Dili-Ministériu Agríkultura e Peskas (MAP) Hala’o enkontru Harmonizasaun ho Parseiru Dezenvolvimentu sira atu hare kona-ba servisu iha setór Agrikultura nian tinan 2020. Parseiru dezenvolvimentu ne’ebé maka durante ne’e parseria ho MAP maka hanesan, World Vision TL, ADRA, FAO, WEP, JICA, Care TL, CRS, AVANSA-USAID, OXFAM, SAPIP no World Fish. Enkontru ne’e hala’o iha loron tersa-feira (21/7)iha salaun MAP Komoro.
Iha enkontru ne’e Ministru MAP, Pedro dos Reis esplika katak, Nia mai iha MAP foin tama ba fulan ida ho balun, tanba ne’e enkontru ho perseiru Dezenvolvimentu sira ne’e hanesan previleziu bo’ot ida, durante ne’e parseiru sira mós iha interese tebes ba iha area Agrikultura nian.
“Ohin loron bele hasoru malu ho parseiru dezenvolvimentu sira, hodi bele hare hamutuk lalaok servisu Agrikultura nian ba iha futuru, tanba ne’e ita hotu-hotu ida-idak tenki hatene nia servisu inklui nia responsabilidade. Hahú husi Sekretariu jerál, Inspetór jerál, diretór jerál sira, diretór nasionál sira, xefe departamentu sira inklui mós Funsionariu nomos Extensionista sira hotu.”hateten Ministru Pedro.
Nia akresenta, enkontru ne’e importante tebes tanba ne’e ba oin diak liu kada Trimester ita tenki konvoka enkontru harmonizasaun ida ne’e, atu nune’e ita bele
Update ka informa ba malu kona-ba servisu ne’ebé mak ita halo iha baze, karik iha mudansa ruma ita bele hare hamutuk nia progresu ne’e to’o iha ne’ebé, atu ita bele hare ida idak nia servisu, no ita mós bele apar ba malu.
Hanesan Ministru husu ba parseiru no funsionariu inklui kargu xefia sira primeiru idak- idak tenki halo nia servisu, segundu servisu ne’e tenki iha liña kordenasaun no komunikasaun ne’ebé maka diak ba malu, liu-liu mai iha Ministru, Atu nune’e ita- nia servisu ne’e labele runga ranga (tumpang tinding), servisu ne’ebé maka durante ne’e ita halo bele hetan nia rezultadu ne’ebé maka diak. Mais ou menus ninia benefisiu ne’e ita - nia inan aman sira iha baze ne’e bele senti.
Atividade agrikultura ne’ebé maka parseirus halo ona diak liu ministeriu halo fali buat seluk tanba ita halo atividade hanesan ne’e ita gasta orsamentu de’it depois ne’e hanesan ita halo fali kompetisaun ba malu afinal ita nia objetivu ne’e ida de’it mak agrikultura tanba ne’e ba ita hakarak halo liña kordenasaun ne’ebé maka diak liu tan aomesmu tempu ita mós halo observasaun iha baze ne’eba atu ita mós bele fó sujestaun ba malu.
Iha fatin hanesan, Sekretariu Jerál MAP César José da Cruz hatutan tan katak, laos parseiru sira mak atu orienta ministériu ne’e lae, maíbé ministériu mak iha ninia programa atu halo, bainhira ministrériu presija buat ruma hafoin parseiru sira fó apoiu atu ita- nia servisu agrikultura ne’e bele ba oin.
Alende ne’e Embaxadór Austrália iha Timor-leste, Peter Robert salienta katak, oinsa mak ita bele fó motivasaun ba joven sira no fó kapasitasaun ba sira atu nune’e sira bele dedika’an iha area Agrikultura. Dala barak ita iha programa barak fó kapasitasaun halo atividade barak maíbé laiha kontinuidade, tanba obstaklu ne’ebé mak ita hasoru, ne’e duni embaxadór ninia hanoin katak, laos Parseiru sira mak atu orienta maibé MAP maka kria rasik programa depois parseiru sira bele fó de’it apoiu. (Tyfa)
