Notisia

DNEA Asina Akordu Ho Rádio Komunidade 3

Estrela inativaEstrela inativaEstrela inativaEstrela inativaEstrela inativa
 
Fotografia/Elsio Jong/INFO-MAP
Ministériu Agríkultura e peskas (MAP) liu husi Dirasaun Nasional Estensaun Agríkola (DNEA) asina nota de entendimentu ho Rádio Komunidade munisipio tolu (3) mak hanesan; Ainaro Rádio Komunidade “Radio Tatamailau”, Bobonaro “Radio Komunidade Maliana” no mos Lautém ho Radio komunidade Lospalos “Vox Populy”.
 
Objetivu husi asina nota entendimentu ne’e atu fo sai informasaun no atividade ministeriu agrikultura nian no tekniku konaba Pratika Agríkultura Diak ba Agríkultor sira iha Munisipiu.
 
Diretór Jeral Cooperasaun Dezenvolvimentu Instituisaun César José da Cruz nia diskursu iha Rádio komunidade Lospalos hateten katak, liu husi programa radio ida ne’e atu bele habelar liu tan informasaun ba ita nia Agrikultór sira hodi bele hala’o servisu iha area Agríkultura diak liu tan, tanba baze fundamental iha Timor mak Agríkultura laos mina.
 
Komunikasaun mak importante tebes iha ita nia moris, liu-liu se ita hakarak atu dezenvolve agríkultura iha ita nia rain ou Munisipio Lautem. Hau fiar katak ho ita asina akordu ida ne’e, Jestor Radio Komunidade no mos Diretor servisu agrikultura munisipio Lautem sei koordena diak liu tan, atu nue’e ba oin ita nia kooperasaun sei sai metin liu tan. Agora dadauk ita nia kontratu ba fulan tolu (3) de’it, fiar katak ba oin sei kontinua nafatin programa ida ne’e hodi fo nafatin informasaun saida de’it ba ita nia Agríkultura sira.
 
Nia akresenta, Fiar katak ho informasaun sira ne’e ita nia agrikultór sira bele hala’o sira nia atividade tuir tekniku ne’ebe maka iha. Ezemplu pratika agrikultura diak ne’e mos maneira ida bele fo sai liu husi media sira hanesan radiu, Televizaun, Jornal, revista no mos husi website ruma katak, pratika agrikultura diak maka ida ne’e. Diretor sira bele hare oinsa maka bele uza pratika agrikultura diak ba ita nia agrikultor sira, laos agrikultor deit ba ema hotu-hotu ne’ebe maka iha interese ba hasae produtividade agríkultura.
 Fotografia/Elsio Jong/INFO-MAP
Nia salienta, esperansa katak ho asina akordu ida ne’e laos ba fulan 3 ka fulan nen de’it maibe sei kontinua tinan oin no habelar tan ba munispiu sira seluk atu haklaken diak liu tan ita nia informasaun ba agrikultór sira.
Iha fatin hanesan , Jestor Radio Komunidade Lospalos Vox Populy Nascimento Provincial hato’o Agradese bo’ot ba Ministériu Agríkultura e Peskas (MAP) liu-liu ba Dirasaun Nasional Estensaun Agríkola tanba bele estabelese programa ida ne’e, atu bele habelar informasaun ba ita nia agrikultór sira, espera sira bele halo tuir informasaun tekniku ne’ebe maka iha, hodi bele hasae sira nia produtividade agrikola ninian.
 
hakarak informa katak programa agrikultura ida ne’e ami sei fo sai ba komunidade Lautem iha kada Segunda tuku 7 dader no repete fali iha tuku 8.30 kalan no ami sei fo sai fali iha kuarta dader tuku 7 sei repete fali iha tuku 8.30 kalan.
Iha sorin seluk Diretór Radio Komunidade Maliana Filomeno Magalhães mos hateten, programa ida ne’e primeira vez estabelese iha Rádio komunidade Maliana tanba ne’e ami sente kontenti tebes atu kompleta mos lian ida dehan katak hakbesik liu tan informasaun ba komunidade liu husi kanal media sira no liu husi programa ida ne’e bele apoiu mos iha area publikasaun ba programa Agríkultura ne’ebe maka parte Ministériu Agríkultura hala’o hodi dezenvolve no haburas povo agrikultor sira nia moris iha munisipiu Bobonaro.
 
“Iha biban ida ne’e ami hakarak agradese ba Dirasaun Nasinaol Estensaun Agrikola ne’ebe hakarak hatutan informasun liu husi kanal ida ne’e tanba munisipiu tolu hanesan Liquica, Ermera no Covalima mos akapta informasaun iha kanal ida ne’e no informasaun agrikultura husi radio komunidade Maliana sei fo sai iha kada semana iha Loron segunda oras tuku 7.00 otl dader.”tenik Filomeno
 
Programa ida ne’e husi Násional espesifiku liu ba nivel altu nian, maibe ami husu se bele karik husi Ministério Agríkultura Munisípiu hanesan implementador ba aktividade munisipiu nian husu atu ita bo’ot sira priense aktividade saida mak ita bot sira halo ba ita nia komunidade agrikultor sira nune’e bele partilha fali informasaun ne’e iha radio komunidade atu nune’e agrikultor sira seluk bele rona.

Parseiru ho

© 2017 Ministeriu Agrikultura no Peskas. All Rights Reserved. Designed by IT MAP

Search

Login