Notisia

MAP Lansa Utilizasaun Tunel hodi kuda modo iha Municipio Manufahi

Estrela inativaEstrela inativaEstrela inativaEstrela inativaEstrela inativa
 
Fotografia/Reni/INFO-MAP
Manufahi - Ministériu Agríkultura no Peskas (MAP) liu hosi Dirasaun Nasional Agríkultura e Hortikultura (DNAH) halao lansamentu utilizasaun Tunel hodi kuda modo hodi muda sistema tradisional ba sistema moderno hodi protéze modo hosi moras no peste ba grupo joventude hortikultura iha Aldeia Loro, Suco Betano, Posto Administrativu Same Villa iha loron Quarta (05/01/22).
 
 Objetivu husi hari’i tunel ne’e atu kontrola kualidade no kuantidade modo iha tempu udan no iha manufahi grupo Joventude hortikultura 2 maka simu tunel ne’e ho total hamutuk tunel 24.
 
Tuir reprezentante Ministro Octávio da Costa Monteiro de Almeida hateten iha nia diskursu katak, atividade ohin ne’e importante tebes atu oinsa ita bele dezenvolve ita nia agrikultura no bele fo oportunidade moris diak ba ita nia povo agrikultor sira tanba husi atividade agrikultura bele hetan rendimentu ba familia agrikultura, rendimentu ba munisipio no mos ba timor
 
Nia hateten, ba tinan ida ne’e foin lalais governo aprova ona dekretu atu fo subsidio alimentar ba fungsionarius publiku sira sei hetan aihan, aihan ne’e mai hosi produtu ita nia agrikultor sira, tanba ne’e maka ne’e oportunidade bot ida para ita nia agrikultor sira atu dezenvolve.
 
Iha programa ida tan maka merenda eskolar ne’e presija aihan atu fo hahan ba ita nia oan sira ne’ebe eskola no aihan ba ita hanesan povo babain ne’ebe nudar konsumidor labele halo toos ho natar ne’e ita presiza tebes.
Nia hatutan Tuir tekniku sira dehan katak tunel ida ho nia ekipamentus kompletu gasta osan hamutuk 750 dolares amerikanu.
 
Ita koalia sustentabilidade no kontinuidade, utilizasaun tunel ne’e permanente iha tempu udan ka bailoro bele kuda komoditi saida deit ezemplu tomate no modo sira seluk tanba normalmentu modo ita kuda iha bailoro maibe udan ho intensidade makas nia dodok, kresimentu ladun diak no nia kualidade ladiak tanba ida ne’e maka ita halo ho modelu tunel para kaulidade diak liu fali ema sira kuda babain ne’e.
 
Hau espera katak laos kuda ida ne’e deit hotu ona maibe kuda hotu ba faan hetan rendimentu grupu ne’e halo gestaun diak kuda fali komoditi seluk no tenke halo rotasaun para labele iha moras no peste maibe normalmente kuda iha tunel ne peste menus kompara ho sira ne’ebe kuda iha rai nakloke ne’e.
 Fotografia/Reni/INFO-MAP
Miniteriu agrikultura kontinua fo apoio nafatin hein katak ita hotu sei servisu hamutuk oinsa ita bele dezenvolve ita nia seitor agrikultura, ne’e hanesan motivasaun ida ita fo ba ita nia joven sira se hakarak moris diak buka servisu iha agrikultura tanba iha oportunidade bot tebes atu dezenvolve
 
Hau nia mensagem ba grupo sira utiliza didiak fasilidade ne’ebe ita iha tanba ne’e investementu ida ne’ebe fo ba itabot sira atu ajuda itabot sira nia grupo tanba governo fasilita ona tunel hanesan ne’e imi maka tenke utiliza halo didiak no tekniku sira sei mai fo orientasaun no husu bo director agrikultura servisu munisipio atu mai hare nafatin ninia kontinuidade no entrega ba Autoridade lokal hanesan xefe suco no xefe aldeia sira atu tau matan nafatin.
 
Prezidente Autoridade Munisipio Manufahi Arantes Isac Sarmentu, hatete iha diskursu katak hanesan servidor povo iha manufahi agradese bot tebes ba ministériu agríkultura ne’ebe apoio fundus ida ne’e hodi apoio grupo agrikultor sira no husu ba agrikultor sira simu no kuidadu didiak, tenke utiliza ho responsabilidade hodi dezenvolve aktividades agríkultura no mos bele hadia ekonomia
 
Entretantu Diretór Nasional DNAH, Lucio Romeu Ribeiru iha intervista esplika katak lansamentu tunel ohin loron ne’e reprezenta tunel ne’ebe hari’i tia ona iha munisipio 12 hamutuk 180 tunel ne’ebe preve orsamentu 135. 000 dolares amerikanu, Kompanha maka halo instalasaun to’o hotu depois ita halo lansamentu.
 
Ministeriu Agrikultura implementa programa hari’i tunel iha munisipio 12 ho total 180 unidade iha tinan fiskal 2021. Kada grupo hetan tunel pakote 1 hamutuk iha tunel unidade 12, Tunel pakote ida nia gastus 750 dolar amerikano no iha manufahi grupo Joventude hortikultura 2 maka simu tunel ne’e ho total hamutuk tunel 24.
 
Kriteria instalasaun tunel maka grupo tenke permanente, Lutu haleu, iha be’e sufisiente, utiliza tunel kontinua ba oin no halo gestaun orsamentu iha grupo ne’e rasik.
 
Andre Pereira de Sousa nudar Xefe grupo Hakmoton hatete iha intervista katak grupo hakmoton establese iha 2019 ho membru grupo hamutuk 11, kompostu husi mane 8 no feto 3.
 
Mesmu seidauk sente nia resultadu maibe ami kontente halao atividade ida ne’e tamba uza tunel. Iha ne’e ami sei kuda tomate, kolleta tia ami sei halo rotasaun hanesan kuda mostarda, alfase, repolho no Pitcai.
 
Seremonia lansamentu entrega tunel ba grupo juventude ne’e kontinua ho entrega fini modo no ekipamentus hortikultura ba membru grupo sira no Atividade ne’e hetan partisipasaun husi Prezidente Autoridade Munisipio Manufahi, Komandante Polisia Munisipio Manufahi, Komandante FFDTL Postu Betano, Diretór DSAM Ainaro, Diretór DSAM Aileu, Diretór DSAM Manufahi ho nia Fungsionariu hotu no Agrikultor sira hotu.

Parseiru ho

© 2017 Ministeriu Agrikultura no Peskas. All Rights Reserved. Designed by IT MAP

Search

Login