Dili- Atividade peskas illegal hosi tinan ba tinan sai nafatin problema boot ba Timor-leste tanba atividade illegal iha tasi mane ne’e aumenta ba bebeik maibé atu kombate atividade peska illegal ne’e laos responsabilidade ema ida nian ka instituisaun ida nian de’it maibé ida ne’e nível nasionál neduni ema hotu iha responsabilidade atu kombate no reduz atividade refere.
Durante ne’e Ministériu Agríkultura e Peskas liu hosi diresaun jerál peskas halo diskusaun ho instituisaun relevante sira inklui kria dekretu lei peskas atu bele regula atividade peska iha tasi laran tanba hahu hosi tinan 2018 identifika ró peska illegal hamutuk 107, iha tinan 2019 purvolta 69 no iha tinan 2020 hahu iha fulan janeiru to’o mai jullu ne’e iha ró kuaze 10 de’it maka halo movimentasaun peskas illegal dalaruma tanba surtu Covid-19 ne’e bele reduz mós ró illegal sira ne’e. lia hirak ne’e hato’o hosi diretór nasionál Inspeksaun Peskas, Lourenço dos Reis Amaral ba ekipa Informasaun iha loron kinta-feira(23/7/20) iha nia kna’ar fatin Komoro.
Nia hatutan katak, Durante ne’e hosi Diresaun Nasionál Inpeksaun Peskas servisu hamutuk ajensia Wold fish uja mós Sistema Palgic Data System (PDS) ne’ebé maka bele detekta no monitoriza atividade peskas illegal iha tasi , Liu hosi Sistema ida ne’e kada minitu 15 bele trasmite pozisaun ró ne’e agora dadaun hala’o peskas illegal iha parte ne’ebé ita bele hatene no akompaiña kada tinan ró hira mak hala’o atividade peskas illegal iha tasi timor
Dadaun ne’e hosi Diresaun Nasionál Inspeksaun Peskas akompaiña nafatin movimentasaun atividade illegal sira ne’e tanba liu hosi buat sira ne’e ita lakon riku soin barak iha tasi laran, ró illegal sira tama mai ho kualker metodu no kualker apareillu sira bele uja hodi explora ita - nia tasi la tuir ona ita nia regulamentu no prosedimentu ne’ebé mak ita iha tanba ne’e sira naok neduni spesies ikan saída de’it no ahu ruin sira iha tasi okos bele estraga hotu.
Diretór mós hatutan liu tan katak, kuandu ita hakarak investe iha area peskas, ita mós tenki iha ró hodi halo operasaun kaer ikan aumesmu tempu ita mós tau ema iha ró ne’e hodi halo vizilansia nune’e bele fó ka pasa informasaun konaba ró illegal hira mak halo movimentasaun iha area tasi timor nian indireita mai iha instituisaun relevante sira. (E”S)
