Manufahi: Atu hasae’ produsan hare iha rai laran Ministériu Agrikultura e Peskas (MAP) liu husi Diresaun Nasionál Agríkultura Hortikultura e Estensaun hala’o lansamentu ba kultivasaun hare ne’ebé utiliza Adubus Organiku (POC Nassa POP Super Nassa no Hormonik), ba Segundu Epoka ho total 500 hektares iha Irrigasaun Karau ulun Betano.
Lansamentu kultivasaun kuda hare ka demo area iha ne’e, MAP iha nia tarjetu iha mil hektares maíbé ami iha problema kona ba irrigasaun ho tratór sira ne’e at hotu entaun ba segundu epoka ne’e ami kuda de’it 500 hektares. Hateten Ministru Agríkultura e Peskas (MAP) Pedro dos Reis hafoin halo kultivasaun ba hare iha area refere iha loron Quinta (18/06) iha Betano.
Nia afirma, prioridade ba ba ita mak oinsa tau hasa’e produsaun hare iha rai laran maibé agora ami seidauk bele halo buat barak, e komesa lao neneik ona liu hosi lansamentu kuda hare ida ne’e ami nia ekipa mós sei ba halo tan iha Larisula Baucau, ida ne’e maka servisu iha terenu nian. Ita mós labele obriga a’an atu halo buat bo’ot, maibé halo tuir kapasidade ne’ebé maka Ministériu iha.
“Agora ami koko ho demo area iha Betano hahu ho 500 hektares iha kanal irigasaun sia (9) iha kanal irirgasaun balun ne’ebe maka ami halo uilitizasaun adubus organiku POC Nassa, POP Super Nassa no Harmonik. Ami mós halo ona koilleta iha Irrigasaun Oebaba no nia rezultadu hatudu diak tebes.”hateten Ministro MAP
Nia informa, MAP iha tratores total unidade 36 maibé barak mak avaria ona no hela de’it unidade lima (5) maka sei funsiona hela, hanesan ita hotu hatene katak irrigasaun karau ulun fatin ne’ebé maka produtivu tebes ba natar, ne’e ho tratores unidade lima (5) de’it difisil oituan hodi fila rai hirak ne’e. Iha limitasaun barbarak ne’ebé MAP enfrenta. Maibé MAP mós sei buka dalan oínsa atu halo manutensaun ba trtores hirak ne’ebé maka avaria hela ne’e.
Nia akresenta, MAP mos iha liña koordenasaun diak ho sentru Logistik Nasionál (CLN) hanesan foin lalais iha oebaba molok atu koilleta ami iha ona liña koordenasan ho Sentru Logistika Nasionál atu distribui ona hare ne’e duni ha’u husu ba ita nia Agrikultór sira atu labele baruk hodi produz hare, tanba Sentru Logistiku Nasionál prontu atu sosa produtu saída de’it maka ita- nia Agrikultór sira produs.
Iha fatin hanesan, xefe grupu Haksolok, Henrique Pereira esplika katak sira nia grupu ne’e total ema nain ne’en (6), no sira halo natar ho total hektares hitu (7).
“Ami nain (6) ne’e halo natar total hektares hitu (7), hau rasik maka kaer rua no hau nia membru sira kaer ida ida, ami mós hetan apoiu masimu husi MAP, hanesan; Tratores, Mina gratuita, fini nomos adubus foun hanesan POC Nassa, POP Super Nassa no Hormonik. Ida ne’e hanesan primeiraves ami foin implementa.” Tenik Henrique
Nia informa, Problema ne’ebé ami hasoru mak hanesan irrigasaun tanba kuandu udan bo’ot sempre hamosu inundasaun, neduni bele fo ameasa bo’ot ba irrigasaun refere. (EJ)
