Natarbora – Ministériu Agríkultura no Peskas  (MAP) liu hosi Diresaun Nasionál Agríkultura Hortikultura e Extensaun servisu hamutuk ho Kompañia Lomping High Tec  hosi Nasaun Xina fó treinamentu kona-ba Sístema halo viverus hare ne’ebé apropriadu utiliza makina kuda hare  ba tekniku extensionista ho mekaniku tratorista hamutuk ema nain 28 hosi munipiu 7 mak hanesan, Munisipiu Ainaro, Bobonaro, Baucau, Covalima, manatuto, Manufahi nomos Vikeke, treinamentu ne’e hala’o durante loron 5 hahu hosi loron segunda-feira data, 9 ate 14 fulan ida ne’e.   

Diretór Nasionál Agríkultura Hortikultura e Extensaun Amaro Ximenes  iha serimonia abertura treinamntu iha   Eskola Tekníka Agrikola Natarbora  esplika katak, objetivu hosi treinamentu  ne’e iha  rua primeiru maka  kona-ba makina sira ne’ebe apoiu hosi nasaun Xina mai iha Ministériu Agríkultura no Peskas agora dadaun distribui ona ba iha Munisipiu idak-idak maíbe to’o ohin loron seidauk utiliza neduni tekniku no extensionista sira tuir treinamentu ne’e oinsa mak atu bele halo operasaun ba makina hirak ne’e,  Partisipante sira sei aprende buat tolu primeiru aprende kona-ba viveirus hare oinsa tau iha makina tratór kuda hare nian,  segundu sira aprende kona-ba oinsa maka hare ne’e tau tiha iha makina kuda hare depois  oinsa prosesu makina atu kuda ne’e labele liu hun rua to’o tolu no  terseiru mekaniku ou tratorista sira oinsa maka bele lori no halo manutensaun ba tratór ne’ebé kuda hare nian ne’e.

Nia mós realsa katak, Partisipante sira husi munisipiu hitu (7) sira sai hanesan ToT (Training of Treinner ) atu nune’e sir a bele fila hodi hanorin tutan ba maluk  Extensionista sira seluk  nomos mekaníku sira seluk nune’e  kuandu tempu udan monu rai  kuda hare epoka primeiru hahu ona uza makina sira ne’ebé agora dadaun iha ona Munisipiu sia (9) liu-liu iha irrigasaun sia ne’ebé ita estabelese ona husi Ministériu Agríkultura no Peskas.

Ha’u espera  partisipante ne’ebé maka partisipa iha  treinamentu ida dadaun ne’e  sei komprende diak oinsa atu utiliza makina hirak ne’e no metode kuda haree uja makina  no fila ba munisipiu karik sira sei bele implementa iha kampo. Tenik Diretór

MAP liu hosi diresau nasionál Agríkultura hodi kontinua halo aproximasaun ba iha Kompañia Lomping atu nune’e sira bele garante nafatin  treinamentu relasaun ho makina sira ne’ebe dadaun iha no sira mós bele hanorin  kona-ba Sistema manutensaun utilizasaun makina sira ne’ebé  mak iha ona  ne’e duni ami koalia ho sira ba futuru ita iha nafatin liña koordenasaun ne’ebé diak atu nune’e sira bele suporta ita liu husi sira nia kapasidade ne’e iha.

Iha fatin hanesan, Team Leader Lomping Hig Tec  Mr.Vang hatutan,  treinamentu ne’e atu ajuda Timor oan rasik oinsa atu fó koiñesentu uza makina bainhira ba kampu sira rasik bele utiliza makina kuda hare. Kompañia Lomping mós fó makina lubuk ida ona ba MAP  hanesan tratór koa rai ka fila rai,  makina kuda hare nian neduni  Lomping Hig Tec mai fahe esperensia oinsa atu utiliza ekipamentus sira ne’ebé ami fahe ona ba iha munisipiu.

 Nia salienta katak,  ba partisipante sira hotu bele marka prezensa iha aktividade treinamentu ohin loron nian ne’e inportante tebes tanba ida ne’e oprtunidade diak atu nunee partisipante sira bele hatene kona-ba oinsa utiliza makina atu bele kuda hare nomos iha oportunidade ida ne’e hakarak fahe esperensia sira husi nasaun Xina hodi nune’e bele halo diak liu tan utiliza makina kuda hare nian ba futuru.

 Kompañia Lomping hakarak tebes fahe esperensia  ne’ebe sira  iha hodi nune’e bele ajuda timor oan barak iha rai ida ne’e, lomping  mós servisu hamutuk  ho universidade sira iha Xina hodi  bele koopera atu nune’e  timor oan barak ba  estuda iha nasaun Xina, liu-liu   estudante teknika agrikola-Natarbora  haruka sira ba iha nasaun Xina tuir formasaun  kona-ba Agrikultura nian, Universidade iha Xina mós fahe  esperensia no  matenek lubuk ida ba estudante sira ne’ebe ba tuir formasaun iha nasaun Xina,  ne’e hanesan kooperasaun diak entre Timor ho Xina ne’e  hanesan oportunidade diak ajuda estudante  tanba sira maka futuru ba nasaun nian.

 Treinamentu ida ne’e orsamentu mai hosi Ministériu Agrikultura e Peskas rasik, no  kompañia   Lomping Higt Tec-Xina  kontribui ka suporta atributu Uniforme ba treinamentu no oferese mós tekniku ninian. (Reno)