Iha entrevista Diretora Jerál Agríkultura e Horikultura MAP, Maria Odete do Céu Guterres, hanesan reprezentante Ministru hateten katak, lansamentu kuda hare rai maran ne’e atu bele promove nafatin hare rai maran iha Munisipio ida ne’e. Seremonia Lansamentu kuda hare rai maran ne’e hala’o iha Sexta (26/11/21) iha Suku Manehat Posto Administrativu Bariki Munisipio Manatutu.

 

Nia esplika hare rai maran ne'e ita kuda ona iha fatin barak liu-liu iha kosta sul Munisipiu Viqueque iha area kultivo ne'e bo'ot, maibe ita buka meius oinsa atu promove tan iha area seluk ne'ebe mak nia agro klima ne'e fornese diak, fo mos oportunidade atu ita bele kuda tan hare rai maran. Ita la konsentra de’it iha fatin ne'e, ita mos fo ona oportunidade ba ita nia komunidade, oinsa ita bele dezenvolve ita nia hare rai maran ne'e iha fatin ne'ebe potensial atu ita bele kuda hare rai maran.

 

Nia akresenta, Fini refere mai husi komunitaria ou to'os nain, tanba ne'e maka Ministériu hanoin ba oin oinsa maka ita bele dezenvolve fini ne'e ho didiak atu bele adaptasi ba iha ita nia kondisoens klimatiku ne'ebe mak ita iha. Nia rezultadu empresipiu diak ita hare iha merkadu ema barak iha nivel konsumidor sira barak mak gosta han hare rai maran, fos mean, fos metan maibe produtu sira ne'e sentifikamente ita halo peskiza para ita bele indentifika lolos.

 

Iha fatin hanesan Xefi Departamentu Mekanizasaun produsaun Alimentar e postkoileta Suzana Vilanova, esplika katak, diferensia entre hare rai maran no hare natar ne’ebe uza bee kuaze hanesan, maibe hare natar ita presiza bee no irrigasaun, hare rai maran ita kuda iha tempo kuda batar, ita bele kuda hamutuk hotu ho varidade sira seluk hanesan fore-rai, batar, fore no seluk seluk tan no distansia kuda 25×25 cm nia iha diferensia tanba kuda iha rai maran.

 

Nia akresenta, durasaun kolleta hare rai maran fulan tolu to fulan ha'at depende ba nia variedade, tanba ita kuda iha rai maran ne'e mak ita bolu hare rai maran, Nia prosesu komesa husi fila rai, kuda direita ba rai, hamos du'ut no ita hein peste ruma kona ita bele rega ho aimoruk hanesan ho hare natar nian.

 

Kuda hare rai maran ne'e hanesan inisiativa ida husi natar nain sira maka konvida ita no halo linha kordenasaun ho Diretor Servisu Agíkultura Munisipio ohin ita bele halo lansamentu kuda hare rai maran atu nune'e ita bele dezenvolve ita nia produsaun lokal.

 

Nune’e mos Agríkultor Apolinario da Costa, senti kontenti tebes ho atividade ne’e, tanba Governu bele rekonhese ona sira nia to’os hodi kuda hare rai maran iha sira nia to’o, nia mos husu atu Governu kontinua tau matan nafatin ba sira iha prosesu sira tuir mai.