Liquiça- Reprejentante Banku mundial hamutuk ho ekipa projeitu Programa Hasa’e Produtividade Agrikultura Sustentavél (HAPAS)/SAPIP inklui reprejentante hosi Embaixada Australia hala’o vizita ba grupu Benefisiariu iha Suku ha’at maka hanesan; Leotala, Guiço, Lisadila no Gugleur iha area Loes.
Objetivu husi vizita ne’e ekipa refere hakarak hare diretamente ba atividades saída maka grupu benefisiariu sira halo ona, iha vizitasaun akompaiña mós husi Sekretariu Jerál MAP hanesan mós Diretór ba Projeitu SAPIP, César José da Cruz, nomos Diretora Finças MAP, vizitasaun ne’e hala’o iha loron Sexta (14/02) iha Munisipiu Liquiça.
Tuir Diretór Projeitu SAPIP, César esplika katak, ohin sira mai hotu iha ne’e atu hare lolos atividades saída mak ita- nia grupu sira hala’o ona, programa Hasa’e Produtividade Agríkultura Sustenvel HAPAS/SAPIP ne’ebé finasia hosi World Bank durante ne’e fó apoiu fundus ki’ik ba grupu agrikultura liu hosi Ministériu Agríkultura e Peskas iha area Basias Hidrográfiku ho objetivu atu hadia ekonomía agrikultór iha nivel suku.
“Husi vizita ida- ne’e atu haree liu ba iha Basia Hidrografika Loes nian ne’ebé kompostu husi Munisipiu tolu hanesan Bobonaro, Ermera no Liquiça liu-liu liga ba atividades ne’ebé mak atu implementa. Tanba ne’e ekiapa husi Banku Mundial sira mai husi Jakarta n mos Australia nian, ohin sira mai hotu iha ne’e atu haree lolos atividades saída mak ita -nia grupu sira hala’o.”tenik César
Nia hatutan, depoisde atividades hirak ne’e lao hotu ona hafoin estensionista sira tun hodi haree, tanba ne’e maka ita mós presiza fó kapasitasaun ba ita- nia estensionista sira, tanba Estensinta sira maka sei haree atividades sira iha Suku, kada Suku ida iha grupu ha’at (4)ou lima (5), grupu hirak ne’e hala’o sira- nia atividades mak hanesan Agrikultura e Hortikultura, Floresta, Pekuaria, Peska.
Nia akresenta, sekarik estensionista sira la komprende oinsa, tanba ne’e maka oras ne’e dadauk iha ona planu katak atu bele fó treinamentu ba estensionista sira uza osan Banku Mundial nian atu bele fó kapasitasaun ba sira atu sira mós iha ona kapasidade nato’on hodi bele jere ona ita - nia grupu benefisiariu sira.
Iha fatin hanesan, Prezidente Autoridade Munisipiu Bobonaro hanesan mós Prezidente Basia Hidrografika Loes, Zeferino Soares dos Santos hatutan, Programa ne’e mós hetan sosializasaun durante ne’e liu hosi ekipa tékniku sira hosi HAPAS nian no forma uluk konsellu Basia Hidrografiku prezide rasik husi ha’u hanesan Prezidente Basia Hidrografiku Loes nian no Vise nain rua maka Prezidente Autoridade Munisipiu Ermera nomos Administradór Munisipiu Liquiça.
“Ohin ita hare katak iha area Liquiça nian, sira forma ona grupu, hosi Grupu hirak ne’e, sira halo ona atividades balun, atividades balun ne’ebé ligasaun ho Administrasaun maka sira halo ona proposta ba programa HAPAS nian, atu bele halo sira nia atividades.”hateten Zeferino
Nia akresenta, Atividades seluk ne’ebé sira mak iha inisistiva rasik halo ona preparasaun balun, hanesan hakiak animal sira prepara ona halo animal nia luhan, sira seluk mós halo ona viveirus ba ai-oan atu bele protéjé mós Basia Hidrografika Loes nian, atividades sira ne’e mak dadauk ne’e lao hela maske sira- nia proposta oras ne’e dadauk foin tama iha faze verifikasaun.
Nia subliña, Programa ida ne’e foin hahu iha ita- nia rai doben ida ne’e liu-liu sira ne’ebé iha area Basia Hidrografika Loes nian, maske buat foun maibé ita- nia komunidade komesa komprende dadauk saída maka sira atu halo hodi bele proteje ita- nia Basia Hidrografika, nomos atu bele hadia sira nia ekonomia rasik nomos bele hadia sira nia moris.
Entretantu, Ofisial Projeitu HAPAS Munisipiu Liquiça Melita Sarmento esplika tan katak, Munisipiu ne’e rasik kobre Suku a’at maka hanesan posto Administrativu Liquiça Vila iha Suku ida de’it, maka Suku Leotala. Posto Adminitrativu Maubara maka kobre Suku 3 hanesan, Guiço, Lisadila no Gugleur.
Atividades ne’ebé ami hala’o ona mak hanesan, planu iha suku ha’at finaliza ona, nomos treinamentu no sosializa formatu fundus ki’ik ba grupu sira ne’e maka estabelese ona. Iha suku ha’at ne’e ita estebelese ona grupu hamutuk 55, sosializasaun konaba oínsa mak atu hakerek proposta no submete proposta fó hotu tiha ona, grupu hirak ne’e oras ne’e dadauk iha hela prosesu hakerek proposta.
Nia informa, Iha suku Gugleur nian, iha proposta 20 mak tama ona, tanba Suku refere iha Grupu 20, no ekipa mós halo verifikasaun ba proposta mós hotu ona, sei falta mak atu halo verifikasaun ba iha terenu. Agora dadauk iha ona planu atu tun ba halo ona verifikasaun dadus. entretantu iha Suku seluk mós oras ne’e dadauk prosesu ba hakerek proposta nian lao hela. (Tyfa)
