Notisia

DNPE enkontru ho peskizador sira iha sentru Peskiza Betano

Estrela inativaEstrela inativaEstrela inativaEstrela inativaEstrela inativa
 
 Fotografia/Eby Magno/INFO-MAP
Manufahi-Ministériu Agrikultura e Peskas (MAP) liu husi Diresaun Nasional Peskiza e Estatistika hala'o enkontru ho funsionáriu peskizador no parseiru Ai-com hodi koalia konaba sistema halo to'os no hamos du’ut uza aimoruk Herbisida.
 
Iha Intervista ho Diretor Nasional Peskiza Deolindo de Oliveira hateten, Aktividade vizita to'os nain ne'e, ita hare liu ba oinsa uza aimoruk Herbisida, ita mos halo peskiza atu uza ba to’os, maibe kuandu ita rega kedas ba rai nia kresimentu sei la diak, maibe ita rega tiha hafoin fila rai nia reziltadu hatudu nia kresimentu diak tebes. Atividade refere Hala’o iha loron Qinta (12/08) iha salaun sentru peskiza Betano.
 
Deolindo esplika, ekipamentus ne'ebe ita uza mak hanesan tratores no aimoruk Herbisida uituan atu nune'e ita bele aplika iha kampu, karik ita aplika ona entaun bolu fali ita nia komunidade sira hodi hare sistema ne'ebe ita uza ne'e diak ou ladiak, quando ita utiliza diak entaun ita mos rekomenda fali ba ita nia komunidade sira bele uza nafatin Herbisida ne'e.
 
”Difikuldade ne'ebe ita nia funsionariu peskizador sira infrenta mak hanesan, menus de lina kordenasaun, implementasaun atividade dalaruma ita kontra ita nia tempo bazeia ba sistema ezekusaun orsamentu, entaun ita mos koko hadia buat balun atu nune’e difikuldade sira ne'ebe mak ita sente ladun diak ita bele halo mudansa, realidade konaba to'os agora lao diak tebes no ita mos kuda fore mungu, batar no fehuk no planu ba tinan oin sei kontinua nafatin no buka meius oinsa atu ajuda konbustivel hodi uza ba tratores hodi fila rai ba kuda ai-han ne'ebe iha atu nune'e ita nia to'os ne'e buras ho ai-han. “ tenik Deolindo
 
Iha fatin hanesan Diretor servisu Munisipiu Manufahi Aurelio M. Correia Vidal hatutan, objetivu husi enkontru ne'e atu fahe informasaun ne’ebe efisente oinsa halo utilizasaun ba aimoruk Herbisida, tanba ita hotu hatene katak aimoruk herbisida agora ne'e espalla iha merkadu barak tebes, ita nia Agrikultor sira mos hatene katak aimoruk herbisida ne'e hamate du’ut no halo kaman sira nia servisu.
 
“atu labele afeta negativo ba ita nia ambiente mak ita tenki halo enkontru hodi fahe informasaun ba peskizador sira, tanba ita nia Estensionista sira maka sai hanesan ponte ba peskizador no Agrikultor sira, atu nune’e sira bele hatene informasaun ne’ebe maka lolos hodi utiliza aimoruk herbisida ne’e ho diak no iha responsadilidade.” hateten Aurelio
Fotografia/Eby Magno/INFO-MAP 
Nia Aumenta, preokupasaun ne'ebe ita nia funsionariu peskizador sira infrenta maka hanesan, Tratores ne'ebe menus no Governu la halo manutensaun, ne’e afeta tebes ba ita nia Agrikultura sira nia servisu, no preokupasaun seluk maka uma ne’ebe ita nia peskizador sira halo oras ne’e kondisaun la diak on no ita nia Governo la halo rehabilitasaun, entaun ida ne’e bele fo mos impaktu ne’ebe la diak ba sira nia kondisaun sai la saudavel.
 
Entretantu koordenador sentru peskiza Betano Rafael Feliciano, senti kontenti tebes ho enkontru ida ne’e tanba bele hetan informasaun konaba oinsa atu utiliza aimoruk herbisida, nia kompara ho tinan kotuk sira la hetan inkontru no formasaun ruma tanba de’it Pandemia Covid-19, tanba ne’e nia senti orgullu ho prezensa DNPE no mos Parseiru Ai-Com ne’ebe maka bele fahe ona formasaun refere ba sira.
 
Nia informa, atividade ne’ebe maka sira halo iha tinan ne’e maka hanesan, adaptasaun konaba ai-han oioin hanesan Batar, Foremungu Kiukay, Koto, Duhaen(Lehe), Tunis no seluk tan. objetivo hari sentru peskiza Betano ida ne’e, atu bele halo peskiza no adaptasaun ba fini ne'ebe introduz husi rai liur ho lokal, halo mos peskiza agronomia no konservasaun, produs fini breeder sepeda ho nukleus seeds. Sentru peskiza Betano mos sai hanesan fatin treinamentu ou fahe informasaun ba Agrikultor sira.
 
Total funsionariu ne'ebe destaka iha sentru peskiza Betano hamutuk 22, funsionariu permanente 6 funsionariu kontratadu 16. Alende remata enkontru ne'e, Diretor DNPE no Parseiru Ai-Com akonpaña hamutuk ho funsionariu peskizador no estensionista sira hodi ba visita kedas to'os iha sentru peskiza Betano.

Parseiru ho

© 2017 Ministeriu Agrikultura no Peskas. All Rights Reserved. Designed by IT MAP

Search

Login