Liquiça- Ekipa projeitu hasa’e produtividade Agrikultura Sustentavel (HAPAS) ou SAPIP hasoru malu dahuluk ho komite Jestaun Sub Basias Hidrografika Loes Liquiça (KJSBHLL), servisu ne’e kopera hamutuk ho Diresaun Agríkultura Munisipal hodi bele fó asistensia ba agrikultores iha suku alvu sira. Atu asegura funsionamentu impelementasaun aktividade iha Basias Hidrografika Loes Liquiça nian.
Relasiona ho asuntu ne’e Sub Basias Hidrografika Loes Liquiça hari’i ona Komite Jestaun ho membru hamutuk 15 kompostu husi Diretores liña Ministeriais inklui autoriedade suku alvu, hodi nune’e tau matan ba jestaun rekursu naturais Basias Hidrografika Sustentavel. Sorumutu ne’e hala’o iha loron Sexta (03/07) iha Salaun KJSBHLL-Diresaun Servisu Agríkultura Liquiça Mauboque.
Tuir Sekretariu Jerál MAP hanesan mós diretór ba projeitu Sapip, César José da Cruz esplika, objektivu husi enkontru ne’e atu hare liu ba iha Sub Basias Hidrografika husi Loes nian ne’ebe mak iha tanba grupu benifisiariu ne’ebé mak existe hamutuk 55 iha Munisipiu Liquiça nia laran, grupu sira ne’e identifika ona balun hatama ona proposta e balun seidauk maíbe nia objektivu prinsipál mak oinsa mak grupu sira bele hetan rendimentu husi programa HAPAS ou SAPIP ne’e rasik.
ohin mós ekipa SAPIP hamutuk ho Administradór nu’udar Presidente Komite Basias Hidrografikas husi Liquiça nian hamutuk ho Diretór Ministériu relevante atu fahe motor ba koordenador extensionista sira atu bele apoiu sira nia servisu, tanba depois de covid-19 estadu emergencia to fulan 2 ou 3 ita labele halo buat ida maíbe ohin agradese tanba ita hotu-hotu servisu ho esforsu liu-liu Diretór servisu agríkultura Liquiça nian nu’udar koordenador sekretariadu iha Sub Basias hidrografikas Liquiça nian hanoin ida katak oinsa mak halo programa monitorizasaun nomos avaliasaun ba projetu ne’e.
Iha fatin hanesan, Administradór Munisipiu Liquisa hanesan mós Prezidente KJSBHLL Domingos da Conceicão dos Santos hatutan katak, ne’e hanesan primeiru reuniaun ba Komite Sub Basias Hidrorafika Munisipiu Liquiça nian ne’ebé mak estabelese tiha ona iha tinan kotuk.
Nia akresenta, ohin mós distribui fasilidade transporte hanesan motor, ba extensionista sira ne’ebé maka destaka iha Munisipiu refere, atu bele halo akompañamentu tekniku ba ita nia grupu Agrikultór sira, hodi halo monitorizasaun rutina iha liña Jerál, atu nune’e bele hare ba aktividades ne’ebé mak ita- nia grupu sira hala’o hela hodi nune’e atividade hotu bele lao ho diak no bele hetan rezultadu ne’ebé maka diak iha futuru.
Entretantu Programa Offisial SAPIP Liquiça, Melita Pinto Sarmento esplika katak ohin entrega motorizada unidade 5 ba extensionista sira iha suku alvu 4 ho marka Yamaha XZT , no motorizada 1 Yamaha Vixion ba sekretariadu komite, aomesmu tempu loron ida ne’e mós Kompañia Lokál ne’ebé mak durante ne’e kaer obra salaun enkontru finaliza ona nia projeitu no entrega ona savi ba presidenti Basias hidrografika akompaiña hosi Diretór Projeitu Sapip inklui ekipa komite. (E’J)
