Liquiça-Ministériu Agríkultura e Pescas (MAP) liu husi Diresaun Nasionál Estensaun Agrikola (DNEA) fó formasaun ba Estensionista Suku sira konaba monitorizasaun I informasaun atu nune’e bele halo aprosimasaun diak ho Grupu Agrikultura sira, iha Postu Admintrativu Maubara.

 

Diretór Jerál Cooperação e Dezenvolvimentu Instituisaun, César José da Cruz iha nia entrevista iha Sentru NIFA Peskas Maubara hateten, objetivu hosi formasaun ne’e hanesan refreshing ida ba estensionista sira, atu hanoin fila- fali servisu ne’ebe maka konaba estratejia komunikasaun oinsa maka sira bele hato’o mensajen ou informasaun ne’ebe maka diak ba Agrikultór sira. formasaun ne’e hala’o iha loron Tersa 14-15 Setembro, iha Centro NIFA Pescas Maubara.

 

“Ita espera katak depois de formasaun ne’e estensionista sira ne’e bele hato’o informasaun ne’ebe maka lolos ba Agrikultór sira konaba servisu lolos saída maka Agrikultura sira nian. No saida maka atu produs sira tenki hatene ona.”tenik DJ César

 

Iha fatin hanesan, Staff Senior Fortunato Pinas hatutan katak, formasaun ne’e sei hala’o loron rua nia laran ba ita nia estensionista sira, liu-liu ba iha Munisipiu Liquiça, formasaun ne’e hanesan kapasitasaun ba ita nia estensionista sira hotu, atu oinsa sira bele eleva sira nia esperiensia nomos bele hatutan tan ba iha ita nia Agrikultura sira.

 

“Materia ne’ebe maka iha formasaun ne’e hanesan Monitorizasaun I Informasaun, ne’e hanesan hosi estensionista ba iha Suku no iha Suku mai iha estensionista sira, atu nune’e sira bele apar ka komprende malu ho agrikultór sira.” Esplika Fortunato

 

Durante Diresaun Nasionál Estensaun Agríkola servisu hamutuk ho parseiru ACIAR no TOMAK, hodi fó fromasaun ba estensionista iha Munisipiu Hotu.