Notisia

DNPE Aprezenta Rezultadu Peskiza Iha Munisipiu Baucau

Estrela inativaEstrela inativaEstrela inativaEstrela inativaEstrela inativa
 
Fotografia/E
Baucau- Ministériu Agríkultura e Peskas (MAP) liu hosi Dirasaun Nasional Peskiza e Estatistika (DNPE) halo aprezantasaun ba rezultadu Peskiza hosi peskizador sira ne’ebé maka hala’o ona durante tinan ida nia laran.
 
Iha aprezentasaun ne’e peskizador sira aprezenta rezultadu maka hanesan kona-bá hare natar, hare rai maran, hare mean Lokál, repollu funan, du’ut funan mutin, Aflatoxin batar no oinsa uza hare kulit sai ba adubus hodi kuda fehuk midar. Sorumutu ne’e partisipa husi Reprezentante Prezidante Autoridade Munisipio Bauca Moises Lobato Pereira, Diretor Geral Cooperação Dezenvolvimentu e Instituição César José da Cruz, Diretor DNPE Deolindo de Oliveira, funsionario husi DNPE, ajensia CRS no mos to’os nain sira husi Aldeia Darasula, Seremonia ne’e hala’o iha loron Tersa (28/12/21) iha Suku Gariuai Posto Administrativu Baucau Villa.
 
Iha entrevista DG CDI César José da Cruz esplika katak, Objetivo husi surumutu ne'e atu hare konaba rezultadu peskiza ne'ebe maka durante ne'e peskizador sira halo ona iha munisipio tolu hanesan Baucau, Viqueque no mos Manatutu. Sira mos halo peskiza ba variedade lobuk ida no dezafiu barak maka sira hasoru no ita buka oinsa maka ba oin atu lao diak liu tan.
 
“Konaba ba sira nia peskiza teknikamente diak no presiza kompete buat barak liu-liu literatura ne'ebe haforsa katak sira nia peskiza ne'e los, e dala barak peskizador sira presiza buat barak tanba ne'e mak ohin hau koalia ona ho Diretor sira hodi hare tok orsamentu oinsa mak bele atu preve balun iha ne'eba hodi teste buat sira ne'e.”tenik Dg César
 
Nia akresenta, to'os nain sira bele pratika mais neneik tanba ita mos tenki konta mos forsa de trabalho forsa de kada Agrikultor hodi halo atividade sira ne'e, no Saida mak Agrikultor sira halo tuir sira nia kapasidade tanba peskiza ne'e laos buat bo'ot maibe sira presiza.
 Fotografia/E
Iha fatin hanesan Diretor DNPE Deolindo de Oliveira hateten katak, atividade ne’e hanesan kontinuasaun husi Betano nian, peskizador sira aprezenta rezultadu peskiza ne’ebe maka sira halo ona durante tinan ida.
 
Nia informa sorumutu ida ne’e hetan partisipasaun masimu husi to’os nain sira nune’e sira mos bele hare diretamente rezultadu peskiza ne’ebe maka hatudu husi peskizador sira, iha aprezentasaun ne'e mos iha varios topiku balun halo husi area hare nain, balun iha area fehuk nian no balun iha fore mungu. Fiar katak ita mos sei promove nafatin buat hirak ne'e para oinsa mak abitua peskizador sira bele kreativo hodi dezenvolve sira nia talentu para sira bele sai ema profisional iha peskiza ne'e.
 
Nune’e mos Responsavel sentru Peskiza Dara-sula João Bosco Belo hateten katak, aktividade ohin ne'e primeira vez ba sira interesante tebes ba sira no fatin ne'e hari kedas iha 2007 ate agora foin mak primeira vez hala’o aprezentasaun hanesan no agora Diretor DNPE mos ajuda ona sira hodi dada be’e ba kedas iha sentru refere. Ne’e fasil ona ba sira atu bele hala’o sira nia atividade.
 
“Ami halo aktividade kona-ba oinsa kuda fore- rai hetan variedade ne'ebe introduz husi liur iha sanulu resin lima mak hanesa batar, aifarina, fehuk, no seluk tan husi buat sira ne'e hotu hapara tanba bee la iha maibe ami mos servisu hamutuk ho parjeiro dezenvolvimentu Ai-Com no suporta makas tebes ami oinsa mak bele halo peskiza liu-liu kona-ba uza hare latun ne'ebe iha ami produz sai fali ahukdesan bele uza ba aihoris no komunity ne'ebe ami halo kona-ba hare, batar, hortikultura karik modo.Iha ne'e maioria area to'os nain sira mai husi dara sula ho triloka mak barak ita nia Diretor sira husi Munisipiu suporta makas tebes, maibe ami mos konvida mos ajensia balun maibe la partisipa maibe husi ajensia CRS mai partisipa duni oinsa fo informasaun mai atu bele kompleta no buka solusaun ne'ebe mak diak liu tan ba futuru.” hateten João Bosco
 
Nune’e mos to'os nain Carlos da Costa Freitas, senti kontenti tebes ho aprezentasaun ne’ebe maka aprezenta husi peskizador sira, tanba nia bele aprende ona buat balu husi aprezentasaun ne’ebe maka iha atu nia bele aplika fali iha nia to’os ou natar.

Parseiru ho

© 2017 Ministeriu Agrikultura no Peskas. All Rights Reserved. Designed by IT MAP

Search

Login