Baucau- Ministériu Agrikultura e Peskas (MAP) liu husi Diresaun Nasionál Agríkultura Hortikultura e Estensaun (DNAHE) kolleta hare iha Demo-área hamutuk 40 hektares, ne’ebe maka utiliza adubus organiku POC Nassa, POP Super Nassa no Harmonik) iha irrigasaun Larisula, Baguia, munisipiu Baucau tinan 2020.
Serimonia kolleta hare ne’e hanaran demostrasaun área suku Larisula, programa ne’e reprezenta husi diretór rejiaun I Fernando Soares hamutuk ho agrikultór sira iha fatin refere tanba Ministru MAP Pedro dos Reis no diretóra jerál agrikultura no hortikultura Odete Maria do Céu la marka prezensa tanba okupadu ho debate OJE 2020-2021 nian
Diretór rejiaun I ne’e esplika, seremonia kolleta hare ho total 347 hektares ne’e utiliza adubus organiku POC Nassa, POP Seper Nassa no Haronik) hamutuk 40 hektares. Durante ne’e apoiu agrikultór sira hanesan apoiu mina, adubus poc nassa, fini, aimoruk no mos ajuda husi parte tekniku nian. Variedade hare ne’ebe uza maka nakroma, rezultadu signifikante tebes husi reasaun adubu ne’e konsege hetan 7.4 tonelada pur hektar.
tuir informasaun ne’ebe mak rejiaun I hetan katak total área Larisula, agrikultor sira mai halo natar ne’e kuaze agrikultór sira husi suku tomak iha Posto Administrativu Baguia nian, sira husi parte foho mós mai halo hotu natar iha fatin ida ne’e, tanba ne’e espera agrikultór sira sei hetan rendimentu ne’ebe maka di’ak hodi bele fo apoiu ba nesidade uma laran, nune’e mós ho sira nia nia produsaun, hateten diretór ne’e iha serimonia kolleta hare.
Iha fatin hanesan, reprezentante prezidente autoriedade munisipiu Baucau Maria Celestina Viegas hateten, produsaun hare iha Suku Larisula pozitivu tebes husi MAP atravez diresaun servisu agrikultura municipiu hamutuk ho nia tekniku sira ne’ebé apoiu pupuk poc nassa.
“Oinsá mak ita nia komunidade iha suku Larisula iha postu administrativu Baguia bele apoiu nafatin MAP hodi bele hala’o di’ak liu tan ita nia hare iha irigasaun suku Larisula, husu mós ba grupu sira ne’ebe mak harii ona iha iha Suku Larisula, atu husu nafatin apoiu husi MAP fó nafatin hanoin ba sira oinsá hala’o sira nia natar iha irrigasaun ne’e ho di’ak liu hodi bele hetan rezultadu ne’ebe maka di’ak liu tan iha futuru mai”, Tenik Maria.
Entretantu agrikultór Larisula Jasinto Valdemar Gusmão hateten katak, kona-ba utilizasaun adubu poc nassa ne’e di’ak tebes, tanba dala barak sira la uza adubu ne’e di’ak maibé balun ladun ´rezultadu di’ak, hafoin uza adubu poc nassa hatudu rezultadu di’ak, tanba halo hare buras.
Aliende seremonia kolleta hare iha suku Larisula, ajensia TOMAK ne’ebe maka durante ne’e hala’o parseiru ho MAP halo mós sira nia promosaun ba makina koa hare no mós makina dulas hare. (E’J)
