu ba to’os nain sira atu kontinua uza lehe ou CA ne’e ba iha batar maibe bele utiliza mos ba produtu seluk hanesan Hare rai maran.
Iha fatin hanesan Team Leader FAO Joy Galvez informa katak, iha Conservaaaun Agrikultura (CA) ne'e laos deit atu hasae produtividade liu hosi Conservasaun Agrikultura (CA) liu hosi kuda lehe atu nune'e hadia rai nia bokur. CA ita bele reduz ita nia tempo servisu, tanba dala barak ita nia agrikultór sira hasae forsa barak liu ba iha hamos duut, entaun CA ne'e bele reduz sira nia tempo servisu no mos kustu liu-liu hasae osan ba sosa mina hodi hamos no fila rai.
“Joaquim Caldas ne'e maka sai hanesan ami nia benefisiariu maka hahu iha projeitu liu ba, maske ami husik ona nia maibe nia sei kontinua nafatin programa CA ne’e, no primeira vez nia implementa ba haré rai maran no programa CA ne'e ami implementa iha Munisipiu Ainaro, Covalima, Lautem, Manufahi, Manatuto, Baucau, Ermera no mos Viqueque.” Informa Team Leader FAO
Nune mos agrikultór Joaquim Caldas esplika katak, programa CA kuda lehe ne'e fo ajuda tebes ba nia, tanba menus ona kustu uitoan.
“Iha tinan 2013 ami hahu tuir treinamentu no para tiha maibe komesa kontinua fali iha tinan 2020 liu ba hau konsegue halo to'os no kuda uluk batar maibe fila rai hau kuda tiha no kuda kedas lehe ba batar ne'e hetan rezultadu diak ho ida ne'e maka hau kontinua fila fali lehe e roli tiha maibe problema maka lutu, maibe lutu ne'e hau uza arame ne'ebe CA ne'e bele hakman ami nia servisu.” katak Joaquim
Nia mos husu ba joven sira atu kontinua implementa programa CA ne’e ba oin tanba agora ne'e ita nia Governo mos hadia ona ita nia irrigasaun sira ne'e no agora ita nia haré rai maran ne'e hakat ba oin, nia mos husu ba Governo atu bele suporta ita nia joven sira halo to'os ne'e ho konsiensia ida-idak nian rasik. (Rommy)
VISITA IHA KANAL YOUTUBE (MAP-NEWS)
https://www.youtube.com/watch?v=hg4AMf4sXMs
