Bobonaro- Ministériu Agríkultutra e Peskas (MAP) liu husi Diresaun Násional Agríkultura e Hortikultura (DNAH) halo lansamentu kuda Ai-oan frutikultura hamutuk 554 ho espesie Tanjerina 277 no mos Rambutan 277 ba Grupu Agrikultura sira iha Musipiu Bobonaro.

 

Atividade kuda ai-oan ne’e ofisialmente lansa husi Ministro MAP Pedro dos Reis, akompanha mos husi Prezidente Autoridade Munisipiu Bobonaro Ernesto de Oliveira Barreto, funsionariu husi MAP Nasional no mos Munisipiu, hetan mos seguransa masimu husi FFDTL no mos PNTL Munisipiu Bobonaro, lansamentu ne’e hala’o iha loron Tersa (24/08) iha Aldeia Ua’at Suku Ritabou Posto Administrativu Maliana, Munisipiu Bobonaro.

 

Tuir Ministro MAP Pedro dos Reis hateten iha nia entrevista katak, lansamento kuda Tanjerina ho Rambutan hanesan pilotu ida iha fatin ida ne’e no ai-horis hirak ne’e Ministériu maka distribui ba iha Grupu agrikultor sira no sira mos iha preparasaun ne’ebe maka masimu tebes hanesan halo lutu, prepara be’e no ita hare katak sira mos iha vontade atu kuda tanba ne’e esperansa bo’ot ita nian maka tenki kuidadu aihoris oan sira ne’e ho didiak atu nune’e bele hatutan mos ba ita nia agrikultor sira seluk.

 

“Ita nia Nasaun mos moris iha Independensia nia laran,durante ne’e ita dependente de’it husi rai liur. Tanba ne’e maka ita nia Governo liu husi MAP hakarak atu kuda kualker variedade saida de’it, ida ne’e tempu ona ita tenki halo. Se lae dala barak ita propoem ita nia orsamentu barbarak maibe osan sira ne’e kuaze sai hotu ba rai liur, tanba ne’e maka ohin ami mai kompletu hahu husi MAP ho nia ekipa ho Prezidente Autoridade Munisipiu Bobonaro ho nia ekipa hotu, ida ne’e signifika katak ami bele garantia maske ida ne’e hanesan pilotu ida, garantia katak ba oin ita sei lao diak liu tan. Ministériu prontu atu prepara nia viveirus sira atu bele ajuda nafatin ita nia Agrikultor sira.” tenik Ministro MAP

Nia hatutan, atu garante aihoris sira ne’e depende ba Agrikultor sira, karik sira iha vontade tomak hodi hala’o sira nia atividade sira hanesan ne’e sei bele garantia ba futuru, tanba antes Ministériu atu distribui ai-horis hirak ne’e ekipa tekniku mos sei mai halo identifikasaun ba rai no hare mos vontade tomak husi agrikultor sira maka hafoin Ministériu mai halo distribuisaun aihoris hirak ne’e.

 

Iha fatin hanesan Prezidente Autoridade Munisipiu Bobonaro Ernesto de Oliveira Barreto hatutan katak, iha nia parte nia senti diak no kontenti tebes ho atividade ida ne’e tanba bele apoiu ona aihoris hirak ne’e ba grupu agrikultor sira, tanba ne’e nia mos la haluha husu nafatin ba iha MAP atu kontinua mos fahe aihoris sira ne’e ba ita nia agrikultor sira seluk, atu nune’e agrikultor sira seluk mos bele kuda aihoris hirak ne’e.

 

“Depende orsamentu, karik orsamentu ne’e iha ona, husi Munisipiu mos bele kria rasik viveirus, agora dadauk ita kuda ne’e husi Nasional, maibe ba futuru planu ne’e iha tiha ona, tenki prepara mos viveirus hodi prepara mos ba rai ne’ebe maka agora dadauk mamuk hela, atu nune’e bele evita rai labele halai. Ami mos halo ona enkontru ho Diretor MAP, atu nune’e iha fulan Jeneiru no Fevereiro ne’e hakarak ga lakoi tenki kuda ona no ita mos labele kompara ho ida agora ne’e tanba ida ne’e komunidade sira rasik maka ba husu no sira mos garante ho be’e ne’ebe maka sira iha sei bele auguenta to udan monu rai.” dehan prezidenti Autoridade munisipiu Bobonaro

 

Nia akresenta, Konaba fatin ita nia tekniku sira maka sei identifika no fila fali mos ba komunidade ida-idak sira nia vontade, atu nune’e ho aihoris sira ne’eba maka MAP distribui labele saugati de’it, ita fiar katak ohin ita halo kultivasaun tempu ruma nia laran ita mos sei halo kolleta ba aifuan sira ne’ebe maka ohin ita kultiva ona.

 

Entretantu Chefe Grupu Agostinho Gonçalves senti kontenti tebes ho apoiu ida ne’e, iha nia parte nia mos hakarak hato’o agradese barak tebes ba MAP tanba bele atende ona sira nia proposta.