Projetu ida ne'e fo orientasun ba iha merkadu oinsa mak ita bele hadia diak liu tan ita nia sistema ba iha produsaun fos ninian, ita haree mós parte irrigasaun ninian oinsa bele jere diak liu tan jestaun irrigasaun, e oinsa mak ita nia koperasaun servisu diak ho Centru Logistica Nasionál (CLN) ba oin lao diak liu tan.

 

Nia hatutan, espera katak liu hosi ita nia enkontru ida ne’e, ita sei aprezenta saida mak ita halo no analiza ba buat ne'ebe ita implementa ona, e saida mak sei menus ita bele hadia diak liu tan, tanba ne'e mak enkontru ohin ne'e hanesan oportunidade diak atu diskuti diak liu tan, hodi bele kontinua nafatin hala'o ita nia aktividade sira ne'e ho diak to'o atinje duni ita -nia objetivu ne'ebe mak ita iha liu hosi projeitu ida ne'e.

 

iha fatin hanesan, Xefe Reprezentativu JICA TL Goto Ko apresia tebes ho atividade sira durante ne’e, maske hasoru hela pandemia COVID-19, ho situasaun sira hanesan ne’e ekipa projeitu buka dalan ou alternativu liu hosi hadia ninia sistema jestaun, no nia fiar katak esforsu sira ne’ebe maka koko bele aprova lia fuan ida ne’ebe maka dehan katak, “buka no halo, saida maka ita bele halo maske iha situasaun difisil.

 

Nia hatutan, hanesan ita hatene katak tempu udan hahu tiha ona, no ida ne’e tempu ne’ebe maka hanesan oportunidade diak ba ita nia Agrikultór sira hodi hahu sira nia atividade kultivasaun hare.

Agrikultór sira balu mos hahu tiha ona prepara sira nia natar no dalaruma sira sei komesa kuda hare iha fulan ida ne’e ou inisiu fulan oin. Atu garantia no mos hasa’e produsaun fos rai, importante tebes ba MAP no mos nia ekipa iha rejional sira kontinua promove atividade husi extensionista sira, ofisiais irigasaun sira no mos sira nia koperasaun iha kada setor.

 

Nune’e mos koodenador Projeitu Hasa’e Rendimentu Uma Kain Agríkultor liu husi hasa’e produsaun fos rai, Amaro Ximenes hateten katak, Sorumutu ida ne’e tinan ida halo dala ida hodi koalia no hare kona-ba plano saida mak sei halo iha tinan 2021 nia laran.

 

Nia informa liu tan, atividade ne’e iha nia komponente ne’en (6) maka hanesan komponente 1 ninia objetivu oinsa mak hadia sistema de kultivasaun hare, komponente 2 oinsa hadia sistema de irrigasaun no oinsa mak hadia asosiasaun sira ne'ebe mak ita kria ona uja bee, oinsa mak ita bele halo manutensaun ba ita nia kanal irrigasaun sira ne'ebe mak at, oinsa mak ita bele halo manutensaun ba irrigasaun ne'ebe mak nakonu ho rai henek, no tahu, komponente 3 ita koalia kona-ba produtividade hirak ne'ebe mak produz husi komponente 1 ne'e oinsa mak nia nakfila sai osan, ne'e duni komponente 3 ne'e ninia funsaun mak liga ho ema emprezariu sira ka liga ho ema sira ne'ebe mak sosa nain hanesan loja, super merkadu sira, hotel sira, restaurante sira para bele sosa fos ka hare ne'ebe mak produz ona husi komponente 1 ne'e, ba komponente 4 koalia kona-ba oinsa mak Governu ne'e servisu hamutuk ho projeto ida ne'e hodi bele sosa ita nia hare sira iha ita nia produtor sira no distribui fila fali ba ita nia ema sira mak presija foin daun-daun ita bolu Sezta Baik ne'e, komponente 5 nia funsaun atu alarga tan fila fali sucesu sira ne'ebe mak iha area projeto ida ne'e nian ne'ebe mak hanesan iha Baucau, Maliana sucesu sira ne'e oinsa mak bele lori ba iha irrigasaun sanulu resin 11 ne'ebe mak agora dau-daun Ministerio Agrikultura E Pescas halo ona, ne'e duni foin dau-daun ita lori projeto ne'e ba iha Suai iha irrigasaun Bluto ita ba iha irrigasaun Casa no Bonuk iha Ainaro, ba mos iha larisula Baucau, Iha Oebaba ne'e iha Suai, no mos ita lori ba Viqueque sucesu sira ne'ebe mak ita hetan iha komponente 5 ne'e nia servisu, komponente 6 ne'e oinsa mak iha Lider ida para atu lidera komponente hot-hotu para atu bele hadia relasaun ho Financas oinsa mak ita halo planu ne'ebé mak diak no tau osan ne'e oinsa para dezafius sira ne'ebe mak projeitu ne'e hasoru karik ita bele hadia ba iha futuru.