Ministru (MAP) Pedro dos Reis hateten iha nia intervista katak, ho prezensa ita nia aman Eis presidente RDTL José Ramos Horta mai hamutuk ho ita nia agrikultor sira hotu, sai hanesan inisiativu ida ne’ebe fanu fila fali vontade husi MAP no ita nia agrikultor sira tomak atu servisu makas liu tan hodi bele hasae ita nia produsaun rai laran, ita laos para deit ho 24 hektares ne’e, ba futuru ita sei servisu makas liu tan no sei halo exportasaun uza teknolojia pratika agrikultura diak liu tan.

 

Ba oin irigasaun iha tiha ona entaun ita presiza hadia tan ita nia barazen, tanba mota Bebui wainhira tempo udan, mota bo’ot tebes, tanba ne'e mak Ministeriu iha ona planu katak tempo badak sei halo barazen iha Bebui, laos atu halo hotu maibe halo tuir kapasidade ne'ebe mak ita nia orsamentu preve tiha ona, sei tuir tekniknu Ministeriu no ADN sei ba hare no tempo badak sira sei ba foti medidas oinsa atu salva ba iha natar sira ne'ebe mak iha. Hateten Ministro MAP

 

Governante ne'e esklarese, maske ita iha rai bokur barak iha mos natar luan, maibe ita sei uza sistema tradisional, se lae ita nia produsaun sei la sae, tanba ne'e mak Ministeriu ho ninia estrutura tomak hamutuk ho paseiru atu opta no kria pratika agrikultura diak, entaun ninia sistema halai natar tenki tuir ninia padraun ho tekniku ne'ebe iha, no ita mos uza adubus organiku Poc nasa, Super nasa no Harmoink, uza pratika Agrikultor diak, ita fiar katak ho natar ne'ebe luan ita sei rezolve ita nia problema seguransa ai-han iha ita nia rai laran.

 

Tamba ne'e mak ohin ita hotu akompaña, ami mai laos estrutura Ministeru Agrikultura no Pescas deit, maibe ami mos konvida ita nia Parseiru dezenvolvimentu sira hanesan WFP no CLN atu bele mai partisipa hotu, hodi nune'e ita bele kolabora hamutuk hare ita nia produsaun bele naton maibe ita tenki lori sae atu nune'e vontade inan aman Agrikultor sira bele iha produsaun nafatin. afirma Ministro MAP.

 

Iha fatin hanesan Eis Prezidente Republika José Ramos Horta hakarak hato'o ninia parabéns ba MAP ho nia Parseiru dezenvolvimentu hanesan WFP no Parseiru sira seluk ne'ebe fo tulun ona ba Governu liu husi MAP, durante ne’e nia rezultadu hatudu diak tebes, Eis Diplomata ne'e sempre akompaña MAP nia servisu tomak ne'ebe durante ne'e hala'o iha Munisipio sira hanesan, Atabae, Baucau, no Suai nia rezultadu hatudu diak teb-tebes, tanba MAP ho nia ekipa tekniku sira servisu maka'as tebes, hodi mobiliza no inspira hodi fo apoiu ba Agrikultor sira no hetan produsaun diak tebes.

 

Eis Prezidente da Repúblika ne’e mos hato’o nia Agradece ba Governu no Parseiru sira nia tulun halo ona armazen iha Natarbora hodi bele rai fos no hare, motivasaun primeiru mak ita ida idak tenki hatene iha ai-han no hahan mak ita nia familia bele moris, se bele kada familia auto sufisiente independente iha Timor tomak no Governu nia inisiativa atu fo tulun ba tekniku sira hodi bele sosa fos no produsaun ne'ebe liu husi procesu sesta bazika.

 

Iha sorin seluk Diretor servisu Agrikultura Municipiu Viqueque Carlos Pinto, senti orgulho tebes ho prezensa Eis Prezidente José Ramos Horta ne'ebe akompaña husi Ministru MAP hodi ba kolleta hare iha postu administrativu Uatulari.

 

Carlos hatete, Municipiu Viqueque iha potensia ne'ebe bot tebes iha produsaun fini komersial 24 hektares no kolleta mos hare nakroma ne'ebe uza adubus organiku Poc nassa, Super nassa hamutuk 80 hektares, iha estensionista 38 no nain 6 sira koloka ba iha postu Uatulari, Sira ho tekniku ne'ebe iha hamutuk ho Parseiru sira servisu hamutuk oinsa atu hasae produsaun hare iha municipiu viqueque. Uatulari iha irrigasaun ne'ebe aproveita hosi mota Bebui, Ossu, no mos iha Viqueque vila.