Dili- komisaun komitee Sensus Agríkola hala’o enkontru hodi aprezenta relatorio Sensus Agríkola 2019 ne’ebe mak hala’o iha tinan kotuk liu , dadus númeru area enumerasaun ne’ebé identifika hamutuk 2.237, númeru total uma kain privada hamutuk 213.417, total populasaun hamutuk 1.2 milloens no númeru total prioridade uma-kain agríkola 141,141, númeru total instituisaun agrikola hamutuk 597 , neduni dadus final porsentajen prioridade uma-kain ne’ebé mak involve iha area agrikultura 66% no agrikultór feto ne’ebe involve iha vida agrikultura iha porsentu 15 no mane iha porsentu 85. Enkontru ne’e hala’o iha loron kuarta (10/6/20) iha salaun MAP Komoro.
Presidenti komitee tekniku Sensu Agríkola 2019 hanesan mós Diretór jerál Estatistika Ministeriu Finansas, Elias Dos Santos Ferreira iha intervista katak, enkontru ohin ne’e ami konvida komitee tekniku liña ministerial hodi aprejenta rezultadu relatorio Sensu Agríkultura 2019, relatorio ne’e finaliza tiha ona iha fulan marsu liu ba maibé tanba impkatu hosi surtu covid -19 entaun foin mak komisaun bele realiza enkontru ida ne’e.
Semana oin presidenti komitee Sensus hamutuk ho ekipa sei aprejenta relatorio ne’e ba ministru agríkultura no ministru finansas atu bele kontinua ba aprezenta iha konsellu ministru atu nun’e e iha tempu badak ita bele halo ona lansamentu dadus ofisial sensu agrikultura akurado ba públiku tanba ministeriu agrikultura sei halo planu orsamentu jerál bazeia ba dadus hirak ne’e.
Nia mós hato’o obrigado ba uma kain iha Timor laran tomak fo ona resposta ba perguntas sira ne’e no lahaluha mos agradese ba presidenti autoridade no xefe suku no xefe aldeia sira ne’ebe mak kolabora hamutuk e ohin loron ita bele hetan rezultadu dadus ne’ebé mak akuradu.
Nia hatutan, iha tempu badak sei halo Lansamentu ba dadus final no relatorio sensus agrikola 2019 ho 283 pajinas, ami sei prepara sumario indikadores relatorio hamutuk 86 no sei prepara mós mapa atu nune’e ema bele komprende diak liu tan.
Iha fatin hanesan, Sekretariu Jerál MAP nu’udar mós vise preidenti TLAC César José da Cruz lori ministériu nian naran hato’o obrigado no parabens ba diretór jeral Estatistika Ministériu Finansas nian hamutuk ho ekipa sensus agríkola, inklui autoridade lokal sira, administradór posto nian ne’ebé mak servisu maka’as ohin loron ita bele aprezenta rezultadu sumario relatorio Sensus Agríkola 2019 no iha tempu badak ita sei halo lansamentu ba dadus ne’ebé mak akuradu atu nune’e ministeriu bele halo planu orsamentu jerál estadu 2020-2021 bazeia ba dadus refere. (E’S)
