Rezultadu husi kolleta hare jeral ne’e total 5.4 ton/ha ida ne’e hatudu katak iha duni mudansa ba Segundu epoka nian iha tinan 2022. Atividade refere hala’o ona iha tinan 2021 no ohin (rad) Sexta maka foin kolleta, atividade ne’e hala’o iha Sexta (21/01/22) iha irrigasaun Bluto suku Haturalan Postu Administrativo Laleia.

 

Tuir tekniku implementador Vasco Simões hateten katak, objetivu ba loron ohin nian maka kolleta hare, ne’ebe maka tinan lotuk halo ona no atividade ne’e mos hanesan eskola kampo ba agrikultor sira kuda hare uza sistema pratika agrikultura diak (PAD), kuda hare iha luan area 1,2 haktares ita halo tratamentu oin rua uza adubus organiku no ida seluk la uza adubu organiku.

 

Nia esplika La uza adubu organiku ninia produtividade hetan 2,04 ton/ha no ida uza adubu organiku ho produtividade hetan 5,4 ton/ha. Kontiunidade ba iha eskola kampo ne’e politikamente, tanba tinan ida ne’e ita sei muda fila fali ba iha progrma seluk no iha fatin seluk. Ba tinan ida ne’e ita la iha kontiunidade depende ba iha Xefe Departementu no Diretor sira nia politika, no teknikamente ita hakarak kontinua

 

”Hau nia rekomendasaun ba grupo agrikultor sira katak ba oin sira bele uza fali sistema ida ne’ebe uza adubus organiku ne’e, tanba nia rezultadu hatudu diak tebes kompara ho la uza adubus Organiku Poc NASSA. Hau mos la haluha husu ba Agrikultor atu kontinua utiliza rekursu ne’ebe iha, hanesan subsidiu husi governu hanesan fini, adubus, ho aimoruk sira ne’ebe iha no kuda hare tuir sistema pratika agrikultura diak (PAD) nune’e modelu sistema ne’ebe uza hanesan uza adubus organiku tuir eskola Kampu nia rezultadu”.tenik Vasco

 

Iha fatin hanesan Diretor Servisu Agrikultura Munisípiu Manatuto Tomas Piedade Francisco, hateten katak, ita mai iha ne’e hamutuk ho agrikultor sira iha ne’e ita atu kontinua motiva sira para sira bele komprende liu-liu saida mak durante ne’e ita fo koñesementu liu husi eskola kampo ida ne’e, ho esperensia ne’ebe sira iha sira bele hatutan tan ba agrikultor sira seluk ba agrikultor sira ne’ebe la partisipa para bele hatene no kompriende diak, kona-ba matenek ne’ebe tekniku fo ba sira iha eskola kampo ida ne’e.

 

Nia hatutan katak, rezultado ohin ita hare diak tanba ho eskola kampo ne’ebe uza adubus organiku no la uza adubus organiku ita halo komparasaun ida uza adubu ne’e rezultadu diak hetan produtividade 5,4 ton/ha no ida ne’ebe la uza adubus organiku ne’e hetan produtividade 2,04 ton/ha ida ne’e hautudu katak rezultadu diak inportante mak agrikultor sira komprende ona ita nia governu liu husi Ministeriu Agrikultura munisípiu Manatuto ita mos suporta agrikultor sira hanesan adubus, fini, mina no aimoruk, ho ita nia apoiu sira ne’e bele motiva sira diak liu tan nune’e sira bele lao servisu iha sira nia natar agrikultor sira iha bontade bele hasa’e sira nia produsaun.

 

Sekarik ita nia Diresaun Nasional Estensaunla iha kontinuasau ba aktividade eskola kampu ne’e. Karik iha Munisípiu iha oportunidade tau osamentu ita tau para lori kontinua, maibe ho kibit ne’ebe mak delegasaun mai iha Diresaun Munisípiu sira hau iha esperansa nafatin hau husu ba iha Diresaun Nasional Estensaun para atu kontinua nafatin para labele lakon esperansa ba iha ita nia agrikultor sira.

 

Nune’e mos Xefe Grupo José Viegas akresenta katak, hahu husi inisiu sira tuir eskola kampo sai hanesan vantajen diak tebes ba sira atu hatene oinsa uza adubus Poc Nassa no ohin loron ita hala’o kolleta ninia rezultadu hatudu diak tebes tanba uza adubus organiku no halo tratamentu oin rua uza adubus organiku no ida seluk la uza adubu organiku. La uza adubu organiku ninia produtividade hetan 2,04 ton/ha no ida uza adubu organiku ho produtividade hetan 5,4 ton/ha.

 

Hanesan Xefe Grupo iha nia Parte senti kontenti no agradese tebes ba tekniku implementador tanba durante ne’e sira tuir eskola kampo ohin kolleta hetan rezultadu diak tebes.Husu ba Diresaun Nasional atu kontinua ba iha eskola kampo ne’e nunee agrikultor sira nafatin kontinua e labele para deit iha ne’e.

 

Serimonia Kolleta hare uza sistema Pratika Agrikultura Diak (PAD) ne’e hetan partisipasaun husi Diretor Nasional Estensaun Agrikola, Oscar Monteiro Gonçalves no Diretor Servisu Agrikultura Munisípiu Manatuto Tomas Piedade Francisco nomos akomapnha husi xefe Departementu Programae metedologia Estensaun Agrikola, Xefe Departementu Formasaun no kapasitasaun Estensaun Agrikola no hetan mos partisipasaun Maximo husi Grupo Agrikultor sira.