Notisia

Funsionariu Non Tekniku Peskas Hamutuk 30 Pessoas Hetan Treinamentu Tekniku Husi Diresaun Jerál Peskas

Fotografia/Canizio/INFO-MAP
Liquiça- Ministériu Agríkultura e Peskas (MAP) liu-hosi Dirasaun jerál Peskas fó treinamentu ba funsionariu Non tekniku hamutuk 30 kompostu husi Munisipiu Viqueque, Ainaro, Covalima, Manufahi, Bobonaro no Dili hahu husi loron Tersa 22-03 to loron 02 de Abril 2022 iha Institutu Nasional Peskas no Akuikultura (INPA) Posto Administrativu Maubara munisisipiu Liquiça.
 
 
Iha entrevista Sekretariu Estadu Peskas, Elidio da Araújo hateten katak, treinamentu ida ne’e atu bele halo kapasitasaun ba ita nia funsionariu non tekniku sira. Non tekniku ne’e signifika katak sira ne’ebe maka laos eskola iha area peskas nian, maibe sira servisu iha parte peskas nian, sira ne’e merese atu hetan koñesementu uituan konaba parte peskas no akuikultura nian, tanba ne’e maka ita halo treinamentu ba loron ida ne’e.
 
Treinamentu ne’e halai liu ba iha parte rua, ida liga ba area Peskas no ida liga ba area Aquikultura, Peskas ne’e halai ba tasi nian Aquikultura konaba hakiak ikan be’e midar iha rai maran. Ba oin oinsa maka fo kapasitasaun ba ita nia maluk sira liu-liu ita nia maluk funsionariu, estensionista no komunidade sira konaba area Peskas no Aquikultura nian. Ita fo treinamentu ba estensionista sira tanba sira maka besik liu ita nia komunidade, entaun sira mos tenki iha konesimentu konaba area peskas no akuikultura nian atu nune’e wainhira ita nia komunidade sira presiza husu buat ruma ba sira karik sira bele esplika ba komunidade sira ou sira bele ajuda ita nia komunidade sira atu bele dezenvolve diak liu tan ita parte peskas no akuikultura, atu nune’e ita bele atinji ita nia metas ne’ebe mak iha.
 
“Iha metas ne’e hateten katak iha tinan 2023 komunidade hotu hotu tenki konsumu ikan kg 10 kada tinan ida ne’e maka ita halo. Ami mos garante tanba planu ne’ebe maka ami halo realiza duni ho ami nia programa. Por ezemplu aquikultura ami agora dadauk destribui ona ikan tinan ida ne’e besik miliaun ida ba ita nia komunidade sira iha teritoriu Timor laran tomak ita bele hare katak komunidade sira ne’ebe maka hakiak ikan be’e midar ne’e to’o ona foho hun sira hanesan iha Baucau iha foho Matebian nia hun iha Ainaro iha mos foho ramealu no Kablake nia hun kauza iha hotu ona.” Tenik Elidio
 Fotografia/Canizio/INFO-MAP
Nia mos husu ba formadu sira tenki iha hakarak no vontade hodi tuir treinamentu sira hanesan ne’e. tanba treinamentu sira hanesan ne’e laos lor- loron, dala ruma tinan ida dala ida de’it ne’e duni nia hakarak motiva nafatin sira hodi aproveita tempu ne’ebe maka iha hodi tuir treinamentu ida ne’e atu bele iha koiñesimentu nato’on hodi bele pratika iha sira nia moris lor loron.
 
Iha fatin hanesan Diretor Jerál Peskas Acacio Guterres subliña katak, Treinamentu ida ne’e ita fo ba ita nia funsionariu non tekniku sira ne’ebe mak ita rekruta servisu iha Nasionál nomos munisipiu, atu bele aumenta sira nia kapasidade tekniku ba area peskas no Akuikultura nune’e sira bele fó kontribuisaun ba iha dezenvolvimentu iha rai laran.
 
Nia informa formadu sira ne’ebe maka tuir treinamentu ne’e total 30 kompostu husi Xefi Departamentu nain rua ne’ebe husi Munisipio Manu-fahi no mos Covalima. Treinamentu ne’e sei hala’o durante semana rua nia laran, iha semana primeiru barak liu maka sei fo informasaun jeral ba ita nia formadu sira liu liu iha area peskas ninian, liu liu husi Ministériu mos sei fo materia. No semana ikus nian maka sira focus liu ba iha akuikultura oinsa maka bele hakiak ikan be’e midar.
 
Nune’e mos formadu Fernando da Silva akresenta katak, treinamentu ida ne’e importante tebes, hanesan partisipante husi area non tekniku bele aprende material lobuk ida, liu-liu iha area Peskas nian no akuikultura bele aprende buat barak husi ne’e atu bele sai hanesan bukae ida baa mi atu nune’e bele implementa fali iha terenu, hodi bele dezenvolve hamutuk iha area Peskas no akuikultura nian iha Munisipio ida idak.
 
Nia afirma depois de treinamentu ne’e hotu saida maka ami aprende ona ami sei servisu hamutuk ho kolega tekniku sira seluk ne’ebe maka iha kampu hodi bele fo fali material sira ne’ebe maka ami hetan ba maluk Agrikultura sira ne’ebe maka hakiak ikan be midar no mos sira peskas ninian iha baze.
 
Treinamentu neé haláo durante semana rua iha Sentru Nasionál Institusional Peskas Maubara Munisipiu Liquiça.

Rua : Av. Nicolao Lobato Comoro
Dili ,Timor-Leste

Kontaktu ami : 

Telp: +670 330 3333
E-mail: Este endereço de email está sendo protegido de spambots. Você precisa do JavaScript ativado para vê-lo.
Website: http://maf.gov.tl

Parseiru ho

© 2017 Ministeriu Agrikultura no Peskas. All Rights Reserved. Designed by IT MAP

Search

Login