Manatutu- Ministériu Agríkultura no Peskas (MAP) liu hosi Diresaun Jerál Agríkultura e Hortikultura lansa kuda hare iha Demo-Area hamutuk hektares ha’at-nulu (40) ne’ebé utiliza adubus organíku (POC Nassa, POP Super Nassa ho Hormonik) iha area irrigasaun Bluto Laleia.
Kuda hare hektares ha’at-nulu (40) utilizasaun adubus organiku (POC Nassa, POP Super Nassa ho Hormonik) ida ne’e hanesan estratéjia Ministériu nian atu bele hasa’e produsaun iha rai laran. hateten Diretora Jerál Agríkultura e Hortikultura, Maria Odete do Ceu Guterres hafoin lansa programa kuda hare, iha loron Quinta (27/02) iha Laleia.
Nia esplika, polítiku estratéjia Ministériu nian primeiru atu hasa’e produtividade produsaun, segundu atu inkamiña ita- nia prudutu sira atu asesu ba merkadu no ikus mak oinsa atu mantein nafatin konservasaun rai. Entaun liu hosi programa kuda hare ho aplikasaun utilizasaun pupuk organíku Poc Nassa ida ne’e nia funsaun atu hasa’e produtividade no produsaun nomos atu konserva rai hodi mantein nafatin nutrisaun ba rai.
Nia hatutan, ohin ita halo lansamentu kuda hare ba hektares ha’at-nulu (40) ne’e ho aplikasaun Poc nassa iha de’it irigasaun Bluto, maibé irrigasaun ne’e mós kobre ba iha Vemasse. Atividade kuda hare Demo-area ne’e sei hala’o iha kanais irrigasaun sia (9) ne’ebé mak iha Timor Laran tomak. ami optimista utilizasaun poc nassa ne’e, tanba bele hasa’e produtividade ne’ebé a’as tebes.
“Tuir teste ne’ebé ami halo demplotu, ami hetan tonelades ne’en (6) por hektare kompara ho bain-bain la uza POC nassa ita hetan tonelades tolu (3) de’it por hektare, oinsa mak Ministério buka teknonójia oinsa atu aplika produtividade hare ninian ho teste utilizasaun demplotu ne’ebé ita hetan tonelades ne’en (6) por hektare. Tanba nemak husi demplotu ne’e ami halo Demo area ho hectare ha’at-nulu (40) atu bele hasa’e produtividade hare nian.”tenik Odete
Nia akresenta, Produsaun hare ba konsumu iha rai laran ne’e sei menus, tuir ami nia kalkusaun tinan 1 ita sei hatama por volta 90 mil tonelades to’o 105 mil tonelades, ita hasa’e produtividade ida ne’e, ha’u garantia tinan hira mai ita bele redus produsaun inportasaun, la’os hapara inportasaun maibé bele redus. Agora dadauk Ministériu Agríkultura no Peskas mós esbelese ona loja Agrikultores atu oinsa ita- nia Agrikultór sira bele asesu ba iha merkadu.
Iha fatin hanesan, xefe Suku Hatularan, Gaspar José de Fatima da Costa agradese barak ba MAP tanba bele aplika ona oinsa halo utilizasaun adubus POC Nassa, ne’e duni sira senti kontenti tebes hodi aplika iha sira nia rai Laleia.
Nia mós husu atu atividades ne’e lao ba oin nafatin, tanba komunidade sira prontu suporta nafatin ba iha futuru hodi hasa’e nafatin produsaun iha area Agrikultura nian. E’J
