Díli- Funsionário Ministériu Agríkultura e Peskas (MAP) hamutuk ema 84 simu Vasina Astra Zaneca (AZ), ho objetivu hasa’e imunidade isin atu bele luta kontra moras Covid-19 iha Timor-Leste. Atividade refere hala’o iha loron, 24/04 iha salaun MAP Comoro.
iha intervista Diretóra Jerál Agríkultura e Hortikultura, Maria Odete do Ceú ba hateten, objetivu simu vasina Astra Zaneca (AZ), ne’e inisiativa rasik hosi Ministériu, tanba ho hanoin ida katak, Ministériu MAP Servisu movél, ita lahela hakmatek tanba servisu barak mak ita la’o iha terenu.
Odete esplika, aproveita husu ajuda ba Minitériu Saúde (MS), hodi halo Vasina ba Funsionário ou tekniku sira, ba faze dahuluk no faze daruak atu bele garante imunidade diak hodi luta kontra moras Covid-19, nune’e saúde diak no livre hodi bele halo servisu.
“ami iha responsablidade morál hakarak apela ba kolega Funsiónario sira atu bele simu mós vasina AZ, ita husu atu halo Vasina AZ ba ema atus ida (100), maibe depende ba ema idak-idak atu partisipa, no ekipa saúde nia atendementu ba nain hira ne’e depende”. Dehan Diretóra Jéral Agríkultura Odete Maria do Ceú
Iha fatin hanesan, Diretóra Saúde Munisípiu Díli, Agustinha da Costa esplika, bazeia ba pedidu hosi Ministériu ba iha Ministériu Saúde (MS), atu fó mós asistensia vasina AZ ba funsionário MAP ne’e bele asegura sira nia saúde hodi servisu ho diak hodi atende populsaun sira.
Agustinha haktuir, Vasina faze dahuluk hafoin liu fulan rua kontinua ba faze daruak, data ba segundu faze hakerek ona iha kartaun kinur, neduni ema ida-idak mak kuidadu kartaun kinur ne’e atu labele lakon hodi Vasina fila fali iha fulan Juñu.
“vasina ne’e rasik la obrigtório, ho konsensia voluntário ba ema idaidak katak vasina ne’e importante mak foti dalan voluntário atu halo vasina hodi proteze ita nia an, familia, no komunidade”. Tenik Agustinha
Iha sorin seluk, Diretór Nasionál Tekniku Agríkola, ipolito da Costa hafoin simu Vasina esplika, Vasina AZ ne’e hanesan oportunidade diak ida ba ita hotu, liliu Ministériu MAP,espera katak ema hotu ho konsensia atu bele partisipa programa sira hanesan ne’e tanba balu simu ona nune’e balun sedauk.
Neduni iha Ministériu refere, Ministru, Diretór Jerál sira, ita simu Vasina AZ ona ita lasente buat ida, bainhira ita simu Vasina iha ona orientasaun hosi ekipa Saúde informa mós atu ema ne’ebé Vasina ona presija deskansa loron ida nune’e bele rekopera fali ita nia saúde karik iha sitomas ruma bele ba sentru Saúde ne’ebé besik hodi halo tratamentu.
Tuir dadus hosi ekipa Saúde ne’ebé halo Vasina iha MAP hamutuk 84 kompostu hosi feto 23 mane 61, partisipante ne’ebé mak simu Vasina AZ mai hosi funsionário MAP no mós familia balun hosi Funsionário refere, nune’e iha balu mak lakonsege simu Vasina AZ, ho razaun tesaun aas, maibé hosi ekipa Saúde nafatin informa ba ema hotu voluntário atu bele simu Vasina iha faze tuir mai, alende ne’e tuir observasaun hosi Tekniku informasaun, durante halo Vasina ne’e lao diak tebes.
Facebook Social Comments
